СУРЫҒНЫ ПОС КӰЗІНЕҢ ПӦГЕРЛЕР
20.05.2020
Хабарлар
Хакасия пазының орындызы Юрий КУРЛАЕВ
Сӧп-сап реформазы. Хакасия пазының орынӌызы Юрий Курлаев хабарӌыларға Шира аймаанда сӧп-сап реформазына теелчеткен сурығлар хайди пӧгілчеткеніне чарыдылған улуғ нимес прессконференция иртірген
Чоохтирға кирек, Шира аймааның чуртағӌылары, сӧп-сапты тартчатхан компания тоғызын хомай толдырчатханнаңар, аймахтың, республиканың устағ-пастаанзар айланып, сурығны пӧгерге сурынғаннар. Пу сурығ хоостыра чон аразында кӧп суум-саам полған. Анзы пілдістіг, ноға? Чонға похсахты тартчатхан ӱчӱн квитанциялар килчелер. Че сынында, тізең, сӧп-сап, контейнерлерге сыңмин, аннаң хости ӱӱнӌектерге чыыл парып чатча.
Анаң чилнең, аар-пеер тарап, Шира чазыларынӌа чайылып, чир-чайаанға ӱрег ағылча. Кізі хараан даа андағ кӧрім ӧріндірбинче. Откін чуртағӌылар, андағ кирекнең чараспин, чоллар хастада орныхчатхан чазыларда чайылчатхан похсахты сомға, видеоға суурып, Интернетсер сығар турғаннар. Паза ідӧк, ӱлгӱдегілерзер айланып, полызығ сурғаннар.
Юрий Курлаевтің таниинаң, пӱӱнгі кӱнде кӧп муниципалитетте чарадылбинчатхан орыннарда сӧп-сап тӧгілчеткені сығысча. Ол - республиканың полған на аал-городының ағырсымнығ сурии. Аннаңар пу сурығӌа чоннаң даа кӧп айланыс кірче. Пу наада Хакасия правительствозының устағ-пастаа Шира аймаандағы чонның айланызы хоостыра, чорыхха сығып, сурығны прай саринаң ӱзӱрген.
Андағ оңдайнаң «Аэросити-2000» регион операторы сӧп-сапты тартчатхан компаниянаң тоғынарын тохтатхан. Андағ чарадығ ӱр ниместе алылған. Аны хоостыра Шираның паза Жемчужнай аалларның чӧптері пос кӱзінең ол сурығны пӧгерлер. Олар орындағы предприятиелернең, хада-пірге тоғынып, айда нинӌе-де хати аалларӌа таарлағ машиназын позыт турарлар. Таныхтирға кирек, сӧп-сап реформазы чуртасха кирілер алнында пу сурығнаң муниципальнай пӱдістер постары айғасчаңнар. Андада аалларӌа, таарлағ машиназы чӧріп, чуртағӌыларның сӧп-сабын чыып парыбысчаң. Амды кирек хайди парарын тус кӧзідер.
Автор :
Ольга ТОМОЧАКОВА
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде