Пасхалалча ба ипчiлернiң пос кирее?
04.03.2021
Хабарлар
Ипчiлернiң чоннар аразындағы кӱнiне удур Хакасиядағы «Минiң пос киреем» кiн пу неделяда «Ипчiлернiң пос кирее амғы туста: пасхалалчатхан сарилары паза тилic оңдайлары» тренинг иртiрче.
Кӧрiк айының пастағы кӱнiнде тренинг араласчылары ипчiлернiң пос кирее нимезiнең пасхалалчатханына нандырығ тiлееннер. Нандырығны Наталья Новикова табарға полысхан. Ол «Конверсия» пос киреенең пӧзiк школазының (Ярославль город) проект паза наука тоғызының пӧлiк пастығы, тархын наукаларының кандидады, ӱгретчi паза бизнес-тренер полча. Пiлдiстiг, iстезiг тiлiнде «ипчiлернiң пос кирее» оңнағ чоғыл, андағ даа полза, пу кӧстегҷе удаа алынҷа ӱгредiг апарылча. Анзы ӧӧнiнде ипчiлернi иреннернең тиң оңдайларда тоғын поларына тимнирiнең палғалыстығ.
Ӏкiнҷi кӱнiнде «Конверсия» школаның ӧӧн директоры Татьяна Артёменкова пос кирее сағызын тӧстир, аны хайдағ даа туста ӱреге кiрбес оңдайлығ идер чолларнаң таныстырған. Пос киреен азып, хайдағ даа кiзi нандырығлығ хаалағ итче. Аннаң кӧп ниме палғалыстығ. Аннаңар пос киреенеңер сағысты чуртасха кирер алнында кiзее, прай сарин чахсы паалап, прай кӱзiн сананып, тимненерге кирек. Садығ туразын азыбысса, ол позы ла парыс ағыл сыхпас. Ээзiне садығ туразының тоғызының полған на «чардығының» тузазын тӧремiл тиксi паалап турарға кирек. Парысты санирға прайзы пiлче полар, че аны идiп алары прайзына ла пирiлбинче.
Кӧрiк айының 3-ҷi кӱнiнде «Конверсия» школаның маркетинг паза садығ пӧлиинiң пастығы Татьяна Адеева пос киреен сабландырар оңдайларны чарытхан. Ӧӧнiнде социальнай сетьтердеңер чоох парған: оларның оңдайларынаңар, пос киреенеңер орта пазардаңар паза кӧзiдердеңер, наа оңдайлардаңар.
Пӱӱн-таңда тренинг ипчi кiзее тоғыстағы паза пос тузын орта паза чахсы тузаланарына чарыдылар паза аның пастағҷы полҷаң оңдайларын алғыдарынаңар чоох парар. Пу тренинг Zoom платформада иртче. Андар кiрер ӱчӱн тренинг иртiрчеткеннер араласчаа хығыртығ ысчалар. Аны пастыра кiзi конференцияа хозылча. Ӏдӧк хайдағ даа семинар-тренингке пазын салар ӱчӱн, кiзее «Минiң пос киреем» кiннiң сайтында санға турарға кирек, андада аның пос пӧлии полар.
Чоохтирға кирек, Хакасиядағы «Минiң пос киреем» кiн пос киреенең айғасчатханнарға паза аны тӧстирге пӧгiнчеткеннерге тӧремiл тикке ӱгредiг семинар-тренингтер иртiрчелер. Пӱӱн 16.00-17.30 часта ағбандағы бизнес-тренер Александр Николаев «Мессенджерлер паза социальнай сетьтер пастыра садығлар» мастер-класс иртiрер. Таңда идiнҷек паза SMM-специалист Дарья Гераськина «Социальнай сетьтерде табырах сабланғаны» семинар иртiрер. Кӧрiк айының 9-ҷы кӱнiнде 9.00-11.00 часта маркетолог Мадина Симонова тикке сурығларға нандырар. Полған на пазынған идiнҷекке чарым час кӧрiлер. Пу ӱс мероприятие «Минiң пос киреем» кiннiң туразында пу адресче иртер: Ағбан г., Чоннар ынархазы ор., 2а, 2-ҷi хадыл.
Автор :
Наталья Субракова
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 1 | 2 | 3 | 4 | 5 |
Кӱн таңмазы