АЛТАЙ ЧОННЫҢ ГАЗЕТАЗЫНА - 95 ЧЫЛ
13.09.2017
Хабарлар
Алтай Республиканың «Алтайдын Чолмоны» («Алтайның Чылтызы») национальнай газета тӧстелгеннең пеер 95 чыл толча. Газетаның пайрамнығ чылына чарыдылып, 3 сентябрьда Горно-Алтайскта национальнай ойыннар фестивальы ирткен.
Фестивальға ікі улуғ спорт марии кірген. Алтай чирінің охчаанаң атчаң иң чахсы спортсменнері «Сартахпайның соғаннары» марығда араласханнар. Ікінҷі марии «Ирбизектің ойыннары» адалған. Анда араласхан чон спорттың аймах кӧрімнерінҷе сынасхан.
Фестивальны республика устағҷылары асханнар. Чон алнынзар Алтайның Эл Курултай - Хазна чыылииның кнезі Владимир Тюлентин, правительствоның кнес орынҷызы Александр Манзыров, Хазна Думазының депутады Родион Букачаков паза даа пасхазы сыхханнар. Улуғ аалҷылар «Алтайдын Чолмоны» газета тоғынҷыларын пайрамнаң алғыстааннар. Национальнай ойыннар фестивальында араласчатхан спортсменнерге пӧзік чидіглер алғааннар.
Ӱлӱкӱн кибірли чаламалар палғирынаң, Ызых отха пазырарынаң паза спортсменнер чӧрімінең азылған. Театрализованнай кӧзідіг Сартахпай паза Ирбизек алыптарға чарыдылған.
«Сартахпайның соғаннары» марыға Горно-Алтайсктаң паза читі аймахтаң иң кӱстіг атығҷылар чыылыстыр. Охчаанаң атчатхан узын 30-ча кізі кӧзіткен. Командалар аразында пу марығда онгудайдағылар алтын медаль алғаннар. Усть-Кан аймахтағылар ікінҷі орынға турысханнар, чемалдағылар - ӱзінҷі.Чемал аймахтың спортсменнері мының алнында чиңісчі санынаң тӱспеҷеңнер. Ӱзінҷі орында пол парғаннары кӧрігҷілерні хайхатхан.
«Ирбизектің ойыннары» спорттың аймах кӧрімнерінҷе марыға кӱрес, охчаанаң атары, хапчаң тас, хамҷынаң сыназары паза чӱгӱрері кірген. Мында Онгудай, Шебалин, Усть-Кан, Улаган, Маймин аймахтардаң паза Горно-Алтайсктаң спортсменнер араласханнар. Кӱзінең сынасхан 23 алыптың ікізі - Эл ойын ӱлӱкӱннің чемпионы, пірсі - чоннар аразындағы класстың спорт узы, тоғызы - Россияның спорт узы паза аймах синдегі марығлар чиңісчізі. Алтайның иң кӱстіг алыптары 75 килограмм пасчатхан тастығ 60 метр чӱгӱргеннер.
Национальнай ойыннар фестивальы Алтайда, «Алтайдын Чолмоны» газетаның пайрамына чарыдылып, пастағызын на иртірілді. Пӱӱл республика газетазына чарыдылған кӧп мероприятие иртірілер: национальнай музейде кӧзідіг, национальнай библиотекада акциялар паза чонға лекциялар, ағастар аллеязы одыртылар, хығырығҷыларнаң тоғазығлар... Пайрамнығ мероприятиелер республиканың национальнай драма театрында ноябрьда тоозылар.
«Алтайдын Чолмоны» - республиканың иң иргі газетазы. 1922 чылның 15 ноябрьында аның пастағы сығарызы чарых кӧрген. Ол андада «Кызыл Солын Табыш» («Хызыл Хабарлар») адалған, «Ойротский край» орыс тілінең сыхчатхан газетаның хоза сығарызы полған. Пір чыл пазынаң алынҷа газета полыбысхан. 1948 чылдаң «Алтайдын Чолмоны» адалча.
Алтайларның пӱӱнгі газетазы неделяда ікі хати сыхча. Олғаннарға «Башпарак» тимнелче, чииттерге - «Чылдыстык», орыс тілліг чонға - «Родник» ӧнетін сығарыс. «Алтайдын Чолмоны» газета «Знак Почёта» орденнең сыйыхтатхан.
Автор :
«Алтайдын Чолмоны» газета
Пн | Вт | Ср | Чт | Пт | Сб | Вс |
1 | 2 | 3 | 4 | 5 | 6 | 7 |
8 | 9 | 10 | 11 | 12 | 13 | 14 |
15 | 16 | 17 | 18 | 19 | 20 | 21 |
22 | 23 | 24 | 25 | 26 | 27 | 28 |
29 | 30 | 31 | 1 | 2 | 3 | 4 |
Кӱн таңмазы