Сергей Меняйло "Имӌiлерге полыс пирерге кирекпiс"
12.11.2020
Хабарлар
************************************************************************************
Пӱӱн Россия Президентiнiң Сибирьдегi федеральнай округча полномочиелiг кiзiзi Сергей Меняйло Хакасия правительство туразында коронавирус тарапчатханынаң тоғыр кӱрезерiнӌе штаб чыылиин иртiрген. Анда республиканың устағ-пастаа, министерство-ведомстволар, Роспотребнадзор паза Росздравнадзор управлениелерiнiң устағӌылары, Хакасияның хай пiрее имнег учреждениелерiнiң ööн имӌiлерi араласханнар.
Тоғазығда Сергей Меняйло регионда кирiлген санитарно-эпидемиология нормаларына хайди даа тудынарға киректеңер таныхтаан. "Хакасияда ағырығны тараттырбас ӱчӱн пiс прай кӱс саларға кирекпiс. Пӱӱн ол республика ӱлгӱзiнiң, сыныхтағлығ органнарының ööн пöгiнi полча", - теен ол. Улуғ хайығ айландырарға кирек профилактика мероприятиелерiне, ööнiнде чуртағӌыларнаң чарыдығлығ тоғыс апарарына, хосхан Сергей Иванович.
Штаб чыылиинда iдöк имнег учреждениелерiнзер тоғынӌыларны хозар сурығ ӱзӱрiлген. Iди вузта имнег киреене ӱгренчеткен студенттернi полызыға тартарға чарадығ алылған. Коронавируснаң ағырчатханнарға хоза орғаннар азар ӱчӱн, Саяногорсктағы паза Ағбан пилтiрiндегi имнег учреждениелерiн пу чағында азарға кирек. Таныхтирға кирек, аның алнында пу учреждениелер ноябрьның ортызында паза декабрьның пастағы чардығында азыларға кирек полғаннар.
Iдöк чыылығда тест иртiрчеткен лабораторияларның тоғызынаңар чоох парған. СФО-ның полномочиелiг кiзiзi Сергей Меняйлоның кöрiзiнең, Хакасияа тест иртiрӌең хоза имнег оборудованиелер аларға кирек. Аннаң пасха, штаб чыылиинда табырах полызығ пирчеткен службаның тоғызының ағырсымнығ сурығлары ӱзӱрiлген. Имнер чидiспинчеткен сурығны пöгiбiзер ӱчӱн, полған на аптеканы хайыға алып, хайда паза хайдағ им кирек полчатханын пiлiбiзерге кирек.
"Коронавируснаң ағырчатханнар тузында паза толдыразынаң имнег полызиин ал полбинчатхан сылтаанда, Хакасияда кирек хатығ. Республиканың хазых хайраллиры тудығ чох тоғын сыххан ӱчӱн, пiске орта чарадығлар аларға кирек. Пiс имӌiлерге полыс пирерге кирекпiс", - теен Сергей Меняйло.
12 ноябрьға Хакасияда 8 876 кiзi коронавируснаң ағырыбысхан. Стационарда 511 кiзi, имӌiлер хайиинда - 3588, хазыхтанып алған - 6 муң азыра кiзi. Эпидемия пасталғанынаң, СФО-да 84 кiзi коронавирустаң ӱреен.
************************************************************************************
Автор :
ОКСАНА Сунчугашева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы
Хакасияда
Россияда
Тилекейде