СІЛІГ ТОРТТАР ЧАЙИРҒА ӰГРЕНЧЕ
24.03.2020
Хабарлар
Пістің чииттерібіс. Февральда Хакасияның профессиональнай ӱгредіг учреждениелерінің чайаачы студенттері «Чиит устар» марығда араласханнар
Пістің республикада «Халас пызырҷаң ус» кӧстегҷе специалисттерні Харатастағы механика-технология техникумы ла тимнепче. Аннаңар «Чиит устар» марығда ол кӧстег хоостыра кӱстерінең сынаспинчалар. Че оларның студенттері марығ иртчеткен туста ӱгренҷілерге паза студенттерге аймах мастер-класстар тӧреміл иртірчелер. Пӱӱл марығ тузында Харатастағы механика-технология техникумының «Халас пызырҷаң ус» кӧстегҷе иң чахсы ӱгренчеткен студенті Маргарита Кайлачакова мастер-класс иртірген. Чоохтирға кирек, чиит хыс аймах кремнернең паза мастикаларнаң сіліг хоостарны чапчаң чайаан.
Маргарита Харатастағы техникумда ікінҷі курста ӱгренче. Таллап алған профессия хыстың кӧңніне кірче. Школа тоосчатханда, іҷезі ағаа кондитерге ӱгренерге чӧп пиртір. Ӱгретчілернің таниинаң, олар мастер-классты иртірерге Маргаританы тиктең нимес таллап алғаннар. Оларның чооғынаң, аймах торттарны чайирға аның чахсы килісче.
Хыстың чооғынаң, практика тузында ағаа цех істінде аймах іпектер, тадылығ оох халастар хайди тимнелчеткенін кӧріп аларға хынығ паза чапсых полған. Маргаританың ууҷалары хаҷанох ах чарыхтаң парыбысханнар. Аннаңар хыс улуғлары халас пызырчатханын кӧріп аларға оңдай полбаанына хомзынча.
Ікінҷі курстың студенті пір чыл пазынаң техникумны тоозар. Че ол, ӱгренізін мыннаң тохтатпин, пілізін аннаң андар алғыдарға пӧгінче. «Технолог» специальностьча пӧзік ӱгредігні Хызылчарда алай Кемеровта алып аларға чарир. Аннаңар Маргаританың алнында кӧп пӧгін турча.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы