КОНСТИТУЦИЯ АЛЫЗЫҒЛАРЫНАҢ ЧАРАСЧАБЫС
13.03.2020
Хабарлар
Чыылығ. Хакасия правительствозының теестегі чыылиинда Россия Конституциязына алызығлар киреріне хабазардаңар чарадығ алыл парды
Хакасия правительствозының теестегі чыылии аның кнезі Валентин Коноваловтың устаанынаң ирткен. Ӧӧн сурығларның пірсі - Конституцияа алызығлар кирері.
- Алында піс Табығ комиссиязынаң хада ӱн пиреріне тимненіс тоғызын пастирынҷа чыылығ иртіргебіс, - искірген Валентин Олегович. - Піске пу тоғысты иртіреріне чахсы тимнен саларға, ідӧк чуртағҷыларға пос кӧрізін, ӱн пиріп, кӧзідерге киректелчеткенін чахсы чарыт пирерге кирек. Хайығ киректепчеткен ікінҷі сурығ - табығ участоктарында ӱн пирер туста амыр, хорғыс чох оңдайларны тӧстирге.
Чыылығда правительство кізілері ӧӧн алызығларны паза оларның киректелчеткенін чарыт пиргеннер. Хакасияның істеніс паза социальнай арачыланыс министрі Ирина Ахметова пенсияа чыл сай индексация иртірерін паза иң тӧбін чал ахчазын (МРОТ) чуртап парыбызар иң асхынах синнең тиңнестірерін Конституцияда пиктирі хайдағ туза ағыларын чарытхан. Министрнің сӧстерінең, Істеніс Кодексінде халғанҷы алызығлар таныхталған даа полза, чуртаста тоғынминчатхан. Кӧзідімге, Хакасияда 2000 чылда МРОТ 132 салковай полған полза, чуртап парыбызар иң асхынах син - 1406 салковай. 2010 чылда пу ікі кӧзідіг 1,5 хати пасхалалғаннар. Амды хазна МРОТ-ты чуртап парыбызар иң асхынах синнең тӧреміл тиңнестірче. Аннаңар министрнің пір ле чӧп полған: алызығларны киреріне хабазарға.
Андағох чарадыға килгеннер правительство кізілері чарғы паза ӱлгӱ тоғызына алызығлар кирерінче. Чоохтирға кирек, Россия президенті Владимир Путин Федеральнай Чыылығзар айланызында алынҷа алызығларны кирердеңер чӧп ле пирген. Ӧнетін тӧстелген Конституция комиссиязы пу тусха алызығлар кирерінҷе регионнардаң, халых пірігістерінең чӧптерні чыып, Хазна Думазынзар сығарған. Кичеезінде Хазна Думазы алызығларны кирерінҷе закон проектін ӱзінчi хығырығда алыбысхан. Амды регионнардағы закон сығарҷаң ӱлгӱ органнары ағаа пос кӧрізін читірерге киректер.
Хакасияның Табығ комиссиязы алнында нандырығлығ тус: 22 апрельге чахсы тимненіп, Конституцияа кирілчеткен алызығларнаң чарасчатханнаңар ӱн пирізін тӱзімніг иртірібізері. Ӱн пирер оңдайлар пасха табығлар оңдайларынаң пасхалалбас. Ӧӧн кирексініс - ӱн пирерге килген чуртағҷыларның кӧбізі, чарымынаң Александр ЧУМАНИН тиксі Россияда ӱн пирері хайди иртерін чарытча кӧп кізі, алызығларнаң чарасса, олар алыларлар, че табығҷыларның хайдағ проценті килерге кирек - кӧзіділбинче. Ӱн пирерінің ӧӧн хыйғызы: «Пістің хазна, пістің Конституция, пістің чарадиибыс».
- Ӱн пирерін иртіреріне федеральнай кіннең ахча пирілче, - искірген Хакасияның Табығ комиссиязының кнезі Александр Чуманин. - Че искірігліг тоғыс апарарына регионнаң ахчалығ хабазығ киректелер. Азынада сананыстар хоостыра: телевидение пастыра искіріглер тарадарына неделя сай 10 млн салковай, печать изданиелерінде тарадарына - 1,5 млн салковай. Валентин Коновалов пу сурығны алынҷа пӧгерге чаратхан.
Конституцияа алызығлар киреріне хабазарға чаратхан соонаң, чыылығ араласчылары правительствоның ікі чарадиин алыбысханнар. Пастағызы хоостыра 2019 чылның 4-ҷі кварталы паза 2020 чылның 1-ғы кварталы ӱчӱн чурт-коммунальнай хоных предприятиелеріне читіре албаан парыстарын чардыхти айландырарына 300 млн салковай кӧрілген. Ікінҷізі хоостыра республикада топливаа наа паалар турғызылған. Ол пааларға тӧстеніп, чуға чуртапчатхан, льготалығ чуртағҷыларға субсидиялар паза компенсациялар тӧлелче.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы