ПІЛІЗІП ТОҒЫНҒАНЫ ТАҢДАҒЫЗЫНА ІЗЕНІС ПИРЧЕ
06.09.2017
Хабарлар
Ирткен тынағ кӱнінде, 2 сентябрьда, Хакасияның пазы Виктор Зимин Алтай аймаандағы Кӧк хайа аалзар тоғыс чорығынаң чӧрген. Анда ол орындағы котельнай хысхызына тимдезін, чоллар нааҷылалчатханын сыныхтаан. Ідӧк аалның улуғ частығ чуртағыларынаң паза чииттерiнең тоғасхан. Амды пу чорыхтаңар алғыда.
Орындағы котельнай Кӧк хайа аалға хысхы тооза чылығ пирче, че кӱзі хоостыра пасха даа хонҷых аалларға чылығ пирерге тимде. Кӧзідімге, Индіркі Сограа паза Ағбан городтың улуғ нимес чардығына. Пу тусха котельнай тоғынарға тимде. Тӱрчедең андар 400 азыра тонна хара тас кирілер. Котельнайның мыннаң мындархы тоғызын республика пазы пу кӱннерде теестегі чыылығда ӱзӱрерге чаратхан.
Ідӧк тоғыс чорығында Виктор Михайлович аалның ӧӧн орамазын сыныхтап парыбысхан. Аалның Набережнай орамазында автомобильлер иң кӧп хайынчалар, пуох чолҷа илееде маршрут автобузы чӧрче. Аннаңар мыңда чол иң уйан.
Ӱр ниместе Набережнай орамада улуғ тыхтағ тоғыстары пасталыбысханнар. Чолҷылар, оймахтарны тӱзедіп, наа асфальт тӧзирге тимненчелер. Мындағох тоғыстар аалның Зеленай орамазында парча. Ікі ораманы нааҷылирына тиксі 5 миллион салковай хорадылар. Хайди таныхтаан Хакасияның транспорт паза чол хонии министрi Александр Попов, тоғыстар сентябрь айның ортызында тоозыларлар.
Ідӧк пу тоғазығда аал чуртағҷылары чарытхы удаа ӱзірілчеткеннеңер искіргеннер. Таныхтирға кирек, Хакасияның муниципалитеттерінің аразында Алтай аймаанда, ӧӧнінде Кӧк хайа аалда, иң удаа паза ӱрге чарытхы ӱс парча. Аның сылтаанда чуртағҷыларның электротехниказы удаа кӧй парча. Хайди сан пиріс иткен Хакасия пазының орынҷызы Валерий Марков, план хоостыра электроэнергетиктер Алтай аймаанда 2018 чылда чарытхы суриин пӧгібізерге киректер.
- Сағыҷаң тус чоғыл. Тыхтағ тоғыстарын пуох чылда пастирға кирек, - хатығ чоохтанған Виктор Михайлович. - Иб аразында чарытхы сыбыра кирек. Чуртағҷылар иптіг чоллығ паза сыбыра чарытхылығ чуртирға киректер.
Аннаң андар регион пазы аалдағы Чиңіс паркынзар чол тутхан. Анда Хакасияның спорт министерствозы Илбек Ада чаадаң айланмаан чааҷыларға паза тыл істенҷілеріне хумартхы тас турғысхан. Амды аалдағы улуғ-кічіглер пу орынзар тіріг чахайахтар саларға удаа кил парчалар. Ідӧк анда хай пірее уроктар иртче. Че паркты аннаң андар иптеп салар ӱчӱн, Алтай аймааның ветераннар чӧбі анда асфальт тӧзирге, олған площадказын турғызарға паза тигіриб пӱдір саларға пӧгінче.
- Амды пу орынзар аал чуртағҷылары удаа кил парчалар, постарының туған-чағыннарын ағылчалар, чаадаң айланмааннарны сағысха кирчелер. Че пу орынның пір дее кӧрімі чоғыл. Сиденнері дее иргі. Аннаңар паркты сиденнирге паза хумартхы тастарның ікі саринаң улуғ нимес чаа техниказын турғыс пирерге полыс пирерге сурынчабыс, - айланған регион пазынзар Алтай аймааның ветераннар чӧбінің араласчызы Людмила Михайловна Пленкина.
Республика пазы аал чуртағҷыларын истіп алған паза Чиңіс паркын иптеп саларға хабас пирерге молҷаан. «Кӧк хайа» спорткомплекс халғанҷы орын полған, хайда пол килген Хакасия пазы. Анда Виктор Зимин спорт школазы нааҷылалғанын, инвентарьларны, кип-азах алыстырҷаң комнаталарны, спортзалларны, футбол паза хоккей ойнаҷаң чазыларны кӧріп алған. Пу тоғыс спорткомплексте халғанҷы ікі чылға иділ парған.
- Халғанҷы чылларда спорткомплексте тыхтағ тоғызы иділгенде паза наа спорт инвентарьы алылғанда, анда кӧп наа секциялар азарға оңдай полған. Школаның амғы тусха килістіре оборудованиезі пар, че ӧӧні- олғаннар спортнаң айғазып пастабыстылар, - таныхтаан чооғында республика пазы Виктор Зимин.
Ідӧк ол спорткомплекссер чӧрчеткен олғаннарнаң тоғасхан. Анда велосипед секциязына чӧрчеткен чииттер Виктор Михайловичке оларға спорт формазын аларға хабас пирген ӱчун алғыстарын читіргеннер.
Іди Алтай аймааның устағ-пастаа Хакасияның ӱлгӱзінең, хада-пірге тоғынып, чӧптезіп паза алнынзар пӧгіннер турғызып, муниципалитеттің аймах-пасха сфераларындағы ағырсымнығ сурығлары пӧгілче. Пу тоғыс ӧӧнінде орындағы чуртағҷыларның чуртазын нииктир ӱчӱн иділче.
Автор :
Оксана СУНЧУГАШЕВА Сомнар Дина КАРАМЧАКОВАНИ
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы
Хакасияда
Россияда
Тилекейде