ПОЛҒАН НА КІЗІ НАҢДЫРЫҒЛЫҒ ПОЛАРҒА КИРЕК
01.04.2020
Хабарлар
Ӱлгӱ. Киҷее Хакасия правительствозының чыылии пастағызын на видеоконференция оңдайынаң ирткен. Ӱлгӱдегілер мыңдағ оңдайға коронавирус тарирын тохтадар пӧгіннең кіргеннер
31 МАРТТА ХАКАСИЯНЫҢ ПАЗЫ ВАЛЕНТИН КОНОВАЛОВ РЕСПУБЛИКА ПРАВИТЕЛЬСТВОЗЫНЫҢ ТЕЕСТЕГІ ЧЫЫЛИИН ИРТІРГЕН. ПУ ЧЫЫЛЫҒ АЛЫНДАҒЫЛАРНАҢ ИРТІРІЛГЕН ОҢДАЙЫ ХООСТЫРА ПАСХАЛАЛҒАН. ПРАВИТЕЛЬСТВО ЧЫЫЛИИН ИРТІРҶЕҢ ЗАЛДА РЕСПУБЛИКА УСТАҒҶЫЗЫНАҢ ХАДА САН ПИРІСНЕҢ ЧООХ ТУТЧАҢ ПАСТЫХТАР ЛА ПОЛҒАННАР. ПАСХА МИНИСТРЛЕР ЧЫЫЛЫҒДА ИНТЕРНЕТ ПАСТЫРА АРАЛАСХАННАР.
Чыылығның пастағы сурии часхыдағы ӧрт сығысчаң паза суғ тасчаң тусха тимненіске чарыдылған. Республика пазы ӱзӱрігні ӧрттер кӧп сығысчатханынаң пастаан.
- 24 марттаң республикада ӧрттең тоғыр ӧнетін режим кирілген, - таныхтаан Валентин Коновалов. - Че олох туста пятницадаң позырахха теере ле МЧС тоғынҷылары ӧрттер ӱзіреріне 70 артиинаң хати чӧргеннер. Оларның кӧп чардығы чазыдағы ӧрттер, аннаңар таныхтирға чарир - чурғағҷыларның кӧбізі, хомзынысха, ол режимні сайбапча.
Хакасия пазының орынҷызы Юрий Курлаев, сан пирістіг чооғын тудып, амғы тусха теере республика чазыларында 92 ӧрт сығысханынаңар искірген. Олох туста ирткен чылдағызынаң тиңнестірзе, 37%-ке хызырылғанын таныхтаан - 2019 чылда пу тусха чазыларда 145 ӧрт полтыр. Чазыдағы ӧрттер иң не кӧп Ағбан город чирінде сығыстыр - 20, Ағбан пилтірі аймаанда - 18, Шира аймаанда - 13, Харатаста -11, Алтай аймаанда - 11, Орджоникидзе аймаанда - 6. Республикада ӧрттең тоғыр ӧнетін режим 24 марттаң 24 апрельге теере кирілген. Че хайди таныхталған чыылығда, хайди удаа полча, ол узарадыл парарға айабас.
Суғ тасчаң тусха тимненіс кӧрілген план хоостыра апарылчаттыр. Пӱӱл ағын суғлар пустаң сала ирте позып сығар тіп сахталча - 10-15 апрель тузынзар. Суғ тазарынаң палғалыстығ прай хорғыстар сыныхтағда тудылча тіп таныхтаан Юрий Курлаев.
Валентин Коновалов ӧрттер сығысчатханынаң кӱрезігні тыыдарына муниципальнай пӱдістернің пастарын хозыларға хығырған - МЧС-наң чағын тоғынарға, фермерлер аразында чарыдығлығ тоғыс апарарға. Ідӧк суғ тасчаң тусха тимненіс хоостыра чуртағдыларға суғлар хайдағ оңдайда полчатханынаңар тӧреміл искір турарға чӧп пирген. Пус чуға полғанынаңар иң не пастап палыхчыларны паза іҷе-пабаларны, палаларын суғ хыринзар ойнирға позытпазыннар тіп, сизіндір турарға хығырған.
Чыылығның алында сурии коронавирус чуғындах ағырығ тарирын тохтадары полған. Пӱӱнгі кӱнде пу ағырығнаң палғалыстығ кирек республикада хайдағ оңдайда полчатханынаңар сан пиріс иткен Хакасия пазының орынҷызы Татьяна Курбатова. Аның искіриинең, амғы туста Хакасияда коронавируснаң ағырыбысхан ӱс кізі ілезіне сығарылған. Олар прайзы республиканың чуғындах ағырығлар имнег туразының стационарында чатчалар, оларның хазиина сағам хорғыс чоғыл, прай имнег полызии пирілче. Ідӧк стационарда ағырығ кізінең хости полған пір кізі сыныхтағ иртчеттір.
Тиксі, тізең, 781 кізі ибдегі карантинде поларға кирек. Олар хырығ озаринаң килген паза ағырығ кізілернең хости полған кізілер. Имҷілер 10 кӱн пазынаң (ағырығ, 10 кӱн ирт парза ла, сығысчаттыр), оларның ханын алып, коронавирусха сыныхтабызарға киректер. Харатастағы А.И.Лебедьтің адынаң реабилитация кінінде азылған обсервациязар алты кізі алылтыр, оларның ибдегі карантинде полдаң оңдайы чоғыл осхас.
Коронавирус ағырығны ілезіне сығарарына Хакасияда паза пір кін тӧстелтір - республикадағы СПИД-таң кӱресчең кінде. Аннаңар сыныхтағ хоостыра сидіксіністер полбас тіп ізендірген регион устағҷызының орынҷызы. Арачыланҷаң маскалар аптекаларда ам даа чоғыл, че чағынғы туста пол килер тіп ізенчелер. Сағам, тізең, республикада арачыланҷаң маскалар тігерінде тоғыс апарылчаттыр. Предприятие-учреждениелер чахааны хоостыра 20 муңда маска тігіл партыр. Дезинфекция итчең ниме-ноолар аптекаларда, садығ тураларында пірееде пар полча, пірееде чох пол парча тіп искірген Татьяна Курбатова. Вирустардаң тоғыр имнер читкіҷе полтыр, имнег тураларында арачыланҷаң прай ниме-ноолар читче осхас.
Ағырығ тарирын тохтадар пӧгіннең республикада чон чӧрізін хызырчатхан оңдайлар саны алғыдылған. Тынағ паза ӱтертіс орыннарының тоғызы тохтадылған, ас-тамах паза пастағы кирексініс ниме-нооларын сатчатхан садығ тураларына ла тоғынарға чарадығ пирілген.
- Че, хомзынысха, идінҷектернің, устағҷыларның прайзы ла нимес ол оңдайларны сайбирға чарабас полчатханын оңарчалар, - таныхтаан Курбатова.
Хакасияның пазы Валентин Коновалов, республика чуртағдыларынзар хати айланып, карантин режимін сайбабасха сурынған. Сидіксініс улғаадыбысса, кӱрезіг оңдайлары хатығ арах таа пол парарға айабастаңар сизіндірген.
- Коронавирус хорғыстығ чуғынҷах ағырығ полча паза уғаа табырах тарапча, - таныхтаан ол. - Пасха хазналарның кӧзідімі пу ағырығ чапчаң тарапчатханын паза кӧп ӧлімге ағылчатханын кӧзітче. Карантин оңдайлары мыннаң мындар хатығдаң хатығ ла полып турар, неке. Москвада паза Москва облазында амғы туста прайзына ибдең сығарға чаратпин сыхханнар. Пістің республикада мындағ оңдайлар кирілері айабазох. Аннаңар полған на кізі нандырығлығ поларға кирек, прай халых чон ӱчӱн, аның хазии ӱчӱн.
Республика устағҷызы алында айланған іҷе-пабаларзар, палаларын тасхар ойнирға позытпин турарға сурынып. Паза Валентин Коноваловтың искіриинең, федеральнай синде карантин оңдайларын сайбаан ӱчӱн хатығлирына кӧстелген нормативнай акттар тимнел парған. Хакасияның пазы аны хоостыра республиканың юстиция министерствозына, МВД-наң паза Роспотребнадзорнаң пірге тоғынып, ол хатығластардаңар чуртағҷыларға искірерге, сайбирын тохтатпинчатханнарны нандырыға тартарға чахығ пирген.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде