ӰЗӰРІГДЕ - ЭКОЛОГИЯНЫ ЧАХСЫЛАНДЫРАРЫ
01.04.2020
Хабарлар
Тоғазығ. Коронавирус чуғынҷах ағырығнаң палғалыстығ эпидемиология киректері оой даа полбаза, экология сурии ӧӧн сурығларның пірсі полча. Хакасияда пу кӧстегҷе тоғыс узарадылча
Пу наада Хакасия пазы Валентин Коновалов республиканың чир-чайаан ис-пайы паза экология министрі Сергей Ареховнаң тоғасты. Тоғазығда кӧстегліг министерство тимнеен Ағбан-Харатас промышленность чардығында киизер сығарылчатхан хомай ниме-нооларны синдірерінҷе тоғыстарның тиксі планы, ідӧк ведомствоның экологияны чахсыландырарынҷа мыннаң мындархы хаалағлары ӱзӱрілген.
Республиканың чир-чайаан ис-пайы паза экология министерствозы планда прай чӧптерні паза танығларны санға аларға кӱстенген. Чӧптер Хакасияда Роспотребнадзор устанызынаң, Ағбан пилтірі аймааның устағ-пастаанаң, Профсоюзтар федерациязынаң, халыхтар ӧмелерінең паза пір хара тас разрезінең кіргеннер.
«Арығ кии» федеральнай проекттің кирексіністері хоостыра паза Росприроднадзор чӧптерінде план тоғыс ӧӧн кӧстегҷе чуртасха кирілер. Ол санда - транспорттаң, алында туралардаң, промышленность, чылығ-чарытхы предприятиелерінең хомай ниме-ноо сығарыстарын синдірерінҷе, киині сыныхтирынҷа, экология сыныхтаан хатығлирынҷа, ағастар одыртарынҷа паза пасха тоғыстарҷа.
Ідӧк ирткен неделяда учёнайларнаң тоғазығда ӧӧн пӧгіннер турғызылған: Хакасияда киректелчеткен иң кирек наука істезіглері, тоғыстар санын тӧстирі, тоғыстарны чахсы кӧр салар ӱчӱн, тиксі республиканың экологиязы хорғыс чох поларынҷа концепцияны тимнирі.
Киизер сығарылчатхан хомай ниме-нооларны синдірерінде тоғыстарның тиксі планы Хакасия пазына ызылар, ағаа тӧстеніп, чарадығ алылар. Киректелзе, андар ідӧк алызығлар киріл турар.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде