СУҒ ТАЗАРЫНА ТИМНЕНІС
07.04.2020
Хабарлар
Сыныхтағ. Хакасияның пазы Валентин Коновалов Россияның МЧС министрі Евгений Зиничевнең хада регионның суғлар чайыларына тимненізін паалааннар
Россияның МЧС министрі Евгений Зиничев (оң саринда), Хакасия пазы Валентин КОНОВАЛОВ, МЧС-тың Хакасияда ГУ пастығы Александр МУЛЛ Ағбан суғны вертолеттаң кӧр парчалар
Республиказар Россияның МЧС министрі Евгений Зиничев кил парған. Регионда суғлар чайыларынаң палғалыстығ киректерні паалирға ол Хакасияның пазы Валентин Коноваловнаң хада Ағбан суғны кӧрерге учух пар килгеннер. Олар пус тығылыс парарға паза суғ сині кӧдірілерге айабас орыннарны сыныхтааннар.
Азынада кӧріснең, пӱӱл суғларда пус ирте ин сығар. Региондағы прай даа суғларда пус апрель айның пастағы он кӱнінде иніп пастир. Тағларда хар ам даа кӧп, че Хакасияның чабыс чирлерінде Ағбан суғдағы пус чардыхти хайылып пастапча. Пус тығылыс парбас пӧгіннең, гидропосттарда сыныхтағ тыыдылча.
- Сибирьде уғаа чылығ кӱннер турыбысханда, хар табырах хайыл сығар. Аннаңар суғлар чайыларын паза гидротехническай пӱдіріглернең тузаланчатхан собственниктер паза организациялар суғны иртірер режимні хайди толдырчатханнарын хатығ сыныхтағда тударға кирек полар. Чылығ турып, наңмырлар кӧп чаап сыхса, суғлар сині тың кӧдіріл парыбызар, андағ киректі полдыртарға чарабас, - теен Евгений Зиничев.
Суғлар чайыларынаң сидіксіністер сығарға айабас Ағбан паза Ах Ӱӱс суғларда. Суғ кірерінең хорғыс полар сигіс муниципальнай пӱдістегі 27 аалға. Анда пис муң азыра кізі чуртапча, 1400 чурт паза 1500 азыра чир участогы орныхча.
- Суғлар чайылар тусты хорғыс чох иртірерінҷе кӧп тоғыс апарылча, че піс хайдағ даа сидіксініске тимде поларға кирекпіс. Аннаңар, кізілерні кӧзірерге кирек полза, піс оларны ӱр нимес тус тудар 26 стационар пунктын тимнеп салғабыс. Оларда тоғыс муң азыра кізі пол полар. Объекттер сыныхталған, анда прай кирек нимелер пар, олар тоғынарға тимделер. Суғлар сині хараа-кӱнӧрте сыныхтағда тудылча, - таныхтаан Хакасия пазы.
Регионда суғлар синін сыныхтир система тоғынча, андар 30 стационар гидропосты паза суғ синін синечең ӱр нимеске турғызылған 33 пост кірче. Сойан-Сус ГЭС-та суғны позыдар сурығҷа палғалыс тудылча. Прай кӱстер ӧмезінде пис муң азыра кізі, 1300 техника паза 82 киме саналча.
МЧС подразделениелері прай киректерні хараа-кӱнӧрте сыныхтағда тутчалар. Суғларда азынада киректелчеткен мероприятиелер иртірілген. Тығылыс полар Ағбан суғның участоктарында Абаза город паза Хубачар аал хыринда пус чара чачырадылған, Пии, Таштып, Шира паза Орджоникидзе аймахтарында пусты кизер тоғыстар апарылған.
- Суғлар чайылчатханы - иң нандырығлығ паза сидік тустарның пірсі. Пістің хада-пірге пӧгінібіс - кізілерні арачылиры паза ӱрегні тӧбін ит салары, ол санда азынада мероприятиелер иртіріп. Чуртағҷыларнаң чарыдығлығ тоғыс апарарға, оларға киректер хайди алысчатханнаңар табырах искір турарға кирек. Кізілернің ис-пайын арачылир, чир участоктарын паза суғны иртірер кооптарны азынада арығлир оңдайлар пар ползын - таныхтаан Россияның МЧС министрі.
Тоғыс чорығын тоозып, Евгений Зиничев паза Валентин Коновалов П.С.Непорожнийнің адынаң Сойан-Сус ГЭС-тың суғны иртірер тимненізін паалааннар. Республиканың инженернай арачыланыс устанызы искіриинең, региондағы прай гидротехническай пӱдіріглер суғлар чайылар тусты саайлар чох иртірерге тимделер.
Автор :
Хакасия пазының администрациязы
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы