ЧАХСЫ ПІЧІКТЕРІ ӰЧӰН - ПОЧТА СЫЙИИ
05.12.2018
Хабарлар
Чиңісчілер Александр АРЧИМАЕВ, Алина КУТУКОВА ӱгретчізі Г.В.БОРГОЯКОВАНАҢ (ортызында) паза Д.С.ЦИЛИНАНАҢ хада
Марығ салтарлары. Россия почтазының Хакас филиалында «Иң чахсы пічік урогы» марығның чиңісчілерін алғыстааннар.
Россия почтазы «Иң чахсы пічік урогы» марығны чыл сай иртірче. Марығ пічіктер пазарына хайығ айландырар пӧгіннең иртірілче. Ідӧк - ӱгренҷілерні пічіктерні орта пазарға ӱгредіп, андағ уроктарның методика тоғыстарын тилідері.
Тиксі Россия мариинда Хакасия чыл сай араласча. Пу чыл пічік уроктары ідӧк республиканың город-аймахтарындағы школаларда иртірілгеннер. Республикада чиңіс тутханнарны почта тоғынҷылары ирткен неделяда алғыстааннар.
Россия почтазының Хакас филиалы директоры Дарья Цилина таныхтаан, амғы туста Интернет, мобильнай телефоннар палғалызы полызиинаң СМС-искіріглерні школаа чӧргелек тее палалар чапчаң ыс полчалар. Че чаҷында піреезіне пічік пас пирерге киректелзе, ӱгренҷілер сидіксінчелер. Орта пазып, пос сағызын пай сӧстернең чарыт пирерге киректелче нооза. Пӱӱл марығда кӧп кізі араласхан, че сыйыхха турызар тоғыс саны ас полтыр. Жюридегілер иң чахсы алты ла тоғысты таллап алтырлар.
Жюриде полып, пічіктерні паалааннар республиканың хоза ӱгредіг кінінің специалисттері паза почта тоғынҷылары. Олғаннар тоғыстарны тиксі 11 номинацияҷа пасханнар. Кӧзідімге, «Пар андағ профессия - Ада чир-суун арачылиры...», «Минің ибімде амурскай тигр чуртапча», «Минің хынчатхан книгам» паза пасхазы даа. Пӱӱл марығ Волонтёр чылына чарыдылған. Чайаачы тоғыстар, тізең, ідӧк «Мин волонтёрбын!» темаҷа иң кӧп пазылтыр. Пу номинацияда сыйыхтығ орыннарға Ағбан пилтіріндегі ортымах школаның ӱгренҷілері турысханнар: I орынға - Белла Хастинова, II орынға - Кристина Иконникова, III орынға - Анастасия Струговцева.
«Хазых полар ӱчӱн, парктарзар паза спорт площадкаларынзар!» номинацияда чиңісчі полыбысхан Калининдегі ортымах школаның ӱгренҷізі Александр Арчимаев (Асхыс аймаа), II орында - Иван Овчинников (Ағбан пилтіріндегі школа).
«Часкалығ сӧбіренің рецепттері» номинацияда диплом Алина Кутуковаа читірілген. Ол - Калининдегі ортымах школаның ӱгренҷізі (Асхыс аймаа). 11 класстағы ӱгренҷі, сӧбіре удур-тӧдір пілізізіп чуртаза, ізестіг киртініс пар полза, ол ырыстығ полча тіп санапча. Алина часкалығ сӧбіреде чуртапчам тіпче. Школада ол уғаа маңат ӱгренче. Оолах-хызыҷахтарға мындағ чӧп пирче: чайаачы тоғысты, пасхазына пір дее кӧӧкпин, прай чӱреенең, ах сағыснаң пазарға кирек.
Чоохтирға кирек, Калининдегі ортымах школадаң пу марығда ікі ле ӱгренҷі араласхан. Ікізі чиңісчі полыбысхан. Александр Арчимаевтің паза Алина Кутукованың орыс тілі паза литература ӱгретчізі Галина Васильевна Боргоякова полча. Почта тоғынҷылары ағаа, ӱгренҷілерін марыға чахсы тимнеен ӱчӱн, алғыстас пічиин хайди даа читірерлер тіп молҷааннар. Аның ӱгренҷізі Александр Арчимаев пӱӱл 10-ӌы класста ӱгренче. Пылтыр, пу марығда пастағызын аралазып, ідӧк спортха чарыдылған темаҷа пічік пастыр. Ол спортнаң айғазарға хынча, олаңай кӱреснең пис чыл айғас парир. «Пу марығда аралазарға ӱгретчім чӧп пиргенде, мин ынабысхам. Хынчатхан кирекнең айғазарға хынығ нооза. Анаң аның ӱчӱн сыйых алып алзаң, улам кӧңнің кӧдірілче. Мин школада сочинениелер пазарға хынчам», - сағызынаң ӱлескен чиит спортсмен.
Пу тоғазығда почтаның сыйии паза дипломнар ідӧк читірілген ирткен чылда марығда араласхан ікі кізее - Харатастағы гимназияның ӱгренҷілері Мария Минченковаа паза Никита Грязновха. Че Никита амды студент полчаттыр, аның сыйии іҷезіне читірілген. Паза Россия почтазының алғыстас пічиинең сыйыхтаттырған Ағбан пилтіріндегі школаның орыс тілі паза литература ӱгретчізі Анна Алексеевна Малыхина. Марығда араласхан тӧрт ӱгренҷізінең ӱзі чиңісчі полыбысхан.
Автор :
Инора БОРГОЯКОВА
Пн | Вт | Ср | Чт | Пт | Сб | Вс |
31 | 1 | 2 | 3 | 4 | 5 | 6 |
7 | 8 | 9 | 10 | 11 | 12 | 13 |
14 | 15 | 16 | 17 | 18 | 19 | 20 |
21 | 22 | 23 | 24 | 25 | 26 | 27 |
28 | 29 | 30 | 31 | 1 | 2 | 3 |
Кӱн таңмазы