Хатығластар нымзадылча
19.02.2021
Хабарлар
Хакасияда пандемия ӱчӱн кирiлген хатығластар нымзадылча. Аннаңар искiрген кöнi эфирде Хакасия пазы Валентин Коновалов.
Амды республикада суткада 20-40 кiзi ағырығны хаптырып алғаны iлезiне сыхча. Ағырыбысханнарның саны хызырылып пастаанда, кӱрген айынаң пасти хай пiрее хатығластар суурылча, ол санда пландағы имнег полызиин пирерiн, культура паза спорт учреждениелернiң тоғызын айландырарын.
"Городтың истiг оңдайлары" программа хоостыра республикада 90 орын иптелерге кирек. Программада 5 город паза 11 аал араласча. Муниципалитеттер 1 мартха теере толдырар тоғысха чöптезiглер ит саларға киректер, че прайзы ла аны итпеен. Хакасия пазы Валентин Коновалов чöптезiг итпеен муниципалитеттернiң ахчалары пасхаларына пирiлер тiп сизiндiрген.
Аннаң пасха, кöнi эфирде ӱгредiг, чурт-коммунальнай хоных, ағастар узурар, имнег сурығлары ӱзӱрiлген.
Халғанӌызында Валентин Коновалов 2021 чыл Хакас чонның алыптығ нымағы чылы полчатханын таныхтаан. Пӱӱл хакас культуразына, тiлiне чарыдылған 200 азыра мероприятие полары кöрiл парған.
Iдöк ол республиканың чуртағӌыларын чағдапчатхан Ада чир-суубыс арачылағӌызы кӱнiнең алғыстаан.
Автор :
Оксана Сунчугашева
| Пн | Вт | Ср | Чт | Пт | Сб | Вс |
| 29 | 30 | 31 | 1 | 2 | 3 | 4 |
| 5 | 6 | 7 | 8 | 9 | 10 | 11 |
| 12 | 13 | 14 | 15 | 16 | 17 | 18 |
| 19 | 20 | 21 | 22 | 23 | 24 | 25 |
| 26 | 27 | 28 | 29 | 1 | 2 | 3 |
Кӱн таңмазы
Хакасияда
Россияда
Тилекейде
