ХООС ЛИТЕРАТУРА ТІЛБЕСТЕЕНЕ ЧАРЫДЫЛҒАН
12.08.2020
Хабарлар
Пылтырғы литература лагерьінің араласчылары пӱӱл онлайн лагерьде полганохтар
Литература лагерьі - 2020. Регионнар аразыңдағы 4-ӌі чайғы литература лагерьі пӱӱл «Тал пазы» тіп адалған. Ол, Хакас тілі чылына чарыдылып, ікі неделя тоғынған
Че оол-хыстар кибірли Асхыс аймаандағы Чоғархы Тӧӧ аалдағы М.Е.Кильчичаковтың адынаң Литература музейінде чыылыспааннар. Коронавирус пандемиязы ӱчӱн, чиит чайаачыларға лекциялар Интернет пастыра хығырылғаннар. Оларнаң андағ тоғысты Саха (Якутия) Республиканың ученайлары паза Хакасияның писательлері апарғаннар.
Пастағы кӱнде прай араласчылар ідӧк онлайн Асхыс аймаандағы «Хуртуйах тас» музейзер, Казанов аалдағы национальнай музей-заповедниксер, Пии аймаандағы «Сос пилтірі» музейзер экскурсияа «чӧр килгеннер».
Анаң М.К.Аммосовтың адынаң Алтынзарых-Ӱстӱнзеркі федеральнай _ университеттегі Алтынзарых-Ӱстӱнзеркі чоннар тіллері паза культура институдының ученайлары чайаачы оол-хыстарны якут литературазынаң, аны пасха тіллерге тілбестир оңдайларнаң таныстырғаннар. Паза олар чииттерге хоос литературазының тілбесчізі специальнозын хайди алып алардаңар чоохтааннар.
Ікінҷі неделяда, тізең, Хакасияның писательлері хакас тілінің, литературазының тархынынаңар, аны пасха тіллерге тілбестир оңдайлардаңар чоох тутханнар.
Мындағ оңдайнаң, ікі неделя аразына тиксі 11 лекция хығырылған. Сығысхан сурығларға нандырығлар Zoom платформада ӱзӱрілгеннер.
Кибір хоостыра литература лагерьінің тоғызы соонаң Хакасияның Чайаачылар туразы чиит авторларның тоғыстарының чыындызын сығарыбысча. Пӱӱл кибелісчілер Светлана Акатованың паза Карина Кулумаеваның кибелістерінің чыындыларын сығарыбызар пӧгін турғызыл парған.
Валентина КАЙДАРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы