РЕГИОННАР ПАЛҒАЛЫСТАРЫ ТЫЫДЫЛАР
17.03.2020
Хабарлар
Тоғыс чорығы. Орёл городта ирткен II чоннар аразыңдағы экономика форумында Хакасияның пазы Валентин Коновалов паза Орлов облазының губернаторы Андрей Клычков пірге тоғынардаңар чӧптезігде хол салғаннар
Форумның ӧӧн сурии Россияның амғы чуртас-экономика тилізінің стратегия пӧгіннері полған. Орловтағы форумның тоғызында Хакасияның пазы Валентин Коновалов араласхан.
Форум площадкаларында Россия регионнарының, орындағы пос устаныс органнарының паза халых пірігістерінің кізілері, Хазна Думазының депутаттары, бизнестегілер, ӱгредіг паза наука специалисттері чыылысханнар. Аның тоғызында аймах-пасха сфералардағы эксперттер, чағынғы хазналарның (ол санда Украинаның паза Грузияның) паза Кубаның делегациялары араласханнар.
Тоғазығда регионнарны тилітчең сурығлар ӱзӱрілген, устағдыларның тӱзімніг опыттарынаң удур-тӧдір ӱлесчең оңдай полған.
Валентин Коновалов Хакасияның чуртас-экономика тилізінеңер чоох тутхан. Регион устағҷызы республикада ЖКХ сферазындағы сидіксіністер хайди пӧгілчеткенінеңер, коммунальнай отрасль реформазында программа чуртасха хайди кирілчеткенінеңер, аалларны, туризмні, ортын паза кічіг бизнесті, пасха даа сфераларны тилідерінҷе хайдағ тоғыс апарылчатханынаңар чарыда чоохтап пирген.
Ідӧк Хакасияның пазы пӱӱнгі кӱнде регионның ӱлгӱзі алнында турчатхан пӧгіннерні таныхтап салған. Паза чағынғы туста ол санда республиканың чуртас-экономика стратегиязын толдырары хоостыра чуртасха кирерге киректелчеткен планнарнаң ӱлескен.
Валентин Коновалов чидіглерні ле нимес, че ідӧк ағырсымнығ сурығларны таныхтаан, Хакасия ӱлгӱлері ол сидіксіністерні пӧгерінде хайдағ тоғысты амох идіп пастабысханынаңар чоохтап. Мында республика пазы экология сурығларында паза бюджет суриинда алында тохтаан.
- Оой нимес экономика киреенең, хайзында республика халғанҷы чылларда пол парған, сығып алары ӱр тус паза системалығ тоғыс киректепче. Чидiг пістің чарадығларыбыснаң палғалыстығ полар, хайди піс регионның кӱзінең толдыразынаң тузалан поларбыснаң. Ізестіг чоохтап поларбын: республика правительствозының прай тоғызы пістің чуртағҷыларыбысха туза ағыларына ла кӧстегліг, - таныхтаан чооғында Валентин Коновалов.
Форум тузында Хакасияның пазы Валентин Коновалов паза Орлов облазының губернаторы Андрей Клычков чуртас-экономика, наука-техника паза культура саринаң пірге тоғынардаңар чӧптезігде хол салғаннар. Олар экономиканың ӧӧн отрасльларын, аал хониин тилідерінде опытнаң ӱлес турарға, имнег, культура, ӱгредіг, спорт паза чииттер политиказы сфераларында палғалыстарны тыыдарға, садығ-экономикада, инвестиция паза идінҷектер киреенде пірге тоғынарын тилідерге, пірге проекттерні паза программаларны чуртасха кирерге чӧптес салғаннар.
Форум тоғызы хоостыра аның араласчыларына ідӧк Орлов облазының промышленность предприятиелерінде паза производстволарында пол килер оңдай пирілген.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы