СЫН ТАРХЫННЫ ПІРДЕЕЗІ АЛЫСТЫР ПОЛБАС
18.02.2020
Хабарлар
Илбек Чиңіске - 75 чыл. Ағбан город администрациязының улуғ залында Илбек Ада чааның араласчыларына паза ветераннарына, ідӧк тыл істенӌілеріне пайрамнығ медальлар читірілген
АҒБАН ГОРОДТЫҢ АДМИНИСТРАЦИЯЗЫНЗАР ЧОН ТОЛДЫРА ЧЫЫЛ ПАРҒАН. ИЛБЕК АДА ЧААНЫҢ АРАЛАСЧЫЛАРЫН ПАЗА ВЕТЕРАННАРЫН, ТЫЛ ІСТЕНҶІЛЕРІН ЧАЛАХАЙ УДУРЛАПЧАТХАННАР АДМИНИСТРАЦИЯ ТОҒЫНҶЫЛАРЫ ПАЗА ЮНАРМЕЕЦТЕР. ВЕТЕРАННАРНЫҢ КӦБІЗІН АНДАР ТУҒАННАРЫ АҒЫЛҒАННАР, ЮНАРМЕЕЦТЕР ПОЛҒАН НА ААЛҶЫНЫ, ЗАЛЗАР КИРІП, УЛУҒ ТЕГІЛЕК СТОЛ КИСТІНЕ ОДЫРТХАННАР. УЛУҒЛАН ПАРҒАН ВЕТЕРАННАРНЫҢ ПІРЕЕЗІН КИНЕКТЕР КОЛЯСКАЗЫНАҢ АПАРАРҒА КИЛІСКЕН. МЫНДАҒ ПАЙРАМНЫҒ МЕРОПРИЯТИЕЕ ХЫҒЫРТЫЛҒАН КІЗІЛЕРНІҢ ПРАЙЗЫ КИЛГЕН.
Ағбанның пазы Алексей Лёмин чыылған чонзар улуғ нимес чоохнаң айланған:
- Пӱӱн пеер хығыртылған кізілер - Илбек Ада чааның араласчылары паза ветераннары, тыл істенӌілері - пістің поғдархазыбыс. Олар, махачы чаалазып, посха айабин тоғынып, піске амғы чуртасты сыйлааннар. Сірерні мында кӧріп, мин тың ӧрінчем. Пістің амғы тӧлібіс - сірернің пархаларың паза кӧргенектерің. Мағаа часкалығ ӱлӱс тӱскен - ағам чаадаң хазых айланған. Ол кӧп ниме чоохтаҷаң, ағаа 9 Май иң улуғ ӱлӱкӱн полған. Город пазы полған Николай Генрихович Булакин Илбек Ада чаа ветераннарын, тыл істенӌілерін сыбыра аарлаӌаң, оларға паарсаҷаң, оларның чуртазын чахсыландырарға кӱстенҷең. Піс ол апарған кибірлерні узаратчабыс.
Сірернің чаадаңар чооғыңарны піс хынып исчебіс. Сірер Илбек Ада чааның сын тархынын пілчезер, аны піске читірчезер. Сын тархынны пірдеезі алыстыр полбас. Россияның президенту Илбек Ада чаадағы Чиңістің 75-ҷі чылына чарыдып, пайрамнығ сыйыхтар читірердеңер Указ сығарыбысхан. Амды піс ол Указ хоостыра сыйыхтар читіріп пастапчабыс.
Чооғын тоозып, Алексей Лёмин, полған на ветеранзар парып, кӧксіне пайрамнығ медаль хазаан паза чахайахтар читірген. Іди ол, аалӌыларны хуӌахтап, оларнаң хысхаӌах чоох алыс турған. Чыылығда прай 30-ча ветеран сыйых алған. Оларның санында полғаннар хакас аға Пётр Гаврилович Аскиров паза ууӌа Анисья Ивановна Шоева. Ікізі - тыл істенӌізі. Мының алнында даа олар кӧп пайрамнығ медальнаң сыйыхтатхан полғаннар. Амды Пётр Гавриловичке «1941 - 1945 чыллардағы Илбек Ада чаадағы Чиңіске 75 чыл» пайрамнығ медаль читірілген, Анисья Ивановнаа - «Істеніс сабланызы ӱчӱн» медаль.
Пётр Гаврилович Аскиров Ағбан пилтірі аймаандағы Мохов аалда 1926 чылда тӧреен. 1931 чылда Кемеров облазынзар кӧс парыбысхан. «Мин прай чуртазым тайғаӌы полғам, тайғада чуртаам, - чоохтаан ол. - Чаа тузында Кемеров облазындағы Китакскай леспромхозта ағас узурып тоғынғам. Чыл ибіре Яя суғӌа ағас индірӌеңміс, анаң оларны, вагоннарға таарлап, прай хазнаӌа ысчаңмыс. Анаң Новокузнецкте чуртаам, 2013 чылда Ағбанзар кӧс килгем. Амды чалғызан чуртапчам, квартирам пар. Ипчім, хызым, оолғым сын чирзер парыбысханнар. Ағбан минің кӧңніме кірче. Чыл сай мин «Хабар» газетаа пазынчам, аны хығырарға хынчам...» Аның тоғынған стажы 60 чыл азыра.
Анисья Ивановна Шоеваа 88 час, Ағбанда чуртапча. Чаа тузында Ағбан пилтірі аймаандағы Трайлар аалында чуртаан, мал тутчатхан хоныхта істенген. Пу мероприятиеде ол хызынаң хада полған. Аның тоғынған стажы ідӧк 60 чыл асча.
Алексей Лёмин, ветераннарға сыйыхтар читірген соонда, піс сірерні хаӌан даа ундубаспыс, тастабаспыс, Илбек Чиңіс кӱнінде «Ӧлімі чох полкта» город орамаларынӌа парарбыс теен.
Автор :
Николай САЛТАРОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде