ЧУҒЫНӋАХ АҒЫРЫҒНЫ ТАРАТПАС ӰЧӰН
31.03.2020
Хабарлар
Чыылығ. Ирткен неделяда Хакасия пазының орынҷызы Татьяна Курбатова видеоконференц-залда муниципальнай пӱдістер устағ-пастаанаң чыылығ иртірген
Коронавирус чуғынчах ағырығны республикада таратпас ӱчӱн, хатығластар кирілче. Хакасия пазының орынҷызы, республикадағы оперативнай штаб устағҷызының орынҷызы Татьяна Курбатова муниципалитеттер пастарына видео палғалысча ағырығ таратпас ӱчӱн хайдағ тоғыстар иртірерге киректелчеткенін ситкіп истерге, пирілген чӧптерге тудынарға, муниципальнай пӱдістерде оперативнай штабтар тӧстирге чахааан. Пӱӱнгі кӱнде республикада наа чуғынчахнаң ағырчатханнардаңар, хайдағ тоғыстар толдырылчатханнаңар паза ниме идерге пӧгінілчеткеннеңер Хакасияҷа хазнаның ӧӧн санитарнай имҷізі Татьяна Романова чоохтаан:
- Пӱӱнгі кӱнде республикада коронавирус ағырығнаң ағырчатхан ікі кізі ілезіне сығарылған. Олар, пасха хазналарзар тынанарға чӧр киліп, чуғынҷахты хаптырғаннар. Амды имнег туразындалар, оларнаң палғалысхан кізілер ідӧк имҷілернің хайиинда. Амғы туста Хакасияда коронавирус чуғынчах ағырығ тарапчатхан хазналарда пол килген 682 кізі. Оларның санынаң 14 кӱн карантинде полған 58 кізінің ағырбинчатханын имҷілер таныхтааннар, 624 чурғағҷы ам даа карантинде. 27 мартта республиказар 230 кізі, пасха хазналарда тынанып, айланған Амды хырығ озаринаң ай-ланған паза оларнаң палғалыс тутхан
854 кізі ибде одырар. Андағ саннар пістің улуғ нимес республикаа уғаа кӧп.
Пасха хан чирінең килчеткен пістің чир-суғҷыларыбыс прай аймахтарҷа тарапчалар. Аннаңар муниципальнай пӱдістернің устағҷыларына оларны хайығда тударға кирек. Карантинге тудынчатханнарын сыныхтирға.
Піс оларны аэропортта удурлапчабыс, киректелчеғкен пічіктерні таратчабыс. Иблерінде карантинде одырҷаң оңдайлар пар ба, чох па сурастырчабыс. Ибде карантинде одырҷаң оңдайлар чох полза, Харатастағы А.И.Лебедьтің адынаң реабилитация кінінде карантинге 14 кӱнге халарға оңдай пирілче. Аннаңар кізілернің карантинде одырарын хайығда тудары - муниципальнай пӱдістер пастарының, пістің паза полиция тоғынҷыларының ӧӧн пӧгіні.
Харатастағы реабилитация кінінде 27 мартта ікі ле кізі карантинде полған. Тиксі Россияда ағырыға хаптырғаннарның саны табырах ӧсче. Аннаңар Харатастағы имнег туразының хирургия пӧлиинде коронавирусха хаптырған паза пневмониянаң ағырыбысхан кізілерге стационар азылча. Ағаа хоза, 4 апрельге теере республиканың имнег тураларында хоза орыннар тимнел парарлар.
- 30 марттаң республикадағы имнег тураларында план хоостыра пирілчеткен имнег полызии тохтадылар. Амбулаторияларда соона салдырбас паза табырах ла полызығлар пирілер. Ідӧк Хакасия пазынаң кізілерні стационарда чатырарын тохтадарга хабас пирерге сурынарбыс. Чуртасха хорғыс ағылчатхан ағырығлығларны ла чатырарға, - чоохтаан Хакасияның хазых хайраллаҷаң министрі Владимир Костюш.
Россия президентінің указы хоостыра республикада пір неделяа кӧп чон чыылысчатхан орыннар чабылча. Кізілер тынанҷаң орыннар, рестораннар, кафелер, столовайлар паза даа пасха кӧп чон чыылысчатхан орыннарның тоғыстары тохтадылар. Муниципальнай пӱдістернің пастарына Роспотребнадзор пирчеткен чахығларға тудынарға чӧп пирілген. Ідӧк кізілер, пір неделя ибде одырып, кӧп чон чыылысчатхан чирлерзер чӧрбезіннер. Анзын орындағы ӱлгӱлер сыныхтағда тударлар.
Автор :
Наталья ТЮКПЕЕВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы