Коронавирус анымӌохтазарға тимде ни?
10.02.2021
Хабарлар
Хакасия правительствозындағы коронавирус чуғынӌах ағырығ тарапчатханынаң тоғыр кӱрезерiнӌе оперативнай штабтың теестегi чыылии ирткен.
10 февральға Хакасияда коронавирус диагнозтығ 37 кiзi имненiп алған. Наа чуғынӌахтаң озып алғаннарның тиксi саны – 19451. Халғанӌы суткада республикада COVID-19 ағырығны 28 кiзi хаптырып алғаны iлезiне сығарылған (Ағбанда – 9, Саяногорскта паза Ағбан пилтiрi аймаанда – iкiлер, Харатаста – 4, Асхыс аймаанда – 7, Алтай, Боград паза Орджоникидзе аймахтарында – пiрер). Аар ағырчатханнарның санында 55 кiзi, ИВЛ аппаратта – 5.
Пандемия пасталғаннаң пӱӱнгi кӱнге теере Хакасияда наа чуғынӌах ағырыға хаптырған 20857 кiзi санға алылған. Ачырғасха, ирткен суткада республикада коронавирустаң 4 кiзi (78 частығ ирен паза 73, 80, 87 частығ ипчiлер) ӱреенi таныхталған. Чуғынӌах ағырығ хайынчатхан туста ӱрееннернiң тиксi саны – 407 кiзi.
Чыылығда Хакасияның хазых хайраллаӌаң министрi Олег Ананьевский республикада иртiрiлчеткен тесттердеңер, имнег тураларындағы орғаннардаңар паза вакцинациядаңар искiрген. Аның чооғынаң, 9 февральда чуртағӌыларға тиксi 1178 тест иртiрiлген, норма хоостыра, тiзең, кӱнде 1100 тест алыларға кирек. Олған садтарында паза школаларда коронавирус ағырығ сығыс килче, аннаңар ӱгредiг учреждениелернiң тоғынӌыларынаң пу наа чуғынӌах ағырыға анализтер алылар. Чонға социальнай полызығ пирчеткен тоғынӌылар iдöк коронавирусха тест иртерлер. Лабораториялар пу тоғысты апарарға тимделер.
Имнег тураларындағы орғаннардаңар чоохтаза, пӱӱнгi кӱнге олар хызырылчалар. Тиксi 641 орған пар. Пос турчатхан орғаннар кöп. Н.М.Одёжкиннiң адынаң харах имнеӌең турада кiзiлернi коронавирустаң имнирге саңай тохтат салдылар. Амды пу имнег туразы позының ööн тоғызын толдырар. Республиканың имнег туразында iдöк хаӌан-да COVID-ха позыдылған орғаннарны хызырчалар.
Олег Васильевич республикада прививка хайдағ синде апарылчатханнаңар чоохтаанох. Пӱӱнгi кӱнге теере Хакасиязар тиксi 11652 доза вакцина килген, 7826 кiзi (республика чуртағӌыларының 3%-i) прививка турғыстырып алған. Ам 3821 доза вакцина халған, ол алты кӱнге чидер. Регионда вакцинаның iкiнӌi чардығы öткiн турғызыл сыхты, аны 2042 кiзi алды. Кӱнде пастағы вакцина 650 кiзее пирiлзе, iкiнӌi вакциназы 500 кiзее турғызылча. Субботада пастағы вакцинаның 4200 дозазы республиказар чидер.
Хакасияның юстиция паза региональнай безопасность киректерiнӌе министрi Сергей Ромашовтың искiриинең, ОВД паза Росгвардия тоғынӌылары республикадағы учреждение-предприятиелер коронавирустаң тоғыр режимге тудынчатханнарын тöремiл сыныхтапча. Пу тоғысты апарар ӱчӱн регионда 1032 мобильнай группа тöстелген. Олар ирткен iкi неделя аразына тиксi 4675 объект сыныхтааннар: 2537 садығ туразын, бытовой полызығлар пирчеткен 1031 объекттi, 190 кафе-столовайны, 31 спорт учреждениезiн, чонны аар-пеер тарт чöрӌең 542 объекттi паза 14 сыныхтағ кинотеатрларда ирткен.
Сыныхтағлар хоостыра 76 протокол пазылған. Iкi неделя аразына 51 материал кöрiлген: 18 кирек хоостыра штраф салылған (тиксi cинi 19 муң салковай) паза 28 кирекче сизiндiрiг идiлген.
Мобильнай группалар, республиканың аймахтарында сыныхтағлар иртiрiп, ыраххы аалларзар даа читкеннер. Iди олар Саяногорскта паза Ағбан пилтiрi, Таштып, Орджоникидзе аймахтарында полғаннар. Махтирға кирек Таштып паза Орджоникидзе аймахтарын, анда сыныхтағлар тирең иртiрiлзелер дее, сайбағлар iлезiне сығыспаан. Кафе-столовайларда даа, садығ тураларында даа коронавирустаң тоғыр режимге нандырығлығ тудынчаттырлар. Ағбан пилтiрi аймаанда оох читпестер iлезiне сығысхан, оларға сизiндiрiг идiлген. Саяногорскта режимге тудынминчатхан сайбағлар пар.
Амды COVID-19 ағырығ тариры республикада кӱннең кӱнге сала амырапча. Хакасияның пу чахсы салтарын федеральнай СМИ-лар даа таныхтапчалар. Че пос салынарға ам даа ирте. Наа чуғынӌах мыннаң мындар позын хайди кöзiдерi пiлдiзi чоғыл, аннаңар iдöк ле маска режимiне тудынарға паза холларны сыбыра чуурға кирек.
Автор :
Татьяна Тютюбеева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы