АРТЫХТАРНЫҢ АРТЫХТАРЫ ТАБЫЛДЫ
18.02.2020
Хабарлар
«Чиит устар» марығ. 14 февральда Хакас хаза университедінің улуғ залында WorldSkills стандарттарынҷа иртірілчеткен «Чиит устар» марығның чиңісчілеріне сыйыхтар читірілген
Марығ пайрамни чабыларына чон кӧп чыылысхан. Залда одырҷаң пос орыннар чох полған. Прайзы даа, сценадаң харах албин, чиңісчілернің аттарын искірерін чидікпин сахтаан.
Тус читкенде, сценазар ведущайлар сыхханнар. Олар, пайрамнығ иирні азып, Хакасияның ӱгредіг паза наука министрі Лариса Гимазутинаа сӧс пиргеннер.
- Чемпионат араласчыларына улуғ алғызым читірчем. Тӧрт кӱн марығның аймах площадкаларында істеніс ӱлӱкӱні полған. Пӱӱн министерствода чыылығ иртіргенде, марығның полған на араласчызына ахчалығ сыйых читірердеңер чарадығ алылған, - искірген ӱгредіг министрі.
Анаң, сценазар сығып, чоох тутхан Хакасия Ӧӧркі Чӧбінің культураҷа, ӱгредігде паза наукаҷа комитедінің кнезі Оксана Разварина. Ол чииттерні марығ пістің республикада тӧртінді хати тӱзімніг ирт парғанынаң алғыстаан паза студенттер марыға чахсы тимнен килтірлер тіп таныхтаан.
Чоох тутхан соонаң Лариса Гимазутина паза Оксана Разварина чиңісчілерге дипломнар паза Аарластығ пічіктер читіргеннер. Пӱӱл 70-ға чағын чиңісчі дипломнар паза сыйыхтар алған.
«Хуруғ пӱдіріг паза чағары» кӧстегде сыйыхтығ орыннарға турысханнар: I орын - Юлия Щукина (Ағбандағы тағ-пӱдіріг техникумы); II орын - Закир Кичеев (Асхыстағы 18 № профессиональнай училище); III орын - Дмитрий Ваулин (Харатастағы тағ-пӱдіріг техникумы).
Чоохтирға кирек, Закир Кичеев ирткен чылда «Чиит устар» марығда ідӧк ікінҷі орынға турысхан. Ӱгретчілері аның чидіглерінең поғдархапчалар. Закирнің ікінҷі чылы сыйыхтығ орынға турысханы ол чахсы кӧзідім полча тіп таныхтапчалар олар.
«Мода технологиялары. Юниорлар» кӧстегде сыйыхтығ орынға турысханнар: I орын - Ксения Ежова (Ағбандағы 3 № школа); II орын - Екатерина Мамышева (Ағбандағы 30 № школа); III орын - Виктория Сарама (Харатастағы 20 № школа).
«Маляр тоғыстары» кӧстегде чиңіс тутханнар: I орын - Анна Прамаренко (Ағбандағы пӱдіріг техникумы); I орын - Анастасия Александрова (Харатастағы тағ-пӱдіріг техникумы); III орын - Анастасия Кызынгашева (Таштыптағы 16 № профессиональнай училище); III орын - Иван Дудкин (Саяногорсктағы политехническай техникум).
«Сас хырыхчаң ус» кӧстегде артыхтарның артыхтары полыбысханнар: I орын - Анастасия Аева (Профессиональнай технологиялар, экономика паза сервис колледжі); II орын - Юлия Лемяскина (Профессиональнай технологиялар, экономика паза сервис колледжі); II орын - Алёна Шугурова (Харатастағы тағ-пӱдіріг техникумы).
Анастасия Аева профессиональнай технологиялар, экономика паза сервис колледжінде 4-ҷі курста ӱгренче. Тӱрчедең ол, ӱгренізін тоозып, істеніс чолын пастир. Чайаачы тоғыс аның кӧңніне кірче. Ол кічігдеңӧк сығара сас хырыхчаң ус поларға сағынтыр.
Таныхтирға кирек, «Чиит устар» марығда Анастасия ікінҷі хати араласча. Ирткен чылда ол II орынны холға кирген. !дӧк ол 2019 чылда декабрьда Хызылчарда WorldSkills стандарттарынча иртірілген чемпионатта араласхан. Че пістіңнер анда, марығда араласпин, аалды полып устарын сынааннар. Анастасияның тоғыстарын анда пӧзік паалааннар. Аннаңар ол пӱӱл, чемпионатта аралазып, хатабох узын сынап кӧрерге чаратхан. Ол марыға азынадох тимненген. Че пастағы орынны утып аларына ізенмеен. Піснең чоохтазып алған соонаң, хыс, іде-пабазына сығдырадып, оларға ӧріністіг хабар искірген.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде