КИНО СУУРАРЫ - ӦМЕНЕҢ ИДІЛЧЕТКЕН ТОҒЫС
31.03.2020
Хабарлар
Марығ. Пу наада Н.Г.Доможаковтың адынаң национальнай библиотекада «Мобильнайға суурылған» марығның чиңісчілері адалған
Пӱӱл «Алызығлар таны» кинокомпания пастағызын на чиит тӧл аразында хысха хоос фильм суурарынҷа марығ чарлабысхан. Марығда аралазарға пӧгінчеткеннерге хысха фильмні мобильнай телефонға суурарға кирек полған. Пілдістіг, ӱс минута аразына тирең сағыстығ фильм суурып аларға ниик ле нимес пӧгін. Че андағ даа полза, улуғ ӧрініске, марығда узын сынап кӧрерге 13 ӧме чаратхан. 14-35 частығ араласчылар, кино суурып, экран кистіндегі чуртастың чазыттарынаң хынып танысханнар.
Полған на ӧме он кӱн аразына сағыс-кӧрізі хоостыра аймах сурығларға чарыдылған кино суурған. Сизінгенде, араласчылар ӧӧнінде хыныстаңар хысха фильмнер чайаптырлар. Че хай піреезі фильмні Илбек Ада чаа темазына чарыттыр. Ағбандағы ӱгренҷілер чаадаңар «Пиҷе» хысха фильм суур салғаннар. Олғаннар ӱс минута аразына кӧрігҷілерге, хайди чиит хыс, харындастарын чааға ӱдезібізіп, оларнаң пічік пазысчатханын чахсы кӧзіт пиргеннер. Фильмнің халғанҷы чардығында хыс полған на харындазы чаада чат халғаннаңар пічіктер алчатханы кӧзіділче. Харындастары чаадаң айланмааны ӧӧн матырның чӱреен чуртас тооза сыстатча.
Таныхтирға кирек, араласчыларның аразында кӧп ӱгренҷі полған. Арса, оларның піреезі марығ соонаң режиссер алай артист поларға сағыныбызар. Чииттернің тоғыстарын аймах сферада істенчеткен специалисттер паалааннар. Жюринің кнезі Хакасияның культура министрі Леонид Ерёмин полған. Ол ағаа андағ ӱлӱс тӱскені уғаа нандырығлығ тіп таныхтаан. Ідӧк кинода пастағы хаалағлар итчеткен улустың тоғыстарын Москвадағы режиссерлар Дмитрий Якунин паза Игорь Рыбников паалааннар.
Минің кӧрізімнең, мындағ марығ республикадағы чииттерге хаҷанох кирек полған. Арса, марығ соонаң чир-суғҷыларыбыстың аразында чайаачы кӧрістіг кізілернің саны илееде хозыл парар. Аннаңар жюри аймах номинациялар пастыра кӧп тоғысты таныхтаан. «Иң чахсы сценарий» номинацияда «Чуртастың танығлары» кино чиңісчі пол парған. «Иң чахсы оператор тоғызы» номинацияда «Пиҷе» фильм таныхталған. «Артисттернің иң чахсы ойыны» номинацияда «Конец» фильм чиңіс тутхан. «Режиссура» номинацияда «Сарлахтың кӱні» пастағы орын алған. Таныхтирға кирек, пу хысха фильм кӧрігҷілернің кӧңніне юрген. Режиссер аны саблығ «День сурка» фильмге тӧӧй арах суур салтыр. Марығның чиңісчізі «Хыныс паза ынархас» хысха фильмні суурған ӧме полыбысхан. Оларға пастағы орынны утып алған ӱчӱн 50000 салковай читірілген.
Полған на команда, сыйыхтар аларға сценазар сыхханда, кино суурчатханда, ӧменең тоғынып паза удур-тӧдір чӧптезіп, хада-пірге тоғынарға иң сидік полған тіп таныхтаан. Мындағ опыт уғаа тӱзімніг полған тіп ӱлескеннер олар.
Чоохтирға кирек, 10 кӱн пазынаң «Кӧрігҷілернің кӧңніне кірген фильм» номинацияның чиңісчізі адалар. Аны Интернет пастыра «Алызығлар таны» кинокомпанияның сайтында чуртағҷыларыбыс ӱн пиріп таллирлар.
Ізенчебіс, марығ аннаң андар узарадылар паза килер чылда мыннаңох кӧп араласчы полар.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы