«ЧУЛЫӋАХ» ПАЗА «ХАРА СУУӋАХ» АЛАЙ ХАЙДИ ПӰДІРІЛЧЕЛЕР ОЛҒАН САДТАРЫ
18.02.2020
Хабарлар
Азых ізіктер кӱні. Мындағ чӧрім 16 февральда республиканың ӧӧн городында паза аймахтарында ирткен
Аның тӧстегҷізі Хакасияның ӱгредіг паза наука министерствозы полча. Ӧӧн пӧгін - 2019 чылда «Демография» паза «Ӱгредіг» национальнай проекттер хоостыра пӱдірілген объекттерні чуртағҷыларға кӧзідері. Таныхтирға кирек, оларға хорадылған ахчаның 91-99 %-і федеральнай бюджеттең пирілген, пасхазын регион паза муниципалитеттер хосханнар.
- Пылтыр пу проекттер хоостыра пӱдіріглер сынап асхынах полбааннар. Ағбанда 1000 ӱгренӌее кӧрілген лицей тимге сых парған. Ідӧк Хакасияның ӧӧн городында ӱс чӱзер олғанға, ол санда сигізонар орын ӱс часха читкелектерге, кӧрілген ӱс олған сады пӱт парған - «Филиппок», «Дашенька» паза «Феденька». Алтай аймаанда ӱс часха читкелек палаҷахтарға ікі олған сады пӱдірілген: «Теремок» - Хубачарда, «Тигір хуры» - Кӧк хайа аалда. Пии аймаандағы Табат аалда паза Таштып аймаандағы Арбыт аалда 45 палаа олған садтары тимге сығарыл парғаннар, - чарытхан Хакасияның ӱгредіг паза наука министрі Лариса Гимазутина.
Пу кӱнде ол Ӧӧркі Чӧптің культураҷа, ӱгредігҷе паза наукаха комитедінің кнезі Оксана Разваринанаң паза конституция законодательствозынҷа паза хазна пӱдіріглерінҷе комитедінің депутады Ольга Ширковецнең хада Асхыс аймаандағы объекттерде ирткен чӧрімде араласхан. Аалҷыларны пылтыр пӱдірілген олған садтарынҷа аймах пазы Абрек Челтыгмашев паза аның орынҷызы Галина Новикова ал чӧргеннер.
- Пістің аймахта «Демография» нацпроект чуртасха чахсы кирілче тіп санапчам. Пылтыр Асхыста 120 палаа кӧрілген олған сады пӱдіріл парған. Аймах кініндегі «Чахайах» декабрь айдаң сығара тоғынча. Олох «Хакас-ивол-Строй» пӱдіріг пірігізі амды Катанов аалда олған садын тимге сығар салды. Аның ӱчӱн улуғ алғыс Хакасияның ӱгредіг паза наука министерствозына паза пӱдіріг пірігізінің устағҷызы Иван Валиевке, - теен Абрек Васильевич.
Катанов аалдағы олған садынаңар чоохтаза, ол 45 палаа кӧріл парған. Орных парған ӱс хадыллығ наа школадаң тоғыр. Иргізӧк чіли, ол узунға пӱдіріл парған. Тӧрзер иртіп, сол саринзар парза, 22 палаа узуҷаң пӧлік. Орғаннар, тӧзек-частых нап-наалар.
- Ол ортын группадағы оолах-хызыҷахтарның пӧлии полар. Улуғ группадағыларның узуҷаң пӧлии тураның пір пазында. Сырай-хол чуунҷаң, тасхын чӧрӌең орыннарда кирек ниме-ноолар ідӧк прай наазынаң турғызылғаннар. Паза ас-тамах тимнеҷеңнерге наа тиріглернең тоғынарға оой полар, - улуғ ӧрініснең чоохтап пирген «Чулыҷах» олған садының устағҷызы Надежда Аданакова.
Че Катановтағы палалар пу наа олған садынзар кіргелектер. Сағам, аны прай закон хоостыра тоғындырыбызар ӱчӱн, кирек пічіктер тимнелчелер! Аалдағылар аның азыларын чидікпин сағыпчалар. Уламох наа учреждениені пос хараанаң кӧріп алған соонда.
- Минің улуғ палаларым школада ӱгренчелер. Кічии «Чулыҷах» олған садынзар ортын группазар чӧрче. Ағырыбызып, наа садикті кӧрерге кил полбаан. Пӱӱн аның орнына мин ӧрінчем. Улуғ, чарых паза чылығ олған сады тың чӧпсіндірче, - ӱлескен Катанов аалның чуртағҷызы Ольга Кузургашева.
Чоохтирға кирек, Катановтағы ирткен чӱс чылдағы 1950 чылларда пӱдірілген олған садынзар кічіг частығ иркеҷектерін ідӧк Хамыстығ станцияда чурттығ чиит іҷе-пабалар ағылчалар. Олар наа олған сады азыларын тың сахтапчалар.
Паза ирткен чылда «Демография» нацпроект хоостыра Асхыс аалда «Хара сууҷах» олған садына хоза школа алнындағы оолах-хызыҷахтарның группазына орын тимнелген. Хайди чарытхан Асхыс аймааның пазы Абрек Челтыгмашев, андағ чӧптезіг Хакасияның ӱгредіг паза наука министерствозынаң хада иділген.
- Іди «Изелчеткен чурт» программа хоостыра пӱдірілген турада пір саңай ӱс квартираны садызып алғабыс. Оларда кізі чуртабинчатхан. Анаң анда 6-7 частығлар группазы пӧлиине килістіре тыхтағ тоғыстары иділгеннер. Амды анда 25 палаа узуҷаң пӧлік пар, уроктар иртірҷең орын улуғ. Ідӧк хол-сырайларын чуунҷаң пӧлік кӧріл парған, - теен Абрек Васильевич.
Хайди алнында чоохталған, пу пір группаа ла кӧрілген пӧлік Асхыста илееде чыллар тоғын париған «Хара сууҷах» олған садының пӧлии полар. Аннаңар палаларға ізіг чиисті аннаңох ағыл турарлар. Ӱс воспитатель аннаңох сығара тоғынар. Сағам ол ідӧк кирек пічіктер тимнелгелектеңер азылғалах.
- Пӱӱл дее Асхыс аймаанда кічіг частығларға наа учреждениелер тимге сых парары кӧрілче. Пилтір аалда 120 палаа олған сады пӱдірілче, Асхыс поселокта - 80 палаа, - искірген аймах пазы.
Автор :
Александра КАРАМЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде