ХАКАС ТІЛІ KӰHI ХАЙДИ ИРТЕРГЕ КИРЕК?
30.08.2017
Хабарлар
Пӱӱл республикада 4 сентябрьда пастағызын на Хакас тілі кӱні таныхталар. Пістің хығырығҷыларыбыс постарының сағыстарынаң ӱлесчелер.
Саяна УЛТУРГАШЕВА, А.М.Топановтың адынаң Хакас драма театрының режиссеры:
- Тоғыс хоостыра удаа хығырығҷылар марығларының жюризінде одырарға килісче. Халғанҷы туста хакас палалар анда ӧткін араласчалар, че пос тілінең кибелісті ікі-ӱс ле кізі хығырча. Ӱгренҷілерні тӧреен тіліне кӧніктіріп, пу ӱлӱкӱнде хайди даа хығырығҷылар мариин иртірерге кирек тіп санапчам. Олғаннар хакас тілінең кибелістер, чоохтарның ӱзіктерін хығырзыннар. Улуғлар даа устарын кӧзітсіннер. Андада Хакас тілі кӱні тузалығ полар.
Марат БУРНАКОВ, хоосчы, Д.И.Каратановтың адынаң олған хоос школазының директор орынҷызы:
- Мин хакас тілінең чоохтассам даа, позым аны уйан пілчем тіп санапчам. Пірее хакас сарыннарын алай алыптығ нымахты иссем, кӧп сӧстер оңарбин халчам. Ӱлӱкӱн тузында пос тілінең чоохтазар оңдайларны тилідер мероприятие иртірілерге кирек тіп санапчам. Ідӧк хакас тілінең чоохтанминчатханнарға хайығ айландырарға кирек.
Ирина ЧУГУНЕКОВА, музыкант, «Айланыс» чайаачы ӧменің араласчызы:
- Минің кӧрізімнең, чуртасты музыка паза кӧглер чазапчалар. Ӱлӱкӱнде олғаннар тахпахтар толдырзалар, чахсы поларҷых. Тахпахтар улуғ ниместер, пос тілінең чоохтанминчатхан даа палаларға оларны ӱгреніп аларға сидік полбас. Сизінгенде, хакас чонның кӧг тиріглерінең ойнапчатхан оолағас-хызыҷахтарның саны ӧсче, аннаңар чиит музыканттарның аразында марығ иртірібізерге чарир.
Марина ТОПОЕВА, Истегі библиотеканың тоғынҷызы:
- Санапчам, олғаннарға хакас чонның нымахтарын, пістің писательлернің чайаачы тоғыстарын истілдіре хығыртырарға кирек. Пасталығ класстарның ӱгренҷілеріне Михаил Кильчичаковтың «Кӧйтік тӱлгӱдеңер нымах» кӧңніне кірер. Саарбахтарға пасха произведениелерні таллап аларға чарир. Амғы палалар хығырарға хынминчалар, мындағ акция хоостыра олғаннар кинделер хығырарға даа ӱгрен парарлар, пос тіліне дее тартыларлар.
Валерий БАЛАХЧИН, тиксі Россияның хумартхы хайраллаҷаң пірігістің Хакасияҷа пӧлиинің кнес орынҷызы:
- Чииттерні, хакас тілін пілзіннер тіп, кӧніктірерге кирек, че, минің кӧрізімнең, пу ӱлӱкӱнге 4 сентябрь пір дее киліспинче. Постарың кӧріңер, 1 сентябрьда - Піліс кӱні таныхталча, пӱӱл 2 сентябрьда Хакасияның Чииттер кӱні иртірілер. Олғаннар тынағ кӱннері соонда школазар ізік хайди азылчатханын даа ундут салған поларлар, Хакас тілінің пайрамы ирткенін олар сизінмин дее халарлар.
Автор :
Майя КИЛЬЧИЧАКОВА
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы