Прайзына Наа чыл сыйыхтары
23.12.2020
Хабарлар
Хакасияның национальнай паза территориальнай политика министерствозы пӱӱн кибiрге кiр парған Чоннар аразындағы нацияларның Наа чыл иирiн иртiрген. Пӱӱл аны мының алнындағызынаң пасха таныхтирға килiскен. Хайди таныхтааннар, чуртас пос кирексiнiстерiн кирче. Андағ даа полза, аймах нация чоны хати тоғазып, öрiнген.
Хакасияның национальнай паза территориальнай политика министрi Михаил Побызаков, прайзын алғыстап, чоох тутхан:
- Аарлығ аалӌылар! Пӱӱн пiс, Наа чылны удурлап, ирткен чылның салтарларын итчебiс. Пӱӱн Хакасия нациялары аразындағы чалахай иир иртче. Сыннаң чоохтаза, 2020 чылны тоозарға сидiк.
Пӱӱл пiс республика синiндегi ӱлӱкӱннернi иртiр полбаабыс. Че Интернетсер паза телевидение пастыра кöп онлайн мероприятие паза марығ ирткен. Чон оларда öткiн араласхан. Хакас тiлi чылы хоостыра марығлар чуртасха кирiлген, чиңiсчiлер адалғаннар. Хакасияның Улуғлар чöбi, "Алтынай" хакас ипчiлер чöрiмi, министерстволар мероприятиелернi иртiрерiне улуғ хозым иткеннер. Кадышевтiң адынаң культура кiнiне улуғ алғыс! Хайди даа полза, киректер килiскен. Мыннаң мындар iдöк, хада-пiрге ынағ тоғынып, чахсы чуртирбыстар. Прайзын чағдапчатхан Наа чылнаң!
Чалахай иирде кöп сöбiре паза халых пiрiгiзi сыйыхтарнаң таныхтатхан. Хакас тiлi чылына чарыдылған "Тöреен тiл - чонның худы" сöбiрелер фестиваль-марииның чиңiсчiлерiне ахчалығ сертификаттар читiрiлген. Ол Табурчиновтар, Боргояковтар, Шулбаевтер, Макиннер полчалар. Халых пiрiгiстердең "Алтынай", "Шория", "Аран-Чула", "Согдиана", "Чосон" паза прай пасха нациялар сыйыхтатханнар.
Чыылған чон, удур-тöдiр часка, хазых, ынағ чуртас алғап, ибзер чарых кöңнiлiг нанған.
Автор :
Елена Сагатаева
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде