ЧАРЫМ МУҢ КІЗІ АҒЫРЧА
13.05.2020
Хабарлар
Хакасияда тынағ кӱннері аразына коронавируснаң ағырыбысханнар саны пілдірте ӧс парды
Сілкер айының 12-ҷі кӱніне республикада COVID-19 ағырығнаң ағырчатханнар саны, чарым муңны аза халып, 503-ке чит парды. Газетаның халғанҷы искірии соонаң, ағырчатханнар саны тиксі 151 санға хозыл парған. Кӱннер хоостыра кӧрзе, сілкер айының 8-ҷі кӱнінде 15 кізее хозылған, 9-ҷы кӱнінде - 36 кізее, 10-ҷы кӱнінде - 22 кізее, 11-чі кӱнінде - 41 кізее, 12-чі кӱнінде - 37 кізее. Хакасия правительствозы искіриинең, кӧбізі ағырығны сӧбіреде паза тоғыста чухтырып алча (андағ 86 кирек). Ідӧк ағырығ тарапчатхан ӧӧн «кіннер» имнег туралары полча: 44 кирек. Халғанҷы туста кізілер, ағырыбызып, имнег туразынзар айланзалар, оларның коронавирус ілезіне сығарылча - андағ 19 кирек. Пис кӱн аразына Москвадаң паза Санкт-Петербургтаң айланған пірер кізінің коронавируснаң ағырыбысханы ілезіне сығарылған.
Ағырчатханнарны чуртапчатхан орыннары хоостыра кӧрзе, Ағбанда - 266 кізі саналча, Алтай аймаанда - 94, Саяногорскта - 35, Ағбан пилтірі аймаанда - 35, Харатаста - 31, Шира аймаанда - 11, Боград аймаанда - 11, Асхыс аймаанда - 8, Абазада - 3, Пии аймаанда - 2, Таштып аймаанда - 1. Аннаң пасха, ағырчатханнар аразында Тываның ӱс чуртағҷызы, Хызылчар крайының ӱстӱнзархы чирлерінің ікі чуртағҷызы паза Новосибирск облазының пір чуртағҷызы пар. Пу саннарны пирче Хакасияча Роспотребнадзор управлениезі.
Республикада коронавирус тарап пастааннаң ала 89 кізі пу ағырығдаң оңдайланып алған. Сілкер айының 12-чі кӱніне имҷілер хайиинда 2134 кізі саналча, ол санда 47 кізі обсерваторзар чатырылған. Имнегні 369 кізі алча, ол санда 7 кізінің хазии аар паалалча, 2 кізі кии терапиязынаң тузаланча. ИВЛ оборудованиезі тынарға полысчатхан ағырығ кізі чоғыл тіп искірче республика пазының паза правительствозының пресс-службазы.
Хакасияда коронавирустың тарапчатханынаңар толдыра искірігнең танызып аларға чарир стопкоронавирус.хакасия.рф региондағы сайтта.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде