КОРОНАВИРУС ПАЗОХ ЛА ӰРӰКТІРЧЕ
08.04.2020
Хабарлар
***************************************************************************************
Оларның суриина нандырып, Елена Быкова чоохтаан, сағам наа чуғынҷах ағырығ тарапчатхан сылтаанда, республикада тойлығ ипчілернің паза тӧреен ыңааҷахтарның хазиина хорғыс чох оңдайлар тӧстел парарға кирек. Россияның прай регионнарында обсервациялығ пала тапчаң алынңа туралар кӧрілче. Ол тоғыс кискектепчеткеннерні хазых ипчілердең пӧлер пӧгіннең иділче. Андағ тура хайди даа улуғ имнег учреждениезі поларға кирек. Ідӧк анда пӧзік устығ анестезиолог-реаниматологтар, имҷі-неонатологтар, акушер-гинекологтар, УЗИ иртірҷең имҷілер тоғынарға киректер. Хайди даа амғы кӱстіг имнег оборудованиезі пар ползын. Ол оңдайларға Харатастағы пала тапчаң тура прай саринаң килістіре. Олох туста перинатальнай кіннең ырах орныхпинча - ол саринаң ідӧк кирексіністерге нандырча. Аннаңар андағ чарадығ алылған.
Че кискектепчеткен тойлығ ипчілерні перинатальнай кінде имнеп сыхсалар, андада пасхазына анда имненер оңдай чох полар. Іҷе поларға тимненчеткеннерге паза хазиин сыныхтанчатхан ипчі чонға Хызылчардағы перинатальнай кінзер айланарға килізер.
Соонаң министр, ідӧк харатастағыларның суриина нандырып, городта хирургия корпузы ноғадаңар коронавируснаң ағырчатханнарны имнеҷең тураа айландырылчатханнаңар чарыда чоохтаан. Пу сурығны пӧгерінде ӧӧн кӧстег - коронавирус чуғынҷах ағырығны таратпасха. Аны имниріне иң килістіре стационар Харатастағы имнег туразы полча. Че харатастағылар кізілернің чуртазын ал халарға, чуғынҷах ағырығның тарапчатханын тохтадарға харасчатхан улусха, тоғырланып, тоғынарға харығ полчалар. Сынап мыннаң мындар коронавирус тың тарап сыхса, Харатастағы имнег туразы аннаң тоғыр кӱрезігні апар полбаза, республиканың хирургия пӧлии чабыл парарға айабас. Андада анда коронавируснаң ағырчатханнарны ла имнирлер.
Хайди чоохталған брифингте, ибдең сыхпас режимні сайбаан кізілерге салылчатхан штрафтар сині ӧс парған. Аны сайбаза, кізее 15 - 40 муң салковай штраф салылар. Санитарнай имҷілер режимні сайбабасха чӧп пирчелер. Эпидемияны прай чоннаң хада-пірге тудынып тобырып аларға чарир тіп сағыстарынаң ӱлескеннер имҷілер.
Автор :
Инора БОРГОЯКОВА
| Пн | Вт | Ср | Чт | Пт | Сб | Вс |
| 27 | 28 | 29 | 30 | 1 | 2 | 3 |
| 4 | 5 | 6 | 7 | 8 | 9 | 10 |
| 11 | 12 | 13 | 14 | 15 | 16 | 17 |
| 18 | 19 | 20 | 21 | 22 | 23 | 24 |
| 25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде
