ХАКАС ТІЛІН МАТЛАМА ПІЛЧЕТКЕН ӰГРЕНҶІЛЕР ЧЫЫЛЫСХАННАР
26.02.2020
Хабарлар
Олимпиада. Пос тілінің чоннар аразындағы кӱнінде, 21 февральда, Хакас национальнай гимназияда М.И.Боргояковтың адынаң хакас тілінҷе паза литературазынҷа олимпиаданың халғанҷы чардығы азылған.
Олимпиадада Хакасияның 18 школазының 9 - 11 класстарның 57 ӱгренҷізі араласхан. Олар Асхыс, Пии, Таштып, Шира аймахтарынаң паза Ағбан городтаң чыылысханнар. Ӱгренҷілерні гимназияның директоры Марина Сагатаева чылығ сӧстернең удурлаан.
- Республика синінде иртчеткен олимпиада араласчылары марығның халғанҷы чардығына килгеніне ӧрінчем, - теен Марина Николаевна. - Сірер, школа паза муниципальнай синнерде ирткен олимпиадаларны тобырып, чиңісчі полчазар. Мында хакас тілін матлама пілчеткен олғаннар чыылысты. Республика мариин ідӧк махтағлығ иртібізіңер!
Хакасияның ӱгредіг паза наука министерствозының национальнай ӱгредіг пӧлиинің устағҷызы Ольга Доможакова ідӧк чарғы-чахығ пирерге ӱгренҷілер алнынзар сыххан. Аның таниинаң, олимпиада чӧрімі чахсы тиліпче, ирткен чылда халғанҷы чардыхта 43 пала араласхан, пӱӱл, тізең, 57.
- Ӱгренҷілер, сірер пістің таңдағызы полчазар, - чооғында таныхтаан Ольга Васильевна. - ГИА-ға хакас тілін таллап алыңар. Хакас хазна университедінзер ӱгренерге кірчетсе, олимпиадаларның дипломнары хоза баллар пирчелер. Университетті тоозып, школаларзар, олған садтарынзар, науканаң айғасчатхан институтсар айланып, пістің тілні мыннаң мындар тилідерге, хайраллирға, пӧзік синде тударға полызарзар.
Хакасияның ӱгредігні тилітчең паза квалификацияны кӧдірҷең институттың хакас тіліне ӱгретчең оңдайлар кінінің устағҷызы, олимпиада комиссиязының кнезі Надежда Толмачёва олғаннарны сыныхтағлығ тоғыстардаң чочыбасха, сизіктіг поларға, прай ибіре чахсы сағынарға, маңзырабасха алғаан. Анаң прайзы кабинеттерҷе тарасхлаан. Ӱгренҷілер тоғысты ӱс час пасханнар.
Хакас тілінҷе олимпиада пасталар алнында мин ікі араласчынаң чоохтазарға маңнанғам. Виктория Чебодаева Таштып аймаандағы Ибігдегі школада 9-ҷы класста ӱгренче. Ол республика синіндегі марығда пастағызын на араласча. Хакас тілінең саңай «5»-ке ӱгренче одыр. Александра Жукова Шира аймаандағы Азах Сӧӧт аалдағы школада ідӧк 9-ҷы класста ӱгренче. Олимпиадаа ол іҷезі Валентина Степановнанаң хада килген. Александра хакас тілінең чоохтаспинча, че грамматиканы чахсы пілче, аймах синіндегі марығда чиңісчі полыбысхан.
Асхыс аймаандағы ӱгренҷілерні Асхыстағы лицейнің хакас тілі паза литература ӱгретчізі Лидия Семёновна Сафьянова ӱдес килген. Ол прай 17 пала ағылған. Олғаннар Калинин, Пуланнығ кӧл, Ис пилтірі, Пилтір, Полтах, Ӱс чул паза Асхыс ааллардағы школаларда ӱгренчелер.
Таныхтирға кирек, 28 февральда республика синінде хакас литературазынҷа олимпиада иртер.
Автор :
Татьяна ТЮТЮБЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы