Ööн пöгiн - чуғынӌахтың öзiзiн тохтадарға
27.11.2020
Хабарлар
Пӱӱн Хакасия правительствозындағы коронавирус тарапчатханынаң тоғыр кӱрезерiнӌе штаб чыылии ирткен. Пу тоғысты апарарынӌа нандырығлығ ведомстволар, министерстволар апарылчатхан тоғыстарынаңар искiргеннер.
- Пiс апрель айдаң сығара ковид госпитальларында тоғынчатхан имӌiлернi кӱннiң сай хайығда тутчабыс. Киӌее ковид госпитальында 861 имнег тоғынӌызы iстенген, пӱӱн, тiзең, 868. Имнег тоғынӌыларының хозымы кöрiнче, - искiрген хазых хайраллаӌаң министрiнiң тоғызын толдырчатхан Александр Стреленко.
Харатастағы паза Ағбандағы имнег тураларында сах андох имнег полызиин пирӌең имӌiлер чидiспинче. Анзы, чуртағӌылар ағырыбызып, оларны ла хығыртыбысчатханынаң палғалыстығ. Чуртағӌылар табырах полызығ службазынзар айланғанынаң тиңнестiрзе, сах андох имнег полызиин пирӌең имӌiлернiң хығыртығлары 2-3 хати кöп кiрче.
Хайди таныхтаан Хакасия пазы Валентин Коновалов, пӱӱнгi кӱнде наа чуғынӌах ағырығның öзiзiн тохтадып, Хакасияның имнег учреждениелерiне тоғыстарын сала даа нииктирге кирек. Iдöк тоғыс апарылча амбулаторно-ковиднай паза пiрге искiрiглiг кiннернiң тоғыстарын чахсыландырарынӌа. Республикадағы мобильнай öмелер кöп чон чыылысчатхан орыннарда Роспотребнадзорның кирексiнiстерiне хайди тудынчатханын сыныхтапчалар.
Хакасияның Роспотребнадзор, ӱгредiг паза наука министерствозы искiргеннер, регионда ОРВИ-наң ағырчатхан ӱгретчiлер, ӱгренӌiлер паза студенттер аразында чылдағы ортымах кöзiдiмнерi пöзiк нимес. Аннаңар штаб чыылиинда 30 ноябрьдаң сығара Ағбандағы, Харатастағы, Саяногорсктағы паза Ағбан пилтiрiндегi школаларның, техникумнарның паза колледжтернiң ырахтын ӱгренчеткеннерiн тохтадарға чарадарға. Орындағы пос устаныстарға, муниципалитеттерде санитарно- эпидемиологическай оңдайларны хайыға алып, постарына ӱгредiг оңдайларын таллирға.
Халғанӌы сутка аразына республикада чуғынӌах ағырығдаң 290 кiзi хазыхтанып алған. Тиксi оларның саны 8226 кiзi. Пандемия пасталғаннаң республикада 11520 кiзi COVID-19 ағырыға хаптырған. 216 кiзiнiң пу ағырии аар иртче, ИВЛ-да 17 кiзi. Амғы туста республикада коронавирустаң 106 кiзi ӱреен.
Автор :
Наталья Тюкпеева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы