ДРАМА ТЕАТРЫ ТУЗАЛАНЫСХА ТУЗЫНДА КИРІЛЕР
03.03.2020
Хабарлар
Культура. Ирткен неделяда хабарӌыларға драма театрында тыхтағ тоғыстары хайди парчатханын кӧзіткеннер
Культура учреждениезінде тыхтағ тоғыстары 2018 чылда пасталған. Андада фойе, кірлес нааҷылалған. Ам пӱдірігҷілер театрның производство цехтарында, улуғ паза кічіг залларында хайынчалар.
Тыхтағ тоғыстары ӱчӱн Хакасияның пӱдіріг паза коммунальнай хоных министерствозы нандырча. Министр Сергей Новиковтың кӱстенізінең ведомство, хабарҷыларны ай сай чыып, театрда парчатхан тоғыстардаңар чонға толдыразынаң искірерге кӱстенче. Январьда хабарҷыларға улуғ зал кӧзіділген полза, 27 февральда СМИ-лар тоғынҷыларын производство цехтарынзар апарғаннар. Анда тыхтағ тоғыстары 2019 чылның октябрьында пасталғаннар. Хакасияның тиксі тыхтағ тоғыстары устаанының директоры Александр Ткаченконың таниинаң, производство цехтарында прай инженер тоғыстары иділ парған, стенелер 90 %-ке чағылых, потолоктар тимде, оларны сырлабызарға ла халды. Декорациялар хайраллалҷаң пӧлікте полға линолеум тӧзелер, коридорда - керамогранит.
Иң чапсых хабар кічіг залнаң палғалыстығ. Проект хоостыра ол олох корпуста, че ікінҷі хадылында орнығар. Кічіг залның улии амды 200 артиинаң квадраттығ метрге тиңнелер, анзы одырчыхтар санын хозарға оңдай пирче. Пу неделядаң пӱдірігҷілер сцена планшедін тӧзирге пастирлар, анаң теес суулас паза чарытхы оборудованиелеріне чидер. Хайди таныхтаан Александр Ткаченко, марттың халғанҷы кӱннерінде драма театрының прай производство цеғы паза кічіг зал тимде поларлар. Апрельде мында ойыннар кӧзіділер бе чоохтирға ам даа ирте, че амғы сезонда кӧрігҷілер театрда пол килерге маңнанарлар тіп ізеніс пар.
Улуғ залдаңар чоохтаза, пір ай аразына илееде тоғыс иділ партыр. Пӱдірігҷілер прай оборудованиені суурыбысханнар, залдаң креслоларны сығарыбысханнар. Че ӧӧн хайығда - сцена. Амды пӱдірігҷілер сцена колосниктерін алыстырарға тимненчелер. Проект хоостыра пу тоғыс кӧрілбеен полтыр. Че эксплуатация службазының суранызынаң пӱдірігҷілер колосниктерні сыныхтабысханда, олар 1978 чылдаң пірдее алыстырылбиндырлар, наа оборудованиее сыдабин, сын парарға даа айабастар тіп салтарлар иділген. Театрда колосниктерге декорациялар хаптырылчалар, ӱстӱндегі оборудование турғызылча. Александр Ткаченко, министр Сергей Новиковха сан пиріс идіп, хоза ахча кирек чоғыл, пу тоғысты пос кӱзібіснең идібізербіс тіп молҷаан. Ідӧк сценада лифттер турғызылар. Залда креслолар саны хозыл парарға кирек. Мының алнында 600 орын полған полза, тыхтағ тоғыстары соонда 650 полар.
Сергей Новиков, хабарҷыларның сурығларына нандырып, драма театрын нааҷылирға оой нимес тіп таныхтаан. Тиктең нимес, аукцион иртіргенде, анда орындағы пӱдіріг компаниялардаң пірдеезі араласпаан. Ӧӧн подрядчик Санкт-Петербургтағы «Театр-техника корпорация» ООО полча. Пу компанияның опыды улуғ, аның кізілері хаҷаннаң театрларда тыхтағ тоғыстарын иртірчелер. 2020 чылда драма театрын нааҷылирына 227 миллион салковай кӧріл парған, ікі ай аразына тоғыстар 29 миллионға иділ парғаннар. Театрға кирек оборудованиені тимнирге заводтарға чахааннар. Аны Хакасиязар октябрьдаң ағыларға пастааннар, халғанҷызын февральның 20 кӱннерінде сцена планшеді килтір. Пӱӱнгі кӱнде объектте 50 кізі істенче, тоғыс 8.00 частаң пасти 20.00 часха теере тынағ кӱннері чох парча.
Чоохтирға кирек, тыхтағ тоғыстары театрның істінде ле нимес, ідӧк тастында парчалар. Июльға теере пӱдірігҷілер театр туразын тастынаң чылығлабызарға паза керамогранитнең чабызарға киректер. График хоостыра прай тоғыстар 2020 чыл тоозылғанҷа иділ парарға киректер, че пӱдірігҷілер драма театрын кӱскӱзін тимге сығарыбызарға пӧгінчелер.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы