ПОС КИРЕЕНЕҢ АЙҒАСЧАТХАН ПОЛҒАН НА КІЗІ ААРЛЫҒ!
11.09.2020
Хабарлар
Тоғазығ. Хакасия Ӧӧркі Чӧбінің кнес орынӌызы, хазых хайраллирынӌа паза социальнай политикаӌа комитет кнезі Евгений Молостовтың депутат айланызы хоостыра республика пазы Валентин Коновалов Харатас городтың идінӌектерінең тоғасхан
Харатастағы паза пу городта тоғынарға сағынчатхан, че пасха орында чурттығ идінҷектері республика пазынаң тоғазыға «Минің пос киреем» кінде чығаннар. Ол Ағбан городта Чоннар ынархазы орамазындағы «Ынархас» гостиницаа хоза пӱдірілген офистер туразында орныхча. Чоохтирға кирек, кіннің улуғ нимес конференц-залы пар, хайда идінҷектерге тоғазығлардаң пасха ідӧк семинарлар иртірілче.
Тоғазығда Валентин Коноваловтаң паза Евгений Молостовтаң пасха ідӧк Хакасияның экономика тилізі министерствозының, Тиліс чыындызының тоғынҷылары, Хакасиядағы идінҷектернің праволарын арачылирынҷа уполномоченнай Василий Кудашкин, «Кимдегі Сибирь» килкім инвестиция проектінің республикадағы офис пастығы Михаил Крутских паза пасхазы араласханнар.
- Харатас хаҷан даа промышленность городы полтан, че алындағы чылларда ол тилізі хоостыра алнында парған полза, халғанҷы чылларда тиліс чоғыл, - таныхтаан Евгений Молостов. - Городта пар ікі промышленность орны: «Харатастағы» промпарк паза ИСКОЖ. «Харатастағы» промышленность паркында резидент атха турысхан идінҷектерге чахсы оңдайлар пирілче, ол сайҷа предприятиені тӧстепчеткен тусха чирні арендаа суурчатхан ӱчӱн тӧлег саналбинча. ИСКОЖ-та даа тыхтағ соонаң чахсы орыннар пар. Оларзар пос киреен азарға сағынчатханнарны тартарға кирек.
Чоохтирға кирек, Хакасия правительствозы городтың тиксі тилізінең тастыхти турбинча. Кічіг паза ортын пос киреенеңер чоохтаза, нацпроект хоостыра пір профильліг орыннарда пос киреенең айғасчатханнарға алында хабазығ кӧрімнері кӧріл парған. Хакасия пазы Валентин Коновалов анзына улуғ хайығ айландырған:
- Национальнай проекттер полызиинаң моногородтардағы идінҷектерге хабасчаң чахсы оңдайлар ікінҷі чылы чуртасха кирілчелер. Че нинҷе ахча хабазыға киректелчеткенін город устағ-пастаа пӧкче. Ол саринаң Харатастың устағ-пастаа уйан тоғынча. Итсе, республикадағы моногородтар чуртағҷыларының 40 проценті Харатаста чуртапча!
Хакасияның экономика тилізі министрінің орынҷызы Татьяна Речкова республикада идінҷектер саны хызырылчатханнаңар искірген, тымо сылтаанда, тізең, пос киреен чабысханнар саны пілдірте ӧзе халған. 2019 чылда тиксі республикада 16,6 муң идінҷек саналған полза, пӱӱл оларның саны 15,9 муң кізее тиңнелче. Олар 50 муң кізее тоғыс орнын пирчелер. Харатаста пос киреенең 2000 кізі айғасча, пӱӱл идінҷектер саны 133 кізее хызырыл парған. Татьяна Викторовнаның таниинаң, Харатаста идінҷектер саны пасха город-аймахтарның хыринда пілдірте хызырыл парған. Министр орынҷызы ідӧк идінҷектерге пирілчеткен ахчалығ, кредит, инфраструктура паза пасха хабазығ кӧрімнерінеңер чоохтаан. Чахсы хабазығ пирілчеттір «Харатастағы» промпарктың резиденттеріне. Пӱӱнгі кӱнге анда сигіс резидент санға алылған. Олар чир ӱчӱн аренда ахчазын тӧлебинчелер, предприятие туразын тимге сығарып алзалар, чирні посха пастырып алдаң оңдай пар. Ідӧк оларға инфраструктура тикке тартылча паза проекттерін чуртасха кирерге ниик оңдайлығ ӧдіске ахча аларға чарир.
Хакасияның тиліс чыындызының устағҷызы Денис Пауль «Минің пос киреем» кіннің тоғызын чарыт пирген. Анда чыындының ӱс кіні, пос киреене МФЦ паза Гарантия чыындызы орныхчалар. Идінҷекке пір орында прай даа сурығларны пӧгіп аларға чарир. Аннаң пасха, «Кічіг паза ортын пос кирее паза идіндектің пастаана хабазары» нацпроектче пос киреенең айғасчатханнарға аймах полызығлар пирілче: тиксі маркетинг кампаниязын тимнирінҷе (100 муң салковайдаң кӧп нимес), сығарчатхан ниме-нооға сертификат аларынҷа, эксперттернің чӧптерін аларынңа. Прай пу полызығларны идінҷектер тикке алчалар, ахчазын тиліс чыындызы тӧлепче. Ідӧк идінҷектерге Гарантия чыындызынаң ӧдіске ахчаны ниик проценттіг аларға чарир - 3 миллион салковайға теере 1 - 4,25 %-тіг. Процент сині залогха артызылған ис-пайнаң паза пасха кирексіністер толдырылғанынаң палғалыстығ.
Идінҷектерге пос киреен тилідерге паза пір оңдайны иптирінҷе тоғынча регионның толдырығлығ ӱлгӱзі. Ол килкім предприятиелерге аймах полызығларны читіреріне паза ниме-нооларны сығарарынҷа чахығларны толдырарына республикадағы идінҷектерні тартарынҷа тоғыс. Сағам правительство предприятиелернің кирексіністерінең танысча. Паза пір хабазығ орны, хайзы пу оңдайны тилітче - «Кимдегі Сибирь» килкім инвестиция проекті. Аның Хакасиядағы офизінің устағҷызы Михаил Крутских идінҷектерні проект сайтында санға турарға хығырған. Аның чооғынаң, пу портал пастыра 600 миллион салковайға чӧптезіглер иділ парған.
Тоғазыға килген идінҷектер хынғаннар пілерге, хайди промпарктың резиденті полыбызарға чарир? Министерствоның нандыриина иң ӧӧні - пос кирее Харатас городта орныхчатханы. Идінҷек Ағбан городта даа санға алылған полза, че аның пос киреенің хайдағ-да чардығы пу городта орныхчатса, ағаа чарир резидент полыбызарға. Идіндектернің кӧбізі пӱдіріг ниме-нооларын сығарарында тоғынчаттыр. Олар Хакасия пазынаң килчеткен чылға республикада хайдағ пӱдіріглер поларын паза нимедең пӱдірілерін азынада кӧр турарға сурынғаннар. Азынада чахығ иткені пӱдірігділерні илееде сидіксіністердең позыдарҷых тіпчелер олар.
- Піс хаҷан даа тоғазығларға паза хайдағ даа проекттерні, наа сағыстарны ӱзӱрерге тимдебіс, - таныхтаан экономика тилізі министрінің тоғызын толдырчатхан Виктор Богушевич. - Мин хаҷан даа тимдебін, че азынада пазын саларға кирек. Орынҷыларым айланыстарнаң тоғынарлар, пірдеезі хайығ чох халбас.
Валентин Олегович, тоғазығны тоозып, идінҷектернең тоғазығлар пасха даа муниципальнай пӱдістерҷе иртіріл турарына хайығ айландырған. «Піске пос киреенең айғасчатхан полған на кізі аарлығ!» - теен республика пазы.
Автор :
Наталья СУБРАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы