ХОСХАР АЙЫНЫҢ 12-ҶӀ КӰНӀНЕ ТЕЕРЕ - ИБДЕ
07.04.2020
Хабарлар
Ӱлгӱде. Хакасияда ибде одырар тус неделяа узарадылча. Коронавирусты таратпас пӧгiннең республикада самоизоляция тузын неделяа узарадардаңар чарадығ алылар
Чарадығ хосхар айының 12-ҷi кӱнiне теере тоғынар. Регионда эпидемиология кирее хайди алызарынаң кӧрiнер кирек пе ол тусты узарадарға алай чох.
Пӱӱнгi кӱнге кирек тӱзiмнiг. Республикада чуғынҷах ағырығны хаптырып алған наа кiзi чоғыл. Хакасияда коронавируснаң ағырыбысхан пастағы чуртағҷы чазыл парған паза имнег туразынаң сығарылған. Ӏкi чуртағҷының ағырығ ниик иртче. Че, хайди таныхтаан Валентин Коновалов теестегi оперативнай штаб чыылиинда, ол сыныхтағны синдiрерге паза пос тудынарға сылтағ нимес.
– Пiлчем, кӧбiзiне ибде одырғаны – ол хатығ сынағ. Че пу тусха ол ағырығны таратпазынҷа иң чахсы арачыланысха саналча. Пiстiң пiрге пӧгiнiбiс – кинетiн ӧзiстi сығардырбасха. Мында ӧӧнi посха орта тудынары, постаңар ла нимес, ибiркi чонға нандырығлығ полчатханыңны оңарғаны, – таныхтаан Хакасия пазы.
Карантин узарадылғанын, Роспотребнадзордаң, Хакасияҷа МВД-даң паза пасха ведомстволардаң кiрчеткен чӧптернi санға алып, республика правительствозының чарадиина килiстiре тӱзедiглер кирерi пӧгiлче. Ол санда хосхар айының 5-ҷi кӱнi соонаң тоғынарға чарадылар организациялар паза учреждениелер пiчии тӱзедiлер.
Тоғынчатхан чарадыға кирiлген алызығлардаңар наа искiрiг ӱлгӱ органнарының порталында (https://r-19.ru/), республика пазының социальнай сетьтердегi позының пӧлiктерiнде (Вконтакте: https://vk.com/konovalov1917 паза Инстаграмда: https://www.instagram.com/konovalov_khakasia19/) пирiлер.
Пасха регионнарда ағырчатханнар саны ӧсчеткенiн санға алып, республика чуртағҷыларынаң чуғынҷах ағырығны ал чӧрчеткен кiзiлердең учурир оңдайларны хызырыбызарға киретелче. Пасха регионнарның опыдына тӧстенiп, Минюстнаң, МВД-наң паза Роспотребнадзорнаң хада-пiрге республиказар килчеткен кiзiлернi прай сыныхтирын хатығлир оңдайлар ӱзiрiлче.
Автор :
Хакасия пазынының администарциязы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы