Чылығ пирерiнде ам даа сидiксiнiстер пар
19.02.2021
Хабарлар
Киҷее Хакасияның правительствозында аал-городтар пастарынаң селектор чыылии ирткен. Ол ӧрт сығызар паза суғ тазар тусха тимненiске, чылығ пирҷең тусха, «Городта истiг оңдайлар тӧстирi» регион проектiне чарыдылған.
Хакасия пазының орынҷызы Юрий Курлаев суғ тазар, ӧрт сығызар тусха тимненiс хайди парчатханнаңар чоохтаан. Хакас гидрометцентр сананыстарынҷа, тағлығ орыннарда Ағбан суғ хастада харның тиреңi 90-130% тиңнелче, Ким суғ хастада – 215%, Том суғ хастада – 190%. Райковтар аалы хыринда Ағбан суғда пустың халыны 115 сантиметрге тиңнелче, анзы ортымах синнең 15 сантиметрге кӧп.
Пу чағында сағыбаан саайларны сизiндiрерiнҷе паза оларның салтарларын чох идерiнҷе комиссия, Абаза городта пол килiп, Ағбан суғдағы пустың халынын синебiскен. Пус пылтырғызынаң халын, аннаңар чара чачырасты iкi хати иртiрерге килiзер.
Юрий Курлаевтiң таниинаң, суғ тазарына тимненiске муниципальнай пӱдiстерге ахча кӧрiл парған, че ол син ахча читкiҷе полбас. Аннаңар республиканың финанстар министерствозынзар, хоза ахча сурап, айланарға килiзер.
Хакасияның пӱдiрiг паза чурт-коммунальнай хоных министрi Валерий Келин чылығ пирҷең тус хайди иртчеткеннеңер чоохтаан. 11-17 февральда республиканың ЖКХ объекттерiнiң тоғызында 7 улуғ нимес саай пол парған, оларның 3-i - Хубачардағы котельнайында. Чылығ читкiҷе пирiлбинчеткеннеңер, котельнайның ээзiне сизiндiрiглер пирiлген. Амғы туста котельнайны муниципалитет холына пирердеңер сурығ кӧдiрiлче. Хакасияның пазы Валентин Коновалов чуртағҷыларға чахсы коммунальнай полызығлар пирер паза котельнайда тыхтағ тоғыстарға ахчаны кӧр салар ӱчӱн, аны муниципалитет холына пирерiнҷе тоғысты чапчаң пӧгерге кирек тiп таныхтаан.
«Городта истiг оңдайлар тӧстирi» регион проектi хоостыра иптирге кӧрiлген 19 тура ибiркiзi паза кӧп чон чӧрчеткен 5 орынҷа муниципальнай чӧптезiг идiл парған.
Автор :
Оксана Челтыгмашева
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы