ЧИИТТЕРНІҢ УЗЫ МАРЫҒДА ТАПТАЛЧА
12.02.2020
Хабарлар
«Чиит устар» марығ. Пу кӱннерде Хакасияның аймах профессиональнай ӱгредіг учреждениелерінде WorldSkills стандарттарынӌа «Чиит устар» регион чемпионады иртче. Анда ӧткін, пӧзік пілістіг оол-хыстар араласчалар
ЧЫЛ САй ПУ МАРЫҒ ПАЙРАМНИ АЗЫЛЧА. АҒБАНДАҒЫ ЧИИТТЕР ӦРГЕЗІНДЕ ЧЕМПИОНАТТЫҢ АЧЫХ-ЧАРЫХ КӦҢНІЛІГ АРАЛАСЧЫЛАРЫ, ЭКСПЕРТТЕР, ЧЫЫЛЫЗЫП, УДУР-ТӦДІР ТАНЫСЧАЛАР. МАРЫҒНЫҢ ПАСТАҒЫ КӰНІНДЕ ХАКАСИЯДАҒЫ АйМАХ ЧАйААЧЫ ӦМЕЛЕР, СІЛІГ ТЕЕЛБЕКТЕРІН ТОЛДЫРЫП, АРАЛАСЧЫЛАРНЫҢ КӦҢНІН УЛАМОХ КӦДІРГЕННЕР. ХАКАСИЯ ПАЗЫНЫҢ ОРЫНҶЫЗЫ ЮРИЙ КУРЛАЕВ ОЛАРНЫ ЧЕМПИОНАТ АЗЫЛҒАНЫНАҢ АЛҒЫСТААН.
- Пӱӱнгі кӱнде тоғысчы профессиялар уғаа киректелче. Аннаңар пістің чир-суубыста андағ чемпионат иртчеткенi уғаа чахсы. Сірер, марығласчылар, удур-тӧдір улуғлазып, устарыңнаң сыназыңар. Эксперттер араласчыларның тоғызын орта паалазын. Иң чахсыларының чахсызы чиңіске читсiн - айланған Юрий Курлаев чиит улуссар.
Чоохтирға кирек, пӱӱл республикада тӧртінҷі хати WorldSkills стандарттарынҷа тоғысчы профессияларға ӱгренчеткен оол-хыстарға «Чиит устар» марығ иртірілче. Анда пӧзік пілістіг студенттер 21 кӧстегҷе (ирткен чылда - 16 кӧстегҷе. - _ Авт.) устарынаң сынасчалар. Ӱгренҷілер, тізең, читі кӧстегҷе пілістерін алғытчалар. Паза пӱӱл пастағызын на 50 час ас парған улусха, марығда аралазып, устарынаң ӱс кӧстегҷе сыназарға оңдай пирілче.
Чемпионаттың аймах площадкаларында Хакасияның аймах-пасха профессиональнай ӱгредіг учреждениелерінің студенттері устарынаң сынасчалар. Тиксі 209 араласчы. Оларның тоғыстарын пӧзік квалификациялығ, WorldSkills стандарттарынҷа сертификаттығ 270 эксперт паалапча. Марығда араласпин, че пілістерін алғыдар ӱчӱн, чемпионат хайди иртчеткенін кӧріп аларға пістін чир-суубыссар Томск облазынаң, Хызылчар крайынаң, Кемеров облазынаң, Ямало-Ненецкай автоном округынаң студенттер килгеннер.
Марығның пастағы кӱнінде мағаа малярлар паза пӱдірігҷілер сынасчатханын кӧріп аларға оң полған. Пастап мин пӱдірігҷілер марығласчатхан орынзар чол тутхам. Анда тӧрт оол паза пір хыс саңай маң чохха тӱскен. Оларның аразында Асхыстағы 18 № профессиональнай училищенің студенті Закир Кичеев полған. Закир чахсы ӱгренче. Таллап алған профессиязы аның кӧңніне кірче. Оол, ӱгренізін тоосса, аннаң андар ӱгренерге пӧгін тутча.
Малярлар устарынаң сынасчатхан орынзар парғанымда, ырахтынох сыр чызы сабыл килчеткен. Анда пис араласчы стенелерні, ізікті сырлирға тимнепчеткен. Соонаң олар хоостығ обойларны стенеге чапсырғаннар. Оол-хыстар чапчаң тудынғаннар. Анзы пілдістіг, чиңіс тудар ӱчӱн, оларға пирілген тус аразына кӧп тоғыс ит саларға кирек.
Люба Кызынгашева, обойларны ипти тудып, оларны стенеге сибер наари тутхан. Анаң ол, улуғ нимес кизек исті алып, чапсырчатхан обойларны чысхлап сыхча. Любаның тӧреен-ӧскен чирі Кічіг Сии аал полча. 18 частығ хыс школа соонаң малярға ӱгренерге пӧгінібіскен. Аннаңар Таштыптағы 16 № училищезер кірібіскен. Амды ол ікінҷі курста маңнаныстығ ӱгренче. Профессиязы хоостыра тоғыстарны чахсы толдырчатхан ӱчӱн, ӱгретчізі аны чемпионатта аралазарға чӧптеен. Чиит хыс ӱгретчізінің чӧбінҷе марығда узын сынап кӧрерге чаратхан.
- Таштыптағы училищені тоозыбыссам, ӱгренізімні аннан андар узарадарға сағынчам. Минiң кӧрізімнең, маляр - ол чайаачы тоғыс. Марығның халғанҷы чардығында ідӧк чайаачы тоғыс пирілер. Піске, гипсокартонҷа хоос салып, аны сіліг сырлап саларға кирек полар, - чоохтаан ол.
Мындағ пӧзік синде иртірілчеткен марығда ол пастағызын на араласча. Че андағ даа полза, Люба чапчаң тудынча. Пирілген тоғыстар сидік нимес тіп таныхтапча ол.
Маляр паза хуруғ пӱдіріг тоғыстары площадкаларында марығ ӱс кӱн иртер. Чиңісчілернің аттары пятницада адалар. Пістің пӱӱнгі матырларыбыс чиңiстернiң санына кір парарына ізенчебіс.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы