СУҒ ТАЗАР, ӦРТ СЫҒЫЗАР ТУСХА ТИМНЕНІС
11.03.2020
Хабарлар
Чыылығ. Хакасияның правительство туразында суғ тазар, ӧрт сығызар тусха тимненіс хайди парчатханына паза чылығ пирҷең тус хайди иртчеткеніне чарыдылған чыылығ ирткен
Чыылығда Хакасияның пазы Валентин Коновалов, аның орынҷызы Ирина Войнова, пӱдіріг паза чурт-коммунальнай хоных министрі Сергей Новиков, МЧС-тың, прокуратураның кізілері, муниципалитеттер пастары араласханнар.
Хакасияның гражданскай оборонаҷа, сағыбаан саайларҷа паза ӧрт сығыспазынҷа управлениенің пастығы Николай Старков республикада суғ чайылар паза ӧрт сығызар тусха тимненіс хайди парчатханнаңар чоохтаан. Аның таниинаң, амғы туста хар синінең кӧп арах, Абаза паза Ағбан городтар хыриндағы Ағбан суғда пустың халыны - 90 сантиметр. Тиксі паалаза, суғ тазарынаң хорғыс чоғыл. Че кинетін тын чылып килзе, хар хайылар, марттың халғанҷы кӱннерінде, апрельде аалларда суғ чайыларынаң хорғыс пар. Хар хайылчатхан туста наңмырлар удаа чаапчатсалар, республиканың тағлығ орыннарында май-июнь айларда суғлар тазарынаң чочыныс пар.
Амғы туста Абаза городта паза Хубачар аал хыринда Ағбан суғда пус тығылыс парар орыннарда чара чачырас иртіреріне тимненіс парча.
Суғ чайылар тусха тимненіс парча. 12 мартта прай муниципальнай пӱдістерде штаб тренировкалары иртер.
Республиканың прай город-аймахтарында ӧрт сығызар тусха тимненіс парча. Хакасияда ӧрт сығызар тусха 354 патруль ӧмезі тӧстелер, хайзында 1398 кізі паза 394 техника полар. Ӧрттер сығыспас ӱчӱн, орындағы пос устаныстарға хазна программазынҷа субсидия кӧріл парған. Аның тиксі сині - 6 млн салковай. Ағаа хоза, ӧрт ӱзірҷеңнернің пос кӧңнінең тоғынчатхан дружиналарына хабазарына 10 млн салковай пирілер.
26 февральда муниципальнай пӱдістер часхы-чайғы тустарда суғ тазарына, ӧрттер сығызарына хайди тимнен салғаннарын паалапчатхан ведомстволар аразындағы комиссия тӧстелген.
- Пӱӱнгі кӱнге Ағбан городты, Алтай паза Ағбан пилтірі аймахтарын сыныхтабысхабыс. Амды Асхыс аймаанзар парарбыс. Пу тоғысты 26 мартха тоос саларға пӧгінчебіс. Муниципальнай пӱдістернің пастарына суғ тазар паза ӧрттер сығызар тусха тимненеріне улуғ хайығ айландырарға паза ведомстволар аразындағы комиссиянаң хада-пірге тоғынарға сурынчам, - теен Николай Старков.
Аның таниинаң, республиканың 39 город-аалы арығлар паза тайғалар хыринда орныхча, аннаңар анда ӧрттер сығыс парарына улуғ хайығ салылча. Пылтыр прай даа ааллар ибіре чирлер тартылған, хар хайыл парза, пу тоғыс иртірілерӧк.
Сергей Новиков Хакасияда чылығ пирҷең тус хайди иртчеткеннеңер чоохтаан. Амғы туста пістің республикада хара тас чыындызы 66 муң тоннаа тиңнелче. Пии аймаандағы Кирбі аалда хара тас 8 кӱнге чидер, Шира аймаандағы Жемчужнай аалда, Тойымда - 8 кӱнге, Сон пилтірі, Тойым паза Шира аалларда - 7 кӱнге, Коммунарда - 6 кӱнге. Пір неделя аразына пӱдіріг паза ЖКХ министерствозының «ізіг линиязынзар» Ағбан паза Харатас чуртағҷыларынаң ікі айланыс кірген. Олар квартираларда чылығ читіре пирілбинчеткеннеңер искіргеннер.
Автор :
Оксана ЧЕЛТЫГМАШЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы