РЕЖИМНІ САЙБААННАРНЫ ХАТЫҒЛИРЛАР
03.04.2020
Хабарлар
Ӱлгӱ. 1 апрельдең республикада ибдең сыхпас режим чарлал парған. Пуох кӱнде ол тема хоостыра Хакасия правительствозы чуртағҷыларнаң кӧні эфирге сыххан
ЧОННАҢ ЧООХТАЗЫҒДА ХАКАСИЯ ПАЗЫ ВАЛЕНТИН КОНОВАЛОВ, АНЫҢ ОРЫНҶЫЗЫ ТАТЬЯНА КУРБАТОВА, ПАЗА ПІР ОРЫНҶЫЗЫ - ФИНАНСТАР МИНИСТРІ ИРИНА ВОЙНОВА, ХАЗЫХ ХАЙРАЛЛАҶАҢ МИНИСТР ВЛАДИМИР КОСТЮШ, ЮСТИЦИЯ КИРЕЕНДЕ МИНИСТР СЕРГЕЙ РОМАШОВ АРАЛАСХАННАР. КӦНІ ЭФИР ВАЛЕНТИН КОНОВАЛОВТЫҢ СОЦИАЛЬНАЙ СЕТЬТЕРДЕГІ СТРАНИЦАЛАРЫНДА ПАЗА «РТС»- тың YOUTUBE КАНАЛЫНДА ИРТКЕН.
Пазох чоохтапчабыс, режим чарлалған туста республиканың прай чуртағӌылары ибде одырарға киректер. Хаӌан сығарға чарадылчатханы Хакасия правительствозының ӧнетін чарадиинда пазылых. Кӧзідімге, садығ тураларынзар чіӌең нимее, аптекаларзар имнерге сых пар килерге. Имҷілер полызиин тың кирексіпчетсе алай чуртапчатхан орында сағыбаан саай пол парза, ідӧк тасхар сығарға чарир. Паза мындағ оңдайлығ режимде чон кӧп чыылысчатхан чирлерде кізілердең 1,5 метр оортах тудынарға кирек, - чоохты пастаан Валентин Коновалов.
Республика пазының орынҷызы Татьяна Курбатованың искіриинең, пӱӱнгі кӱнде Хакасияда коронавируснаң ӱс кізі ағырча. Олар чуғынҷах ағырығлар имнег туразының стационарында имненчелер, прай кирек полызығны алчалар. Харатастағы А.И.Лебедьтің адынаң реабилитация кініндегі обсервацияда читі кізі чатча. Оларға ідӧк кирек имнег полызии прай пирілче. 1 апрельге читіре республиканың 860 чуртағҷызы карантинге кирілген. Олар хырығ озаринаң килгеннер паза чуғынҷах ағырығлығ кізілернең хости полғаннар.
Мындағ хысха сан пирістер соонаң устағҷылар республика чуртағҷыларынаң ибдең сыхпас режимнеңер Интернет пастыра «сурығ-нандырығ» оңдайлығ чоохты пастааннар.
Социальнай сетьтернең тузаланчатхан улустың иң пастағы сурии чонны тартчаң транспортнаң палғалыстығ полған: режим чарлалған туста оларның чӧрізі тохтадылар ба?
Хайди чарытхан Валентин Коновалов, Хакасияның город-аймахтарындағы автобустар, электропоездтер, ниикке чӧрҷең машиналар чӧрізін тохтадары кӧрілбинче. Олар хайди чӧргеннер, ідӧк ле чӧрерлер. Пір ле сидіксініс - город тастынзар чӧрчеткен автобустарға чон толбинчатхан сылтағнаң рейстер суурылча.
- Че пазох айланчабыс чонзар, тың кирек полбаза, аар-пеер сыхпаңар. Одырыңар ибде! - теен Валентин Олегович.
- ЗАГС пӧліктері тоғынар ба? - сурығ полған.
- Россияның юстиция киреенҷе министерствоның чарадиинаң, муниципальнай пӱдістердегі пӧліктер тоғынарлар. Айланған кізілерге ЗАГС-таң пічіктер прай пирілер. Че той саларға сағынчатхан чииттерге 1 июньға теере сахтап аларға кирек. Ол тусха читіре хоных хонғаннаңар пічіктер пирілбес, - нандырған Хакасиядағы юстиция киреенҷе министр Сергей Ромашов.
Режим тузында МФЦ-ларда, налог службаларында, банктарда, чонға тоғыс тапчаң кіннерде азынада пазыныс пастыра ла чоннаң чоох алызарлар тіп чарытханнар кӧні эфир араласчылары. Имнег туралары тоғыстарын олох оңдайларҷа узаратчалар.
- Че пу туста пала таап алған ипчілерге кирек полызығ хайди даа пирілер. Оларның чарых кӧрген иркеҷектерін педиатр пір айға теере хайығда тудар. Ікі айға чит париғаннарны, тізең, іҷе-пабалар постары кӧрерлер, имҷізер апарарға алай апарбасха, - теен Владимир Костюш.
Чуғынҷах ағырығдаң арачыланҷаң маскалар, антисептиктер республикада читкіҷе бе тіп сурғаннар Хакасия чуртағҷыла-ры. Хайди искірген Татьяна Курбатова, аптекалар, имнег учреждениелері устағ-пастаанаң хада оларны садызып алар прай оңдайлар кӧрчелер. Олар ідӧк кип-азах тікчең цехтарнаң чӧптезіг итчелер. Пӱӱнгі кӱнде андағ тӧрт цех тоғысха чапсынған. Предприятие-учреждениелер чахии хоостыра олар пір кӱнде 20 муңҷа маска тік салча осхастар.
- Сағам читкіҷе тіп полбаспыс. Че тоғыс апарылча, - теен Татьяна Анатольевна. Паза пір сурығ. Регионда карантинге прай пірігіс-учреждениелер парбааннар. Хайди олар тоғысха чӧрерге киректер? Режимні сайбааннарны хатығлирлар нооза.
- 1 апрельдең правительство тоғыс орыннарынаң ӧнетін справкалар пирердеңер чарадығ алыбысхан. Олар хайдағ кӧрімніг полары муниципальнай пӱдістерзер ызыл парғаннар. Предприятие-пірігіс устағҷылары оларны тоғынҷыларына пирерге киректер. Халғанҷылары, тізең, ол справканаң хада паспорт ал чӧрерге, - теен Валентин Олегович.
Хатығластардаңар чоохтаза, сағамғы туста ол сурығ Хазна Думазы синінде ӱзӱрілче. Аннаңар режимні сайбааннарға штрафтар ӧс парыбызар даа. Че сағам пір кізее 500 салковайға читіре салылар. Режимні сайбапчатханнарны хатығлир кирек ӱчӱн істіндегі киректер министерствозы нандырығ тутча.
Роспотребнадзорның Хакасиядағы пӧлии устағ-пастааның искіриинең, 10 апрельге теере хырығ озаринаң республиказар айланчаң кізілер ам даа пар. Оларны ідӧк удурлирлар, сыныхтирлар, карантинге ызарлар.
- Аннаңар ибдең сыхпас режим хаҷан чабылардаңар чоохтирға ирте тіп сағынчабыс. Ӧӧні - ол ағырығ пістің республикаҷа тарабазын. Піс хада-пірге прай кирексіністерні толдырарға кирекпіс, - чооғын тоосхан Хакасия пазы Валентин Коновалов.
Автор :
Александра КАРАМЧАКОВА
| Пн | Вт | Ср | Чт | Пт | Сб | Вс |
| 26 | 27 | 28 | 29 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
