ТОҒЫН ПОЛАР ОРГАНИЗАЦИЯЛАР САНЫ АЛҒЫДЫЛДЫ
05.04.2020
Хабарлар
Ӱлгӱде. Хакасияда хосхар айының 12-ҷi кӱнiне теере тиксi чонға ибдең сыхпас режимнi узарадардаңар чарадығ алыл парған
Роспотребнадзорның паза чуртағҷыларның чӧптерiн санға алып, республикада тоғынарға чарадылчатхан организацияларның пiчии алғыдылған. Хосхар айының 4-ҷi кӱнiнде Хакасия пазы Валентин Коновалов чарадығда хол салыбысхан.
Регион чуртағҷыларына ам даа чуртапчатхан орыннаң сыхпасха чӧп пирiлче, сығарға чарадылча, хаҷан табырах (соона салдырбас) имнег полызии киректелче алай чуртасха паза хазыхха хорғыс пар; пу чарадығ хоостыра организация тоғызы тохтадылбаан полза, тоғысха читiре парарға, ибге, гаражха алай дача участогына читiре парарға, ағырығ, социальнай хайығдағы туғанның соонҷа кӧрерге.
Чарадылча сӧп-сап сығарарға, чағынғы садығ туразында алай аптекада ниме-ноо аларға, турадаң 300 метр оортахта адайнаң чӧрерге. Палаларнаң хада, чурттаң 300 метр ырах парбин, тасхар чӧрерге чарир, олох туста безопасность правилоларына тудынарға киректелче: пасха кiзiлерге 1,5 метрдең чағын чӧрбеске, алынҷа арачыланыс тирiглерiн тузаланарға.
Республикада пос транспортынаң чӧрерге чарир, че паспорт, тоғыс орнынаң справка алай парчатхан орынға, гаражха, дачаа алай пасха ис-пайға, пiчiктер хада поларға кирек.
Москвадаң килгеннерге наа кирексiнiс кирiлче. Хырығ озаринаң килгеннер чiли, олар хайди даа iкi неделя ибдең сыхпастар.
Хосхар айының 6-ҷы кӱнiнең пасти прай ӱгредiг учреждениелерi ырахтын ӱгренiске кирiлчелер. Техническай оңдайлар чох орыннарда каникуллар тузы узарадылар. Олған садтарына дежурнай ӧмелернiң тоғызын узарадарға чӧп пирiлген, че оларның тоғыс оңдайларын муниципалиттер чаратчалар.
Прай хазна учреждениелерi, МФЦ, чонға тоғыс табарынҷа службалар, ГАИ, ЗАГС паза пасхазы – чуртағҷыларнаң азынада пазынған хоостыра тоғынарлар.
Президент чахиинда таныхталған кӧстеглер кӧрiмнерiне, хайзыларына тоғынмас неделя режим теелбинче, пу кӱрiмнер хозылған: аал, ағас хонии, аңниры, палыхтиры паза палых ӧскiрерi; чир-чайаан ис-пайын аниры; ниме-нооны аннаң андар тимнирi; чарытхы, газ паза оор читiрерi; суғ читiрерi, сӧп-сап сығарары, кiрнi чох идерiнҷе тоғыс; пӱдiрiг; чуртағҷыларға нимес опт садии; автотранспортты сыныхтиры паза тыхтиры, ол санда чуунары паза шиномонтаж; кiзiнi чыырын иртiрерi паза аннаң палғалыстығ полызығлар; ниме-ноо тартары паза хайраллиры; искiрiг паза палғалыс тоғызы; чонға паза организацияларға чурт-коммунальнай полызығларын пирерi; компьютерлернi, ибдегi ниме-нооларны тыхтиры; ибiркi чир-чайаанны хайраллиры; ас-тамах сығарызы; мал имҷiзiнiң полызии; хазна, чуртағҷылар киректерiнҷе нотариустар тоғызы.
Пасха организацияларға тоғынмас кӱннер режимы теелче. Хосхар айының 12-ҷi кӱнiне теере Хакасияда чарабас тоғынарға:
- сiлiгленҷең, массаж паза СПА-салоннарға, солярийлерге, мылчаларға паза мындағ полызығ пирчеткеннерге;
- ӱтертiс, тынағ паза олғаннар кiннерiне;
- физическай культура паза спорт орыннарына, ол санда спортзалларға паза бассейннерге;
- чонны азырапчатхан организацияларға;
- пос имнег организацияларына, кабинеттерге паза стоматологияа, табырах паза соона салдырбас имнег полызиин киректепчеткенiнең пасха.
Ӏдӧк розница садии чарадылбинча, аптекалардаң, сотовай палғалыс салоннары, ас-тамах, пӱдiрiг, ибде киректелчеткен ниме-ноолар, садха ниме-ноолар, газета-журналлар, мал-хусха ниме-ноолар, имнер паза иң кирек ниме-ноолар садығ тураларынаң пасха (Россия правительствозының 27.03.2020 чылдағы 762-р№ чарадиинда кӧзiдiлген), оларның санына хозылған пу ниме-ноолар:
1. алынҷа арачыланыс ниме-ноолары паза оларны тимнирiне материаллар;
2. имнег паза дезинфекция ниме-ноолары;
3. автотранспортха хоза чардыхтар, ол санда сӱрткi, шина, камера;
4. санитар-техника ниме-ноолары;
5. кiзiнi чыырға ниме-ноолар;
6. очки, линзалар паза оларның чардыхтары;
7. палғалыс ниме-ноолары: мобильнай телефоннар, сим-карталар;
8. ӧрттi чох идерiнҷе паза аны ӱзiрерiнҷе ниме-ноолар.
Пасха ниме-ноо садиин ырахтын, кӧрiлген орынзар читiрiп, садарға чарир.
Хосхар айының 12-ҷi кӱнiне теере изiртчеткен iскi сӱзiннер садии 10.00-15.00 часта ла чарадылар.
Хосхар айының 12-ҷi кӱнiне теере тоғынчатхан организацияларға тоғынҷыларына алынҷа арачыланыс ниме-нооларын пирерге, ит iзиин синирге, тоғыс орыннарында санитар тоғыстарын толдырарға, iдӧк санитар-эпидемиология киреенең палғалыстығ кирексiнiстерге тудынарға киректелче.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы