МАРЫҒДА ОЛАРНЫҢ УСТАРЫ ТАПТАЛЧА
20.10.2020
Хабарлар
«Абилимпикс-2020». 14 октябрьда Хакасиядағы профессиональнай технологиялар, экономика паза сервис колледжінде хазии уйан ӱгренӌілернің, студенттернің аразында «Абилимпикс» марығ республика синінде тӧртінҷі хати ирткен. Анда 72 араласчы узынаң сынасхан
Халғанҷы чылларда тоғысчы профессияларға хайығ матап айландырылча. Оларның устарын кӧдірер ӱчӱн, аймах марығлар иртірілче. Ол санда «Чиит устар» паза «Абилимпикс» марығлар.
Пӱӱл республикада хазии уйан оол-хыстарға «Абилимпикс» тӧртінҷі хати иртірілді. Чылдаң чылға араласчыларның саны хозылып одырча. 2019 чылда 49 ӧткін студент араласхан полза, пу чылда 72 кізі узынаң сынас кӧрерге чаратхан.
Марығ тиксі 16 кӧстегҷе ирткен. Полған на кӧстегҷе ӱгренҷілер, студенттер паза специалисттер алынҷа марығласханнар. Пӱӱл оларның тоғыстарын пӧзік пілістіг 54 эксперт паалаан. Олар марығ араласчыларының тудынчатханын, тоғыс хайди иділгенін сыныхтааннар.
Хакасиядағы уйан исчеткен олғаннар школа-интернадының, харах оды уйан палалар школа-интернадының паза Ағбандағы 17 № школаның ӱгренҷілері «Абилимпикс» марығда чыл сай аралазарға кӱстенчелер. Пӱӱл дее ол школалардаң илееде пала узынаң сынасхан. Олар марығда, пір дее чідірінмин, пирілген чахығларны чахсы толдырарға кӱстенгеннер. Чоохтирға кирек, мындағ марығда сыбыра араласханы олғаннарға хылыхтарын тыыдарға чахсы полысча. Паза оолах-хызыҷахтар школа тоозар алнындох хайдағ профессияа ӱгренердеңер сағынчалар.
«Ағас узанҷаң ус» компетенцияҷа ӱгренҷілер аразында прайзынаң артых Хакасиядағы уйан исчеткен олғаннар школа-интернадының ӱгренҷізі Евгений Беликов полған. Аның тоғызын эксперттер пӧзік паалааннар. «Чібекнең хоостиры» кӧстегҷе Пиидегі школа-интернаттың ӱгренҷізі Диана Григорук пастағы орынны холға кирген.
Студенттер дее чылдаң чылға «Абилимпиксте» хынып араласчалар. Іди «Халас итчең ус» компетенцияҷа прайзының алнына Татьяна Сагалакова сыххан. Хакасиядағы профессиональнай технологиялар, экономика паза сервис колледжінің студенті иң татхыннығ іпек паза оох халастар тимнеен.
«Сас иптеҷең ус» кӧстегҷе Галина Боргоякова чиңіс тутхан. Чиит хыс профессиональнай технологиялар, экономика паза сервис колледжінде тӧртінҷі курста ӱгренче. Галина сас иптирінең айғазарға хынча. Пеер ӱгренерге кіріп алғанда, ол пабазының, іҷезінің паза харындазының састарын хырығарға чаратхан. Сас хыплапчатханда, ол уғаа чӱрексеен. Че хыс тиктең не чочынған. Ол иң чағын кізілеріне састарын чахсы иптеп пирген. Амды ол сыбыра оларны хырыхча тіп поғдархаснаң таныхтапча Галина.
Ӱс чыл мының алнында Галина Чоохчыл аалдаң Ағбанзар ӱгренерге килген. Амды ол, узун тынағ кӱннері полза, тӧреен аалынзар маңзырапча. Анда аны туған-чағыннары сахтапчалар. Хайди ол таныхтапча, іҷе-пабазы ағаа чуртаста чахсы чӧлег полча. Олар аны, хайдағ даа сидіксініс полза, хол тӱзірбин, алнынзар ізеніснең кӧрерге ӱгретчелер.
Чарым чыл пазынаң ол, колледжті тоозып, дипломны холға алар. Че хыс колледжнең анымҷохтазарға маңзырабинча. Аның ідӧк ас-тамах тимнеҷең усха ӱгреніп алар сағыс пар.
- Мин ідӧк чиис тимнирге хынчам. Аннаңар іҷе-пабам мині ол кӧстегҷе ӱгреніп аларға чӧптепчелер. Сағынчам, ол профессия мағаа чуртаста тузалығ полар, - сағызынаң ӱлескен хыс.
Автор :
Ольга ТОМОЧАКОВА
| Пн | Вт | Ср | Чт | Пт | Сб | Вс |
| 31 | 1 | 2 | 3 | 4 | 5 | 6 |
| 7 | 8 | 9 | 10 | 11 | 12 | 13 |
| 14 | 15 | 16 | 17 | 18 | 19 | 20 |
| 21 | 22 | 23 | 24 | 25 | 26 | 27 |
| 28 | 29 | 30 | 1 | 2 | 3 | 4 |
Кӱн таңмазы
Хакасияда
Россияда
Тилекейде
