ПӀҶӀ ПИЛТІРІНДЕ - НАА ФЕЛЬДШЕР ПУНКТЫ
26.02.2020
Хабарлар
«Хазых хайраллиры» нацпроект. Ағбан пилтірі аймаандағы Піӌі пилтірі аалда наа фельдшер пункты пайрамни азылған. Наа пӱдіріг «Хазых хайраллиры» нацпроектче апарылған
АҒБАН ПИЛТІРІ АЙМААНДАҒЫ ПІҶІ ПИЛТІРІ ААЛДА ИРТКЕН НЕДЕЛЯДА НАА ФЕЛЬДШЕР ПУНКТЫ ТОҒЫНЫП ПАСТАДЫ. НАА ИМНЕГ УЧРЕЖДЕНИЕЗІН ПАЙРАМНАП АЗАР ӰЧӰН ПУ ААЛЗАР КИЛ ПАРҒАН ХАКАСИЯ ПАЗЫ ВАЛЕНТИН КОНОВАЛОВ. ІДӦК АНДА АРАЛАСХАННАР ХАКАСИЯНЫҢ ХАЗЫХ ХАЙРАЛЛАҶАҢ МИНИСТРІ ВЛАДИМИР КОСТЮШ, АҒБАН ПИЛТІРІ ПАЗЫ ЕЛЕНА ЕГОРОВА ПАЗА ПУ АЙМАХТЫҢ ӦӦН ИМНЕГ ТУРАЗЫНЫҢ ӦӦН ИМҢІЗІ ЕКАТЕРИНА ТРЕФИЛОВА. ОЛАРҒА ТАНЫҒЛЫҒ КӰНДЕ ХЫЗЫЛ ЛЕНТАНЫ ХЫПЛИРҒА ӰЛӰС ТӰСКЕН.
Валентин Коновалов, Піӌі пилтірінің чуртағӌыларын наа фельдшер пункты азылғанынаң алғыстап, таныхтаан:
- Пӱӱнгі кӱнде республиканың правительствозы паза федеральнай ӱлгӱлер пастағы имнег полызиин пирҷең системаның реформазын иртірерінӌе тоғыс апарчалар. Ізенербіс, пу чағынғы чылларда хазых хайраллаҷаң система чахсы саринзар алыс парар.
Владимир Костюш, алғыстас сӧстеріне хозылып, Ағбан пилтірі аймаа наа имнег учреждениелері азылчатхан кирек хоостыра республикада сағам иң алнында хаалапча теен. Кӧзідімге, 2019 чылда Райковтар аалында наа имнег амбулаториязы азылған, амды, наа фельдшер пунктын азып, Піӌі пилтірі аал чуртағӌыларын ӧріндірчелер. Пӱӱл пір имнег амбулаториязы Зелёнай аалда азылар. Ідӧк пу чыл наа фельдшер пункты Орджоникидзе аймаандағы Хуйулығ хайа аалда пӱдіріл парар. Пу имнег учреждениелері «Хазых хайраллиры» нацпроектче «Пастағы имнег-санитарнай полызығның тилізі» регион проектінӌе пӱдірілчелер. Министр піӌі пилтіріндегілерні пір саңай ікі ӱлӱкӱннең алғыстаан: фельдшер пункты азылғанынаң паза Ада чир-суу арачылағӌызы кӱнінең.
Аал чуртағӌыларынаң ӧрінізінең ӱлезіп, аймах пазы Елена Егорова теен: «Піс пу танығлығ кӱнні чидікпин сахтаабыс». Ол піди нацпроектче республикада улуғ тоғыс апарылчатхан ӱчӱн алғызын читірген республика правительствозына, хазых хайраллаӌаң министерстваа. Ідӧк ол аймахтағы ӧӧн имнег туразының устағӌызы Екатерина Трефилованы махтаан, имнег амбулаториязын алай фельдшер пунктын пӱдірердеңер сурығны кічезіп пӧкче теен. Піӌі пилтірінде хаӌан-да фельдшер-акушер пункты пар полтыр. Ол иргі турада орныххан. Анаң школа кабинедінзер кӧзірілтір. Че соонаң, ол чох иділгенде, аалдағыларға имнег полызии Московскай аалдағы имнег учреждениезінде пиріл сыххан. Піӌі пилтірі Московскай аал чӧбіне кірче, ол ӧӧн аалдаң 25 км оортахта орныхча. Паза піӌі пилтіріндегілерге имнег полызии иблерінде пирілӌең. Московскай аалдаң фельдшер пеер неделяда ікі хати кил турӌаң, ағырчатхан кізілерні иблеп чӧріп имнеӌең. Аннаң пасха, кӧс чӧрӌең мобильнай комплекс тоғынӌаң, ол Московскайзар чиде салза, пеер піӌі пилтіріндегілерні диспансеризация иртерге ӧнетін транспорттығ тарт чӧрӌеңнер. Іди хазиин сыныхтанарға, имненерге ырах чӧрерге оой нимес. Пу ӧӧн сылтағ полған Піӌі пилтірінде наа фельдшер пунктын пӱдіреріне. Ағаа хоза, пеер тынанарға килчеткеннернің, дачанаң айғасчатханнарның саны ӧс сыхханда, 2019 чылда наа пӱдірігдеңер чарадығ алылған. Пӱдіріге улии 0,1 гектар чир участогы пылтыр июньда пирілген.
Модуль конструкцияларынаң пӱдірілген фельдшер пунктының хыры ноған ӧңніг тимір листнең чабылған, тура тасты - сарығ ӧңніг. Тура тӧзі ідӧк от кӧк ӧңнең сіліглелген. Аалӌылар наа тураның иркінін алтааннарында, анда оларға экскурсияны Екатерина Трефилова иртірген. Пастыхтар анда кабинеттерні, наа имнег оборудованиезін прай пос хараанаң кӧріп алғаннар.
Наа фельдшер пунктында амды пастағы имнег полызии «Имнег кирее» профильӌе пирілер. Анда нинӌе-де кабинет пар: процедурнай, прививкалар турғысчаң, улуғларнаң паза кічіглернең тоғыс апарӌаң алынӌа кабинеттер, персоналға кӧрілген пӧлік, санузел паза пасха даа пӧліктер. Пеер наа оборудование алылған. Ол санда - электрокардиограф, электродтығ кардиостимулятор, ИВЛ аппарады (ӧкпелерге арған вентиляция итчең аппарат), электроннай весы, кічіглернің кӧдірімін сыныхтаӌаң весы, тонометр, ханның синін сыныхтаӌаң глюкометр, кислород ингаляторы, кізі сынын синеӌең оборудование, компьютер техниказы. Паза анда аптека тоғынар, хайзында чуртағӌыларға имнер рецепт чох садылар. Диспансеризацияны аалдағылар амды орындох иртерлер.
Пу фельдшер пунктының пӱдіриине 4 миллион 649 муң салковай хорадылған, ол санда - регион бюджедінең 760 муң азыра салковай. Анда ам имнег полызии аалдағы 120 чуртағӌаа пирілер, ол санда - 20 палаа. Че пеер Московскай аалдағы имнег амбулаториязының тоғынӌылары кил турарлар. Сағам аалда сыбыра тоғынӌаң фельдшер чоғыл. Московскай аалдаң фельдшер неделяда ікі хати кил турар: вторникте паза пятницада. Паза пеер айда ікі хати имӌі кил парар. Іди чуртағӌыларның хазиин тиксі практика имӌізі Людмила Ахпашева сыныхтир.
Имнег тоғынӌылары наа турада тоғын сыхханнарына ӧрінчелер. Тура электричество кӱзінең чылыдылча. Наа оборудование полызиинаң, тізең, тоғынарға ниик полар. Олар паза чуртағӌылар даа ізенчелер, Піӌі пилтірінзер сыбыра тоғынӌаң фельдшер хаӌан-полза килер, неке.
Автор :
Инора БОРГОЯКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде