ЧИТПЕСТЕР ТӰЗЕДІЛГЕН
18.02.2020
Хабарлар
Чыылығ. Хакасия пазы Валентин Коновалов республиканың чурт-коммунальнай хоных объекттері хысхы тусты хайди иртірчеткен сурығӌа видеоселектор пастыра чыылығ иртірген
Чыылығда араласханнар Хакасия пазының орынӌылары Юрий Курлаев паза Ирина Войнова, республиканың пӱдіріг паза ЖКХ министрі Сергей Новиков, Ростехнадзорның паза ЧС-тың кізілері, муниципальнай пӱдістернің устағӌылары.
Республиканың чурт-коммунальнай хоных сферазында киректер хайди парчатханнаңар искірген министр Сергей Новиков. Аның чооғынаң, регионның ЖКХ объекттері олаңай режимде тоғынчалар. Топливо котельнайларға читкіӌе тартылған, амды пилетелген хара тас 69 тоннаа тиңнелче. Кӧріл парған синге Абазадағы 2 № котельнайда топливо чидіспинче, ідӧк Асхыстағы котельнайда хара тас 7 кӱнге пилетелген. Чағынғы туста оларзар топливо читкіӌе тартылар.
Суғ, чылығ пирӌең сетьтернің схемаларын орталадар тоғыс узарадылча. Таштып аймаанда пу тоғысты ам на пастабыстылар, Асхыс, Шира, Боград аймахтарында паза Сорығда ам даа пастабааннар. 1 апрельге теере ол тоғыс толдырыл парарға кирек.
Тимненіс паспортын Пии аймаандағы Кирбі аал чӧбі ам даа ал полбинча. Андағы котельнайның тоғынӌылары 20 февральда пазох сыныхтағ иртері кӧріл парған. Амды олар аттестацияны хати иртчелер.
Ирткен неделяда министерствозар чуртағӌылардаң ікі айланыс кірген - Сорығдаң паза Ағбаннаң. Айланыстарда квартираларда чылығ нормативке читпинчеткеннеңер искірілче. Ол хоптарӌа кирек тоғыс апарылған, читпестер тӱзеділген. Сорығда, Харатаста, Расцвет поселокта суғ паза чылығ пирӌең сетьтерде улуғ нимес сайбағлар полған, оларның салтары табырах чох иділген.
Аймахтарда ЖКХ объекттерін казеннай предприятиелерге айландырар тоғыс апарылча. Мында федеральнай закон хоостыра прай унитарнай учреждениелерні идінӌектер холына пир саларға кирек полған. Че олох закон хоостыра коммунальнай предприятиелерӌе пу сурығны пӧгер полномочиелер регионнарға пирілче. Аннаңар республикадағы коммунальнай объекттерні казеннай предприятиелерге айландырар тоғысты узарадарға кирек.
Аймахтарда муниципалитеттер тоғынӌылары чарғы приставтарынаң хада коммунальнай полызығларнаң тузаланған ӱчӱн тӧлеглерні чыыр пӧгіннең рейдтер иртірчелер. Республикада чал ахчазын тӧлирінӌе алымнар 4,9 миллион салковайға тиңнелче, андағ алымнығ пис предприятие саналча. Алымнарны чабар тоғыс апарылча, іди Харатастағы 2 № котельнайның 10 тоғынӌызына чал ахчазынӌа алым полған, амды пу сан пір кізее хызырылған.
Министр чооғын тоосханда, таныхталған читпестерӌе хайдағ тоғыс толдырылчатханнаңар муниципалитеттер пастары сан пиріс тутханнар. Іди постарының объекттерінде хайдағ тоғыс апарылчатханнаңар искіргеннер Сорығның, Асхыс, Боград, Шира аймахтарының устағӌылары.
Хакасияның пазы, сан пирістер истіп, республикада, пӱкӱлее алза, улуғ читпестер чоғылын таныхтаан, ідӧк алынӌа устағӌыларға кирек чахығлар пирген.
- Прайзының алнында пӧгін турғызыл парған, амды тоғынарға ла халча. Алынҷа хайығ айландырыңар коммунальнай полызығларнаң тузаланған ӱчӱн алымнарны чыырына. Аны соона чылдырарға чарабас, - теен Валентин Коновалов.
Автор :
Николай СУЛТРЕКОВ
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде