ФИЛАРМОНИЯНЫҢ КОНЦЕРТТЕРІ - ОНЛАЙН
07.04.2020
Хабарлар
Культура. Ибдең сыхпас режим тузында Хакас филармониязы, онлайн-концерттер кӧзідіп, кӧрігӌілернің кӧңнін кӧдірче
Коронавирус хайынчатхан сылтаанда чуртас таныбас иде алыс парды. Прай чон Интернетсер «кӧс парыбысхан». Кізілер аны пастыра тоғынчалар, ӱгренчелер, хабарласчалар. Ибдең сыхпас режим тузы полза даа, чуртас пір орында турбинча нооза. Предприятиелерге, тізең, тоғыс оңдайларын алыстырарға киліскен, ол санда культура учреждениелеріне.
Карантин тузында Россияның ӧӧн театрларында, музейлерінде ибдең сыхпин пол килерге чарир. Итсе-де, алында даа учреждениелер сайттарынзар ойыннарын, кӧзідіглерін сығарҷаңнар, че амды Россияның культура министерствозы чахиинаң ол тоғыс алғым апарылча. Саннар хоостыра прайзын Москвадағы Улуғ театр асча. Кӧзідімге, «Хуулар кӧлі» балетті кізілер ютубта пір сутка аразына 1,3 миллион хати кӧріп алғаннар, «Узупчатхан абахай» балетті -1,5 миллион хати. Кӧрігҷілерні Эрмитаж, Третьяков галереязы паза даа пасха музейлернің кӧзідіглері ӧріндірчелер.
Хакасиядағы учреждениелердеңер чоохтаза, мында иң ӧткін Хакас филармониязы хайынча. Пастағы онлайн-концерт сыныхтағ оңдайынаң 28 мартта кӧзіділген. Филармонияның эстрада ырҷылары, хыныстаңар сарыннар толдырып, кӧрігҷілернің чӱрее-паарын хайылдырғаннар. 2 апрельде кізілер саблығ музыкант Джоуи Моранттың (США) концертін кӧріп алғаннар. Ол концерт 2014 чылда «Джаз кӱннері Хакасияда» фестиваль тузында ирткен. Анда, трубачтаң пасха, Ян Лундгреннің ӧмезі (Швеция), ырңы Лиса Хенри (США) паза Россияның иң саблығ джазмені Игорь Бутман араласханнар. 3 паза 5 апрельде филармониядағылар классика музыказына хынчатхан улусха сыйых ит пиргеннер. Кізілерге дирижер Вячеслав Инкижековтың пайрамнығ тӧреен кӱніне чарыдылған гала-концертті кӧріп алар оңдай пирілген. Андада оркестрнің музыканттары гобоист Алексей Балашовнаң паза скрипач Анастасия Субракованаң хада «Алтын Кӧӧк» хай-балеттің ӱзігі Й.Гайднның, Л.Бетховеннің, Ф.Мендельсонның, П.Чайковскийнің, А.Паскуллинің чайаачы тоғыстарын толдырғаннар. Ідӧк ирткен неделяда «Алтын Кӧӧк» хай-балет кӧзіділген. Аннаңар алынҷа чоохтирға кирек.
«Алтын Кӧӧк» хай-балеттің премьеразы 2014 чылда кӱскӱзін ирткен, пӱӱнгі кӱнде ол Хакасияның иң саблығ ойыннарының санына кірче. «Кӱн сузы» паза «Ӱлгер» ансамбльлар, аны кӧзідіп, чир ибір салғаннар тиирге чарир. Апрельде артисттер аны Хакас филармониязының сценазында кӧзідерге пӧгінгеннер. Че коронавируснаң ағырчатханнарның саны хызырылбинчатхан сылтаанда, кирек киліспин парған. Андада культура учреждениезінің устағ-пастаа «Алтын Кӧӧкті», видеоға суурып, Интернетке сығарыбызарға чаратхан. Таныхтирға кирек, пасха концерттер филармонияның чыындызынаң алылған ползалар, хай-балетті РТС телерадиокомпанияның операторлары тӧрт камеранаң ӧнетін суурғаннар. 4 апрельде 19.00 часта «Алтын Кӧӧк» ойын РТС-тың эфирінде, филармонияның ютуб-каналында кӧзіділген.
Харындас-пиҷедеңер хай-балетті 2017 чылда кӧрерге киліскен. Сынны чоохтаза, пос хараанаң ойынны кӧрерге хай-хай хынығ, че видеоның кӱстіг сарилары парох. Операторлар музыканттарны паза теелбекчілерні чағын иде кӧзітчелер. Анзы артисттернің узын орта паалирға оңдай пирче. Минің кӧрізімнең, «Кӱн сузының» араласчыларына, теелбектенерге ле нимес, драма ойыннарында устарын сынирға чарир. Хай-балетте пір сӧс тее чоохталбинча, че артисттер полған на матырның хылиин толдыразынаң читірчелер. Музыканттарны алынҷа таныхтирға кирек. Кӧрігҷінің кӧңні сіліг кӧглерге толча.
Хакас филармониязының онлайн тоғызы мыннаң мындар узарадылар. Концерттернің анонстарынаң учреждение сайтының «Афиша» пӧлиинде танызып аларға чарир. Сығарылған видео чызылбас, кізілернің прай ойыннарны хайдағ даа туста кӧріп алар оңдай полар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде