ЧААНЫ ТООЗА ИРТКЕН
08.05.2020
Хабарлар
1941 - 1945 чылларда ирткен Илбек Ада чаада араласхан Борис Григорьевич Колчинаевтеңер чоохтап пирген аның оолғы Иван (Панка) Борисович Колчинаев
- Пабам чааға Омск городтаң сығара 1941 чылда парған. Ол кӱнде чааӌыларны эшелонға одыртыбыстырлар, че сах андох апарбиндырлар. Ӱр тус сахтирға килістір. Пабам, оңдайнаң тузаланып, колонкадаң суғ алып аларға чараттыр. Ідістерін толдырып, нандыра айланчатханда, кӧрзе, аның эшелонын пасха поезд туюхтабыстыр. Парар эшелонынзар вагоннар алтынӌа ирт парыбызарға сағыныбыстыр. Че ол поезд кинетін тибіреп сыхтыр. Пабам теерпектердең хыйа тоғылахтаныбызарға маңнантыр. Кӧнектері аар-пеер учухтыр. Суғ прай тӧгіл парчатпас па. Пу киректі сағысха киріп, чааға парғалахха даа сала ӧл халбаам тіӌең пабам, - чооғын пастаан Панка Борисович.
Хайди ол аннаң андар искірген, Борис Колчинаев пастап Кольский чарым олтырыхта 119-ҷы атығҷы полкының чааҷызы полған. Анда ол Норвегияның алтынзархызында 1944 чылда 7 октябрьдаң сығара 1 ноябрьға теере апарылған Киркенес операциязында араласхан. Б.Г.Колчинаев андада ікі хати палығлатхан. Аның соонда ол, 622-ҷі атығҷы полкының араласчызы полып, Япониядаң тоғыр чаалазығда араласхан. Ибзер 10 ноябрьда 1945 чылда айланған. Ол II степеньніг Ада чаа орденінең, «За отвагу», «За боевые заслуги», «За оборону Заполярья», «За победу над Германией», «За победу над Японией» медальларнаң таныхтатхан.
Борис Григорьевич Колчинаев Пии аймаандағы Сос пилтірі аалда 1906 чылда тӧреен. Сӧбіреде ол иң кічии полтыр. Золотуханаң ағырған сылтаанда пір хулаа хат партыр. Ӱгрентір 2 классха ла теере. Кічігдең ала пабазынаң хада аал хониинда тоғынтыр.
- Пабазы, минің ағам, хан тузында «старшина» полтыр. Чоннаң албан чыып, хан тонынаң сыйыхтаттырғыр. Іӌезі, минің ууӌам, пабам тӧрт частығ
полғанда, ӱрептір, - аннаң андар чарытхан Иван Борисович.
Чоохтирға кирек, Борис Григорьевич Колчинаев чааға 35 частығда ла парған. Аның алнында ол коммунист партиязынзар кіріп, анаң 1932 чылда партийнай школадағы курстарны тоозып, аймах аал чӧптерінде тоғынтыр: Сос пилтіріндегі, Таштып пилтіріндегі, Пазадағы. Чахсы пілістіг паза ӧткін оңдайлығ кізі ідӧк Асхыс аймаандағы толдырығлығ комитетте инструктор полтыр. Халғанҷызын, тізең, чааға парар алнында, Покояков аал чӧбіндегі колхозтың партия пірігізінде хачы тоғызын толдыртыр.
- Хулаа чахсы испинчеткен сылтаанда пабамны чааға апарарға хынминдырлар. Ол тың сурынтыр. Ағаа позыңның орнына ідӧк чахсы тоғынӌаң кізі таап ал тіптірлер. Ол хайдағ-да ипчіні позының тоғызына кир салтыр, - хосхан Иван Борисович Колчинаев.
Чаа соонда Борис Григорьевич Колчинаев, тӧреен-ӧскен чирінзер айланып, «Наа чол» совхозта тоғын сыххан. Аны, сын коммунисты чіли, кладовщикке турғысханнар.
- Ол андада прай нимені санға турғысхан - нинӌе пар техниканы, малларны, ӧскірген асты. 1947 -1950 чылларда аал чӧбіндегі ӱс совхозғы піріктіріп, Кировтың адынаң пір совхоз тӧстелгенде, пабамны аның кнезіне турғысханнар. Іди ол анда ӱр чыллар тоғын салған. Соонаң аны олаңай тоғыстарға киргеннер. 1966 чылда тынаға сыххан. Хайди чоохтирға чарир, андадағы улус совхозтарны кӧдірер киректе, прай кӱзін салып, ӧткін араласхан. Пабам оларның санында полған, - чооғын тоосхан И.Б.Колчинаев.
Автор :
Александра КАРАМЧАКОВА
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде
