Прививканы öткiн турғыстырчалар
18.02.2021
Хабарлар
Киӌее Хакасия пазы Валентин Коновалов, республикада коронавирус чуғынӌах ағырығны тохтадар сурығларны ӱзӱрiп, имӌiлернең паза ӱлгӱдегi кiзiлерiнең пазох штаб чыылиин иртiрдi.
Хакасияда 18 февральға «коронавирус» диагнозтығ 35 кiзi имненiп алған. Наа чуғынӌахтаң озып алғаннарның тиксi саны – 19719 кiзi. Халғанӌы суткада республикада COVID-19 ағырығны 34 кiзi хаптырып алған (Ағбанда – 16, Саяногорскта паза Харатаста – пизер, Сорығ паза Ағбан пилтiрi аймаанда – пiрер, Асхыс аймаанда – 3, Таштып аймаанда – 2). Аар ағырчатханнарның санында 35 кiзi, ИВЛ-да – 4. Пандемия пасталғаннаң пӱӱнгi кӱнге теере Хакасияда наа чуғынӌах ағырыға хаптырған 21094 кiзi санға алылған. Ачырғасха, ирткен суткада республикада коронавирустаң ӱс кiзi ӱреенi таныхталған. Чуғынӌах ағырығ хайынчатхан туста ӱрееннернiң тиксi саны – 433 кiзi.
Пӱӱнгi кӱнде республикада COVID-19 чуғынӌахнаң ағырчатханнарға имненӌең 641 орған пар, оларның 274 пос турча, 367 орғанда кiзi чатча.
Прививкадаңар чоохтаза, республиказар вакцинаның пастағы паза iкiнӌi чардығының тиксi 16 муңа чағын дозазы кiрген. Пастағы чардығын тиксi 11263 кiзi турғыстырып алған, iкiнӌi чардығын – 3491 кiзi. 60 час алтабысханнарның аразында 1557 кiзi прививка алған. Амды пастағы вакцинаның 4583 дозазы халған, iкiнӌiзiнiң – iкi хати кöп. Ол февраль ай тоозылғанӌа чидер. Пу килчеткен суббота-позырахта Москвадаң хоза 2600 доза килер, аархы неделяда, тiзең, анӌох син вакцина чидер.
Таныхтирға кирек, вакцинация республиканың прай аймах-городтарында иртче. Прививканы 18 час толдыр салған паза кискектебинчеткен чуртағӌылар турғыстыр поларлар. Аның ӱчӱн чуртапчатхан адрес хоостыра имнег туразының прививкалар турғысчаң кабинетсер паспорттығ, ОМС полистiг паза СНИЛС-тығ айланарға кирек.
Чыылығда Хакасияның хазых хайраллаӌаң министрi Олег Ананьевскийнiң искiриинең, тӱрчедең Ағбандағы иргi пала тапчаң тура тiс имнеӌең имнег туразы пол парар. Г.Я.Ремишевскаяның адынаң республиканың ööн имнег туразындағы терапия корпузы, коронавируснаң ағырчатханнарны имнирге тохтадып, март айдаң сығара позының тоғызын толдырар.
Автор :
Татьяна Тютюбеева
Пн | Вт | Ср | Чт | Пт | Сб | Вс |
26 | 27 | 28 | 29 | 1 | 2 | 3 |
4 | 5 | 6 | 7 | 8 | 9 | 10 |
11 | 12 | 13 | 14 | 15 | 16 | 17 |
18 | 19 | 20 | 21 | 22 | 23 | 24 |
25 | 26 | 27 | 28 | 29 | 30 | 31 |
Кӱн таңмазы
Хакасияда
Россияда
Тилекейде