АЧЫХ-ЧАРЫХ ОЛҒАН ТУЗЫН ТЕЕЛБЕКТЕР СЫЙЛАПЧАЛАР
18.03.2020
Хабарлар
Культура. С.П.Кадышевтің адынаң культура кініндегі «Айас» олғаннарның теелбектер студиязының теестегі ойыны ирткен
Хакасия культуразының саблығ тоғынҷызы Фаина Киштеева паза хореограф-балетмейстер Марина Мистрикова «Айас» олғаннарның теелбектер студиязынаң устапчалар. Амғы «Кӱлімзірес теерпегі» ойында «Айас» ӧменің олғаннары аймах чоннарның теелбектерінең чон алнынзар сыхханнар.
Кічіглер, ортымах паза улуғ частығлар ӧмелері соон сӱрістіре, пір дее тудығ чох, сценаа сых турғаннар. Пастағызын «Піс Айаспыс» теелбекнең табырах парчатхан кӧг хоостыра хызыҷахтар чалахай иирні асханнар.
Кӧгліг кӧг пастыра шейк теелбекті улуғ частығ олғаннар толдырғаннар. Оларны кӧре, ачых-чарых олған тузы сағысха кірче. Ортымах частығ хызыҷахтар «Турнаҷахтар» амыр теелбекнең сыхханнар. Ах кип-азахтығ олғаннар кеен паза сылағай кӧрінгеннер.
«Аалҷыларны удурлапчатханы», «Потла, потхычах!» ӧӧн хакас теелбектері полчалар. Иң кічіг частығлары, кӧпчектер тудынып, потхы пызырчатхан устар полыбысханнар. Чазағлығ кип-азахтығ олғаннар сценада кірлектенчеткен кӧклӧҷектер чіли кӧрінгеннер. «Эк, пу питугастар» теелбекте «пірсі хызыл, пірсі хара» ікі оолағас солист полчалар.
Ойынның пастағы чардығында хакас теелбектерні толдырғаннар. Анаң пасха хазна чоннарының теелбектерін чыылған чонға кӧріп алар оңдай полған. «Дон Кихот» вариацияларының ӱзігіне тарантелла теелбек кірче. Пу теелбек тиксі тилекейде саблан парған. Индия, Корея, Хыдат, Моол чоннарының теелбектеріне чон ӧкерсінген. Мооллар теелбегін «Айас» студияның солизі Айана Канзычакова уғаа чахсы толдырча. Таныхтирға кирек, теелбектенерге чайалған хызыҷах кічігдең ала пу ӧмезер чӧрче.
«Андижаннарның польказы» узбек чонның теелбегі полча. Табырах парчатхан кӧг хоостыра сценада олғаннар айдас кірлектен чӧрчелер. Олғаннар чайаачызы хоостыра пасха хазналарның культуразынаң танызар оңдай пар.
Тиксі 20 артиинаң теелбек турғызылған. Таныхтирға кирек, С.П.Кадышевтің адынаң культура кінінің улуғ залына чон тығырама чыыл парған. Теелбектенчеткен олғаннарның іҷе-пабалары, аға-ууҷалары ойынны кӧрерге килгеннер. Оларның чӱректерінде палалары ӱчӱн поғдархас тӧріпче полар.
Таныхтирға кирек, пӱӱл, 2020 чылда, «Айас» ӧмее 25 чыл толча. Ирткен тус аразына кӧп пала андар чӧрген. «Айас» теелбектер студиязынзар пӱӱнгі кӱнде 70 олған чӧрче. Амды 28 ноябрьда пайрамнығ ойын иртірілеріне тимненчелер. Пу ӧме, Хакасияны саблап, аймах хазналар марығларына чӧр килче. Оларның санында Турция, Тайвань, Финляндия, Дания паза пасха хазналар. Чалахай иир соонзар іҷе-пабаларға алғыс сӧстері читірілген. Ууҷа Евдокия Егоровна Топоеваның пархазы кічіг частығлар ӧмезінзер теелбектенерге чӧрче. Улуғ сценаа ӱр ниместең сығып пастаан.
Устағҷылар Фаина Киштееваа паза Марина Мистриковаа кӧп порчолар сыйлааннар. Теелбектер иирі «Минің Хакасиям» улуғ ойыннаң тоозылған.
Автор :
Елена САГАТАЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде