ХОЗА АХЧА КИРЕКТЕЛБЕС
27.03.2020
Хабарлар
Культура. Хакасияның пӱдіріг паза чурт-коммунальнай хоных министрі Сергей Новиков драма театрында тыхтағ тоғыстары хайди парчатханын сыныхтаан
Драма театрының туразы тузаланысха 1978 чылда кирілген. Ол тустаң культура учреждениезіндеі тыхтағ пір дее иртірілбеен. Аннаңар театрда парчатхан реконструкцияны ӱлгӱдегілер улуғ хайығда тутчалар. Министр Сергей Новиков ай сай театрзар сыныхтағнаң чӧрче. Пу кӱннерде ол хатап объектте пол килді.
Сергей Николаевичке пастап ӧӧн сценаны кӧзіткеннер. Анда тыхтағ тоғыстарын Санкт-Петербургтағы «Театр-техника корпорациязы» ООО-ның кізілері апарчалар. Тиксі алза, 12 специалист, прайзы Нева суғ хазында орныхчатхан городтаң килген. Ӧменің устағчызы Альберт Низамутдиновтың таниинаң, кізілер паза пӱдіріг материаллары читкіҷе. Кӧп тус паза кӱс сценаның потолоктағы чардыхтарын сайирына парыбыстыр. Чонда чоохтирға хынадырлар, «одыбызарға сидік нимес», че пӱдірігҷілер ол сағыснаң чараспинчалар. Демонтажты орта иртірібіссе, тыхтағ тоғыстары даа табырах парар. Кӧрігҷілер залынаң креслоларны февральда сығарыбысханнар, амды полны ходырчалар. Анда наа пол тӧзелер.
Производство цеғында орындағы пӱдірігҷілер хайынчалар. Ирткен айда оларның пастығы Евгений Харламов март тоозылғанҷа кічіг зал тимде полар тіп молҷаан. Сынында идер тоғыс ам даа илееде. Итсе-де, потолок тимде, пу неделяда креслолар турғызып пастирлар, неке. Анаң теес сценаа чидер. Хакастарның чоох пар: ізенген тағда киик чох полҷаң. Участок пастығына министрні паза хабарҷыларны алаахтырарға кирек полған ма? Евгений Харламовтың сӧстерін піс газета, телевидение пастыра чонға искіргебіс, амды аннаң хада чӧйге сых парғабыс. Сергей Николаевич пӱдірігҷілернең хатығ чоохтасхан. Андада ілезіне сығыс килген: объектте кізі чидіспинчеттір. Санкт-Петербургтағы специалисттерні санға албаза, тыхтағ тоғыстарын 83 пӱдірігҷі апарча. Амды хоза кізілер тілирлер, аннаң сидіксініс полбасха кирек.
Пасха пӧліктерде стенелерні сырлап пастабыстырлар. Театр тастында тоғыстар апарылчалар. Пӱдірігҷілер тураны тастынаң чылығлабысханнар, амды керамогранитнең чаапчалар.
Хабарҷыларнаң реконструкция хоостыра сағыстарынаң ӱлезіп, Сергей Новиков тоғыстарның графигі кӧмес сайбал парған сылтаанда пӱдірігҷілер 10 - 14 кӱнге соона халчалар теен. Че ол сурығ пӧгіл парар. Ӧӧні - кирек оборудование паза пӱдіріг материаллары толдыразынаң алыл парғаны. Министрнің сағыссыразы пілдістіг. Халғанҷы ай аразына тилекейдегі экономикада сағыбаан алызығлар пол парған. Нефтьтің паазы тӱс парған сылтаанда прай нименің паазы ӧсче. «Хакас чирі» газетаның хабарҷызы реконструкцияа хоза ахча киректелер бе сурғанда, Сергей Николаевич пу улуғ объектті нааҷылирында піске талаан пол парды тіп таныхтаан. Кирек оборудование 2019 чылда алылтыр, халғанҷы чидіспинчеткен пӱдіріг материаллары пӱӱл февральда кіргеннер. Аннаңар ахча хоза киректелбес. Реконструкция тузында иртірілер. Пӱӱл кӱскӱзін нааҷылалған драма театры кӧрігҷілерге ізиин азар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы