ХУБАЧАРДА - СУҒ ПИРҶЕҢ НАА НАСОС СТАНЦИЯЗЫ
18.03.2020
Хабарлар
«Арығ суғ». Хакасияның пӱдіріг паза чурт-коммунальнай хоных министрі Сергей Новиков пу неделяда тоғыс чорығынаң Хубачарзар чӧрген
АЛТАЙ АЙМААНЫҢ ӦӦН ААЛЫНДА, ХУБАЧАРДА, СУҒ ПИРҶЕҢ НАСОС СТАНЦИЯЗЫНЫҢ ПӰДІРИИ ХЫЫЗЫНДА ПАРЧА. АЛЫНДАҒЫ КӰН ОЛ ПӰДІРІГНІ СЫНЫХТААН РЕСПУБЛИКАНЫҢ ПӰДІРІГ ПАЗА ЧУРТ-КОММУНАЛЬНАЙ ХОНЫХ МИНИСТРІ СЕРГЕЙ НОВИКОВ.
ХУБАЧАРДА СУҒ СЫҒАРҶАҢ УЛУҒ СКВАЖИНА СУҒ ХАЗЫНДАҒЫ ЧИРДЕ, ДАМБАНЫҢ ПЕЕРКІ САРИНДА САБЫЛ ПАРТЫР. ОЛ ТОҒЫС ПЫЛТЫР ИДІЛГЕН. АМ АНДА ААЛЗАР СУҒ ПИРҶЕҢ СТАНЦИЯ ПӰДІРИИН АЙНЫТ ПАРИРЛАР. АНДАР ТАС-САЙДАҢ ПӦЗІК УРЫЛҒАН ЧОЛ САЛЫЛ ПАРҒАН. ААР ТЕХНИКА ПОЛЫЗИИНАҢ ЧИР ТОҒЫСТАРЫН ХЫСХЫДОХ АПАРҒАННАР. ПӰӰЛ ХЫСХЫ ЧЫЛЫҒ ТУР ПИРГЕН. СУҒ СЫҒАРҶАҢ ОРЫНДА ІДӦК ІКІ УЛУҒ РЕЗЕРВУАР ТИМДЕ, ХАЙЗЫНАҢ ӦРТ ӰЗІРҶЕҢНЕР САҒЫБААН СААЙЛАРДА ТУЗАЛАНАРЛАР. АНДАҒ ТИМІР ЦИСТЕРНАЛАРНЫҢ ПОЛҒАНЫНЗАР ЛА 500-ер КУБОМЕТР СУҒ КІРЕР, ТИКСІ - 1000 КУБОМЕТР СУҒ. ОЛ ЦИСТЕРНАЛАР ЧИР АЛТЫНДА ТУРЧАЛАР. ПӰДІРІГҶІЛЕР СЕРГЕЙ НОВИКОВХА ПІР РЕЗЕРВУАРНЫҢ АХСЫН, АЗЫП, КӦЗІТКЕННЕР.
Министр суғ позытчаң пластик трубаларын тоғысчылар хайди хабыстырчатханын кӧріп алған. Хайди чоохтааннар, тӱрчедең аалзар пу орыннаң суғ пирҷең системаның трубаларын салып пастирлар. Аның узуны 2,5 километрге тиңнелер. Че олох туста ӧрт ӱзірҷең 50 гидрант турғызылар, ол резервче трубалар 5 километр узунға салыларлар.
Хубачарда иргі скважина аал аразында орныхча, ол 1960 - 1970 чыллардаң сығара тузаланыста. Ол 30 метр тирең сабылтыр, наа скважина — 110 метрге. Аал илееде улуғ пол парыбысханда, иргі скважинадағы суғ санитарнай нормативтерге киліспин сыххан, аннаң тузаланарға чарадылбинчаттыр. Ам наа суғ станциязы пӱдіріл парза, иргізі чабыл парар.
Насос станциязының туразы читіре турғызылғалах. Анда оператор пӧлии полар, хайзында тоғыс амғы оборудование полызиинаң апарылар. Ідӧк мастерской паза операторға тынанҷан пӧліктер кӧріл парған. Автоматика оборудованиезінең пір ле оператор тоғынарға сыданар. Ісчең суғ анда ультрафиолет лампалары паза механика полызиинаң арығлалар.
Сергей Новиков, ол-пу тоғыстар хайди толдырылчатханын кӧріп алғанда, чӧпсініп, таныхтаан:
- Пӱдіріг кӧрілген график хоостыра апарылча. Пылтыр пу пӱдірігде улуғ нимес сидіксіністер полған. Андада пӱдірігнең Хызылчардағы компания айғасхан. Іди подрядчикті алыстырарға киліс парған. Амды мында Хакасиядағы пӱдірігҷілер тоғынчалар, кирек саңай чахсы саринзар алысхан. Аннаң андар ідӧк маңат тоғынзалар, прай пӱдіріг тоғыстары пу чыл сентябрьда толдырыл парарлар.
Аның чооғынаң, пӱдіріг «Арығ суғ» федеральнай программаҷа апарылча. Пӱдіріге 70 миллион азыра салковай позыдылған. Аның ӧӧн чардығы - 98 проценті - федеральнай бюджеттең пирілген, ікі проценті - республика паза муниципалитет бюджеттерінең. Чоохтирға кирек, республика хазна программазына кіріп алған сылтаанда, регионға суғ суриин пӧгеріне тиксі 1 миллиард 200 миллион салковай кӧріл партыр. Аның полызиинаң Хакасияда пу чағынғы 5 чылға суғ пирчең, арығлачаң 18 объект пӱдіріл парарға кирек. Хубачардағы насос станциязы - сағам андағ пастағы пӱдіріг. Анаң Харатастаң сығара Пригорск поселокка теере суғ пирҷең система пӱдіриин пастирлар. Суғ арығлаҷаң наа системаны Жемчужнай поселокта пӱдірерлер.
Хубачардағы пӱдірігнің ӧӧн подрядчигі «Спецстроймонтаж» ООО полча. Аның директоры Андрей Нестеренко теен:
- Пістің тоғызыбыс мыннаң мындар піди ле чахсы парза, суғ аалдағыларға наа скважинадаң пӱӱл июль-август айлардох пиріл сығар. Кӱскӱде пу наа пӱдірігнің ибіркізі прай иптел парар. Андағ тоғыстарны піс проект хоостыра хайди даа толдыр саларға кирекпіс. Станция туразы ибіре асфальт тӧзелер. Мында палғас полбасха кирек, арығ чирҷе чӧр турарлар. Пеер кір тазыбас ӱчӱн, асфальт тӧзелер. Ісчең суғлығ орын арығ поларга кирек.
Хубачар аал чӧбі пазы Александр Мин Те Хо министрге мындағ сағыссыразын искірген: суғ трубалары салыл сыхса, аалның орамаларында аар техника тоғынар. Че орамалар хызым. Паза андағы чоллар аар техника сылтаанда оймахтығ пол сығарға айабас. Аалдағыларның суғ сурии хазна программазы полызиинаң пӧгіл парарына тың ӧрінче. Пӱдірігҷілерні, тізең, маңат тоғынчатхан ӱчӱн махтапча.
Автор :
Инора БОРГОЯКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы