21 муңны ас парыбысты
15.02.2021
Хабарлар
Хакасия правительствозындағы коронавирус чуғынӌах ағырығ тарапчатханынаң тоғыр кӱрезерiнӌе штабтың теестегi чыылии ирткен.
15 февральға Хакасияда «коронавирус» диагнозтығ 12 кiзi имненiп алған. Наа чуғынӌахтаң озып алғаннарның тиксi саны – 19616. Халғанӌы суткада республикада CОVID-19 ағырығны 30 кiзi хаптырып алған (Ағбанда – 14, Саяногорскта – 4, Асхыс паза Алтай аймахтарында – ӱзер, Боград аймаанда – 2, Харатаста, Абазада паза Ағбан пилтiрi, Пии аймахтарында – пiрер). Аар ағырчатханнарның санында 46 кiзi, ИВЛ-да – 7. Пандемия пасталғаннаң пӱӱнгi кӱнге теере Хакасияда наа чуғынӌах ағырыға хаптырған 21006 кiзi санға алылған. Чуғынӌах ағырығ хайынчатхан туста ӱрееннернiң тиксi саны – 424 кiзi.
Хакасияның хазых хайраллаӌаң министрi Олег Ананьевскийнiң искiриинең, пӱӱнгi кӱнде Г.Я.Ремишевскаяның адынаң республикадағы ööн имнег туразының терапия корпузын позыдарға сурығ турча. Пу корпусты чуртағӌыларны CОVID-19 ағырығдаң имнирге тöcтееннер. Пöгiн хоостыра терапия корпузы март айның пастағы кӱннерiнде позының ööн тоғызын толдырып пастир. Пурнада аны чахсы арығлабызарлар.
Ирткен неделяда Ағбан пилтiрiнде «ковид» корпузы тоғын сыххан. Андағы 1, 2 паза 3 хадылларда 38 орғаннығ стационар азыл парған. Пневмониянаң ағырчатханнарны пу корпуста имнепчелер. Имнег туразының 4 паза 5 хадылларында тыхтағ тоғыстары узарадылча. Пӱдiрiгӌiлер аны часхызын тоозарлар тiп молӌапчалар.
Пӱӱнгi кӱнде республикада CОVID-19 чуғынӌахнаң ағырчатханнарға 641 орған пар, оларның 261 орған пос турча.
Прививкадаңар чоохтаза, 15 февральға республикада вакцинаның пастағы чардығын тиксi 10050 кiзi турғыстырып алған, iкiнӌi чардығын – 3281 кiзi. Ам пастағы вакцинаның 1596 дозазы халған, iкiнӌi вакцинаның – 8000 азыра доза. Тынағ кӱннерiнде хар чағаннаңар, субботада вакцинаны ағылчатхан самолёт Москвадаң Хакасиязар килбеен. Амды аны 17 февральда сахтапчалар.
Автор :
Татьяна Тютюбеева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы