Ағас киреенде сайбағлар чох ползын
13.02.2021
Хабарлар
Хакасия пазы Валентин Коновалов ирткен неделяда регионда ағас киреенде алызығлар кирерiнҷе чыылығда арығ законнары толдырылчатхан хоостыра сыныхтағлар санын хозарға, чарадығ чох ағас узурылчатханынаң, ағасты оғырлапчатханынаң, туюххан оңдайларнаң кӱрезiгнi тыыдарға паза сайбағлар ӱчӱн айландыр полбас иде хатығлирға пӧгiн турғысхан.
– Хакасияда теңмес оңдайлығ кiзiлер чох полар. Прай пыролығ кiзi турыстыра хатығлаттырар. Сыданминчатхан пастыхтарның орыннарына наа кiзiлер алылар, – таныхтаан Валентин Коновалов.
Киҷее право хайраллаҷаң органнар кiзiлерi «Хакасияның арығлары» республиканың автономнай пiрiгiзiнiң устағҷызы Андрей Васильевтi тутханнар. Ол ағас садызарынҷа чӧптезiг иткен ӱчӱн, туюххан 4 миллион салковай алғанында чiглендiрiлче. Ӏстезiгҷiлер кӧрiзiнең, ахчаның чардығы пасха кiзее читiрiлерге кирек полған. Пу кирек iстезiлче.
– Хайдағ даа туюххан ахча алғанынҷа сайбағлар хатығ тохтадыларға кирек, — чарытхан республика пазы. — Мындағ сайбағны иткеннер, анзы киречiлелген полза, толдыразынаң хатығласха тартыларға киректер. Регионда коррупцияны тохтадарынҷа тоғысты ӧткiн апарчатхан ӱчӱн, республиканың право хайраллаҷаң органнарын алғыстапчам. Пу кӧстегҷе хада-пiрге тоғызыбыс узарадылар.
Автор :
Тимнеен Наталья Субракова
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде