АҒЫРЫҒ ТАРИРЫ ТОХТАДЫЛАРЫНА ІЗЕНЕРБІС
03.04.2020
Хабарлар
Ӧӧркі Чӧп. Хакасияның Ӧӧркі Чӧп кнезі Владимир Штыгашев 1 апрельде президиум чыылиин иртірген
Хакасияның Ӧӧркі Чӧп президиумы, кирілген карантин оңдайларына тудынып, пу чыылығны пасха ведомстволарның кізілері паза хабарчылар (СМИ-ларға чыылығ хайди ирткенінеңер видео ызылған. - Авт.) чох иртірген. Президиумдағылар чуртағҷыларға имнер пирерін чахсыландырарынаң палғалыстығ сурығларны кӧрібіскеннер. Чоох парған ікі федеральнай закон проектінеңер.
Пастағызында имнер, имнег ниме-нооларын паза имнег ас-тамаан тикке алҷаң праволығ чуртағҷыларның, чарыда чоохтаза, льготниктернің, Федеральнай регистрін тӧстирдеңер чоохталча. Закон проектін Россия правительствозы тимнептір. Авторларның искіриинең, мындағ кін тӧстелгені, льготниктерге имнер пирерін автоматическай оңдайнаң сыныхтағда тударға паза ол категория чуртағҷыларына нинҷе им киректел турарын азынада піліп ал турар оңдай пирер. Ол тоғыс автоматическай режимде апарыл турар тіп кӧрілче.
Ағаа хоза пу закон проектінҷе ағырығ кізілерге чуртирға хайди даа киректелчеткен имнернің переченьін нааҷылап кӧрҷең тусты чылда пірдең ас нимес ит салары кӧрілче. Ӧӧркі Чӧптің хазых хайраллирынҷа паза социальнай политикаца комитедінің кнезі Евгений Молостовтың таниинаң, пу закон проектін чуртасха киргені чуртағҷыларға имнер пирерін чахсыландырар паза льготниктерге им алҷаң оңдайны нииктир.
Ікінҷі федеральнай закон проектінҷе имнер садии рыногындағы монополиядаң тоғыр кӱресчең оңдайлар кирілче.
- Пу закон проектінҷе кирілчеткен оңдайлар имнер пааларын сыныхтағда тудар паза хазых конкуренция идер кӧстегліг полчалар, - таныхтаан Владимир Штыгашев.
Ӧӧркі Чӧп президиумы пу федеральнай закон проекттеріне хабазарға чарат салған. Хакасияның Ӧӧркі Чӧп кнезі Владимир Штыгашев, 1 апрельдең республикада карантин режимі кирілгеніне хайығ айландырып, тасхар транспорт паза кізілер саны пілдірте хызырыл парғанын таныхтаан.
- Ол чуртағҷылар піліп хайчатханын киречілепче, - сағыс-кӧрізінең ӱлескен Ӧӧркі Чӧп устағҷызы. - Кирілчеткен кӱрезіг оңдайлары Хакас Республика чирінде коронавирус тарирын тохтадарға полызар тіп ізенербіс.
Чыылығда ідӧк Ӧӧркі Чӧптің теестегі сессиязын иртірҷең кӱн чарадыға алылған. Сессия 24 апрельде иртер тіп кӧрілче. Олох туста Владимир Штыгашев прай ниме республикадағы эпидемиология киреенең палғалыстығ поларын таныхтаан.
Автор :
Альберт ТОЛМАШОВ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы