ГАЗЕТАДА - ТІЛНІҢ ТИЛІЗІ
04.03.2020
Хабарлар
Калининдегі ортымах школаның ӱгренҷілері директор Наталья ТЮТЮБЕЕВАНАҢ хада (ортызында) аалҷыларны чылығ удурлааннар
Тоғазығ. «Хабар» газетаның ӧмезі Асхыс аймааңдағы Калининдегі ортымах школаның ӱгренҷiлерінең тоғазығ иртірді
Хығырығҷыларнаң палғалыс газета страницаларыңда алай почта пічіктері пастыра ла пӱтпинче. Ағаа ідӧк чахсы хабасча оларнаң тоғазығ иртіргені. Чиит хығырығҷыларнаң палғалысты тыыдар пӧгіннең «Хабар» газетаның ӧӧн редакторы Радион Сунчугашев, культура паза спорт пӧлиинің редакторы Анатолий Султреков паза сайт редакторы Сергей Майнагашев Калининдегі ортымах школаның улуғ класстар ӱгренҷілерінең тоғазығ иртірділер.
Школа иркінін алтаандох, аалҷыларны чон кип-азаан кискен олғаннар хакас тілі паза литература ӱгретчізі Рустам Канзычаковтың устаанынаң сӱттіг ирбен чайынаң сыйлап удурлааннар. Тоғазығ хакас тілі паза литература кабинедінде ирткен. Ағаа удур кабинет ӧнетін тимнелтір. Классха толдыра олған одырчатхан, аалҷылар кіргендӧк, прайзы тура хонған. Чапсых таа. Олғаннарны килген аалҷыларнаң таныстырған школа устағҷызы Наталья Тютюбеева. Ол Калининдегі ортымах ӱгредігліг школанаң 2016 чылдаң устапча.
Тоғазыға тимнелген кӧзідіг полызиинаң олғаннар хакас газетаның тархынынаң, аның тоғынҷыларынаң чағын танысханнар. Чоохтирға кирек, Радион Дмитриевичке, Калининдегі школаны тоосхан кізее, аның пӱӱнгі ӱгренҷілерінең танызарға, чоохтазарға чапсых полған. Итсе, калининдегілер постарынаңар тӧреміл сағба пирчелер: улуғ опыттығ ӱгретчі Рустам Юрьевичтің устаанынан тимнелген олғаннар, аймах-пасха марығларда аралазып, республика синіне тӧреміл сыхчалар паза постарын турыстыра кӧзітчелер.
- Газетада тіл тилізі іле кӧрiнче, - чарытхан олғаннарға ӧӧн редактор. -Республикада хакас тілтең сыхчатхаң паза газета чоғыл, анзынаң «Хабар» уламох аарлығ. Пӱӱнгі кӱңде ол тӧреең тілібісті хайраллирға паза аны тилідерге полысчатхан ӧӧн тиріглернiң пірсі полча. Улуғ алғызым читірчем, хакас тілі паза литература ӱгретчілерiне, олған садтарның воспитательлеріне газетабыстың «Ноға-ноғаҷахтар», «Хола пырғыҷах», «Чиит тус» паза «Таң солбаңы» хоза сығарыстарнаң ӱгредігде тузаланчатханнары ӱчӱн.
Анатолий Егорович, 43 чыл газетада істен салған саблығ писательібіс, чайаачы чолынаңар паза хабарҷының тоғызынаңар чарыда чоохтап пирген. Аның хынчатхан чайаачы тоғыстарының чардығы чоныбыстың ибіркі чирібіссер кӧрізінең, кибір-чозахтарынаң палғалыстығ. Илееде тоғыстар чоныбыстың саблығ оолларының чуртас чолларына чарыдылған, ол санда саблығ кӱресчі Сергей Карамчаковха, писатель, драматург Михаил Кильчичаковха, хоосчы Алексей Ултургашевке паза пасхазына. Халғанҷы тоғыстарының пірсі - «Кӧӧленіс кӧглері». Аның пастағы ікі чардығы хығырығҷыларның кӧңніне уғаа кірген. Писатель, тізең, ӱзінҷі чардығын чарыхха сығарарға тимненче. Анатолий Егорович тілнең палғалысты школа соонаң даа ӱспеске хығырған паза піреезі нинҷе-де чыл пазынаң редакцияда тоғынарына ізенізін читірген.
Чоохтирға кирек, газетада хайдағ даа туста писательлер істенгеннер: Михаил Чебодаев, Моисей Баинов, Николай (Каркей) Нербышев, Олег Шулбаев паза пасхазы. Амғы хабарҷылар аразында сӧс узын тилітчеткеннер парох. Кӧзідімге, Елена Чезыбаева кибелістер чайапча. Аннаңар газетабыс мыннаң мындар хакас писатель-поэттер санын хозарына ізенчебіс.
2015 чылда «Хабар» газета позының сайтын асхан www.Khakaschiry.ru. Ол тустаң сығара аның тоғызынаң устапча Сергей Майнагашев - чоныбыстың паза пір чайаачы оолғы, поэт паза блогер. Ол олғаннарны пір айға хакас тілінең пос чоохтанар иде ӱгрен саларға чӧптеен. Посха ла нимес, тилекейге тӧреен школаны сабландырар пӧгіннең. Кем пілче, піреезі, арса, сынап пу сағыснаң «ағырыбызар» паза аны чуртасха кирерге чарадыбызар?
Тоғазығ уғаа чылығ ирт парған. «Хабар» газетаның тоғыс чорығында араласхан ӧмезі Калининдегі школаның директоры Наталья Тютюбееваа, хакас тілі паза литература ӱгретчізі Рустам Канзычаковха алынҷа алғызын читірче. Пу чағында, тізең, школанын пӱӱнгі чуртазын чарыт пирербіс.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы