БЮДЖЕТТЕРІН АЛАРҒА ЧӦП ПИРІЛГЕН
18.03.2020
Хабарлар
Ағырсымнығ сурығ. Хакасия правительствозында Асхыс аймаа бюджедін албааны хайдағ салтарларға ағыларға айабазын ӱзӱргеннер
Республика пазы Асхыс аймаа устағҷызынаң паза аймахтың депутаттар чӧбі кнезінең хада чыылығ иртірген. Тоғазығның ӧӧн сурии - Асхыс аймаа бюджедін албаанының салтарлары.
Аймахтың депутаттар чӧбі ирткен чыл тоозылчатханда муниципальнай бюджетті аларынаң тоғыр ӱн пирген. Андағох кирек Шира аймаанда пол парған.
Хакасияның финанстар министерствозы муниципалитеттерге пу кирек хоостыра ахча саринаң чахсы нимес салтарлар пол парарға айабастаңар пір ле хати нимес сизіндірігліг пічіктер ысхан, че ікі аймахтың бюджеттері амғаа теере алылбаан. Россия Федерациязының Бюджет кодексінің 2 чардығының 190 статьязы хоостыра, тізең, бюджеттеңер закон чыл пасталғанынаң ӱс ай пазынаң кӱзіне кірбеен полза, финанс органының бюджет обязательстволарының лимиттерін, бюджет ассигнованиелерін. Тоғазығ тузында юридическай лицоларға паза физическай кізілерге позыдар правозы чоғыл.
Андағ оңдайнаң, нацпроекттерні чуртасха кирері хорғыста пол парған. Асхыс аймаанда, тізең, ікі олған садының (Асхыс поселокта паза Пилтір аалда) пӱдірии хыызында парча. Шира аймаанда Наа чир аалда школа паза Ширада Иткӧл микрорайонында олған сады пӱдірілче. Анзынаң пасха, муниципальнай бюджеттең чал ахчазы тӧлелбин сығарынаң хорғыс пар.
- Асхыс паза Шира аймахтарының устағ-пастаа піди тудынғанынаң чуртағҷыларның чахсы чуртазына, национальнай проекттерні чуртасха киреріне хорғыс ағылча, аймахтарның тилир оңдайын чох итче. Аймахтарның ӱлгӱлері чуртағҷыларның кирексіністерін санға алып тоғынарға паза пос бюджеттерін алыбызарға киректер тіп санапчам, - таныхтаан Валентин Коновалов.
Республика правительствозы регионға хоза ахчалығ полызығ пирер сурығҷа федеральнай кіннең тоғынарын узаратча. Таныхтирға кирек, Хакасия ӱлгӱлері сыххан пастағ хоостыра Россияның казначействозы республикада сыныхтағ иртірче. Федеральнай ведомствоның специалисттері, регионның министерстволарында тоғынып, кредит алымнарын паза республика бюджеді хайди толдырылчатханын сыныхтапчалар. Ідӧк Асхыс аймаанда аудит иртірілче. Сыныхтағның салтарлары аймах бюджеді хайди толдырылчатханын паза ноға ахча чидіспинчеткенін кӧзіт пирер.
Сыныхтағ гоозылза, Россияның финанстар министерствозы аның салтарларынҷа республикаа хоза ахчалығ полызығ пирердеңер чарадығ алар.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы