Чибiргi муңны алтабысты
25.01.2021
Хабарлар
Пу неделя пасталчатханда, CОVID-19 ағырығдаң тоғыр кӱресчеткен штабтың кiзiлерi Хакасия правительствозының туразында пазох чыылыстылар.
25 январьға Хакасияда «коронавирус» диагнозтығ 59 кiзi имненiп алған. Наа чуғынӌахтаң озып алғаннарның тиксi саны – 18341 кiзi. Халғанӌы суткада республикада COVID-19 ағырығны 77 кiзi хаптырып алғаны iлезiне сығарылған (Ағбан г. – 23, Саяногорск г. – 12, Харатас г. – 14, Ағбан пилтiрi аймаа – 10, Боград аймаа – 4, Асхыс паза Алтай аймахтары – ӱзер, Таштып, Шира, Орджоникидзе аймахтары – iкiлер, Сорығ г. паза Пии аймаа – пiрер). Аар ағырчатханнарның санында 64 кiзi, ИВЛ аппаратта – 10. Пандемия пасталғанынаң пӱӱнгi кӱнге теере Хакасияда наа чуғынӌах ағырыға хаптырған 20061 кiзi санға алылған. Ачырғасха, ирткен суткада республикада коронавирустаң iкi кiзi ӱреенi таныхталған. Чуғынӌах ағырығ хайынчатхан туста ӱрееннернiң тиксi саны – 370 кiзi.
Чыылығда Хакасияның хазых хайраллаӌаң министрiнiң тоғызын толдырчатхан Александр Стреленконың искiриинең, пӱӱнгi кӱнде имнег тураларында коронавирустаң имненӌең 1057 орған пар, оларның 523-зi (49%) пос турча, аннаңар Г.Я.Ремишевскаяның адынаң республиканың имнег туразындағы хирургия корпузында чуртағӌыларны COVID-19 ағырығдаң имнирiн тохтадарлар. Iди 200 орған хызырылар.
Таныхтирға кирек, республикада коронавирустаң тоғыр прививка турғысчаң тоғыс хыызында парча. Ирткен неделяда пiстiң регионда 3347 кiзi вакцинация ирткен. Пу кӱннерде Хакасиязар 2000 вакцина чидер. Февраль айның пастағы кӱннерiнде 8800 вакцина ағыларлар.
– Иң пурнада 65 чазын алтабысхан паза имнелбинчеткен ағырығлардаң ирееленчеткен, че наа чуғынӌахтаң тоғыр прививка турғызарға чарадылчатхан кiзiлернi вакцинация иртiрiбiзерге кирек. Олар коронавируснаң най аар ағырчалар, – теен Хакасия пазы Валентин Коновалов. – Iдöк хазна паза орындағы ӱлгӱ органнарында тоғынчатхан кiзiлерге, аймах учреждениелерде iстенчеткен öмелерге прививка турғызарға. Анзын муниципалитеттер устағӌылары хайығда тударға киректер.
Роспотребнадзорның Хакасияӌа управлениезiнiң устағӌызы Татьяна Романованың искiриинең, республиканың ӱгредiг организацияларында чуғынӌах iчеге ағырығлары тоғас сыхты. Аннаңар ол школаларда паза олған садтарында, чiӌең ниме пызырып, олған-узахты паза ӱгренӌiлернi азырапчатхан тоғынӌыларны ротовирусха, норовирусха паза астровирусха сыныхтирға чöпнең айланған. Кискектеңер чоохтаза, пу ағырығ Хакасияда хайынғалах. Итсе, хонӌых Хызылчар крайында илееде чуртағӌы кискектепче, аннаңар пiстiң республиканың чуртағӌыларына сиргек поларға кирек. Пылтыр пiстiң регионда кискек январьның халғанӌы неделязында тарап пастаан.
Автор :
Татьяна Тютюбеева
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде