ПРАЙ ТРАНСПОРТ КІННЕРІ ТОҒЫНЧА
08.04.2020
Хабарлар
Чол чӧрізі. Республикада эпидемиология кирее алысчатхан даа полза, прай транспорт кіннері тоғынча - автовокзал, аэропорт паза тимір чол
Хакасияда город-аалларзар чӧрчеткен рейстер тохтадылбааннар. Че ибде одырар режим кирілгенде, чорыхха сыхчатханнарның саны хызырыл парған. Аның сылтаанда хай пірее идінектер автобустарын маршрутха сығарбинчалар. Іди 5 апрельде 366 рейс тохтадылған, 6 апрельде, тізең, 200 азыра.
Автобустар чӧрізі кӱннің сай алысча. Аннаңар чуртағыларға ол-пу рейс маршрутха сығарынаңар Ағбандағы автовокзалда алай ба 8(3902)22-37-08 телефон номерінҷе сығдырадып піліп аларға чарир.
Таныхтирға кирек, полған на рейс соонаң автобус ээлері транспорттарын вирустарны чох итчең ниме-нооларнаң чысхлапчалар. Автовокзал істінде ідӧк дезинфекция тоғызы сыбыра апарылча.
Эпидемиология кирее чахсыланминчатханда, аэропорт тоғызына ідӧк алызығлар кирілгеннер, хай пірее авиакомпаниялар, тізең, апрель тоозылғанҷа учуғыс чӧрізіне алызығлар киргеннер.
Іди «Аэрофлот» паза «S7» авиакомпаниялар Москвазар учухчатхан рейстерні тохтадыбысханнар. «Аэрофлот» - 6, 13, 20, 27, 28 паза 30 апрельдегі рейстерні, «S7», тізең, позырахтардағы рейстерні.
9 апрельде Ағбаннаң Новосибирсксер «S7» самолет учуғарға кирек полған, че авиакомпания рейсті суурыбысхан. «НордСтар» авиакомпания 4 апрельдең Ағбаннаң Норильсксер парчатхан прай рейстерні тохтатхан.
Прай сурығларны Ағбандағы аэропорттың https://abakan.aero/ официальнай сайтында алғыда піліп аларға чарир паза 8-800-550-91-47, 8(3902) 296-380 телефон номерлерінҷе сығдырадарға чарадылча. Аэропортта ідӧк коронавирус тарирынаң тоғыр тоғыс апарылча. Таныхтирға кирек, Москвадаң килген прай пассажирлер 14 кӱн карантинде полчалар.
Тимір чол транспортында пассажирлер саны ідӧк хызырылчатханда, 7 апрельдең ырах парчатхан ӱс рейс тохтадылған.
- Ағбан - Новосибирск 314/106 поезд 8 апрельдең пасти Новосибирсктең четнай кӱннерде чӧрбес, Ағбаннаң 10 апрельдең - ідӧк четнай кӱннерде;
- Хызылчар - Новосибирск 105/106 поездтің чӧрізі 9 апрельдең сығара Хызылчардаң, 10 апрельдең Новосибирсктең тохтадылча;
- Хызылчар - Москва «Енисей» 55/56 поезд 10 апрельдең Хызылчардаң, 13 апрельдең Москвадаң чӧрбес.
Билеттерні айландырардаңар «РЖД» ООО-ның сайтында піліп аларға чарир.
Автор :
Елизавета ГОНЧАРОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы